61 ކިލޯގެ މަސްތުވާތަކެތީގެ މައްސަލައިގައި 11 މީހަކަށް ދައުވާކުރަން ހުށައަޅައިފި
އެމީހުން ހައްޔަރު ކޮށްފައިވަނީ "އިރުއަލިމަސް" ކިޔާ ދޯންޏަކުން
61 ކިލޯގެ މަސްތުވާތަކެތި އެތެރެކޮށްފައި ވަނީ \"އިރުއަލިމަސް\" ކިޔާ ދޯންޏެއްގައި ކަމަށް ޕީޖީ އޮފީހުން ބުނެފައިވޭ
ފުލުހުން ހިންގި އޮޕަރޭޝަނެއްގައި ހޯދި 61 ކިލޯގެ މަސްތުވާތަކެތީގެ މައްސަލައިގައި ހިމެނޭ 11 މީހެއްގެ މައްޗަށް ދައުވާ ކުރަން ޕްރޮސެކިއުޓަރ ޖެނެރަލް (ޕީޖީ) އޮފީހުން ކްރިމިނަލް ކޯޓަށް ހުށައަޅައިފި އެވެ.
މަރޗު މަހުގެ 26 ވަނަ ދުވަހު ފުލުހުންގެ ޑްރަގް އިންޓެލިޖެންސް ޑިޕާޓްމަންޓާއި، ޑްރަގް އެންފޯސް ޑިޕާޓްމަންޓާއި، މެރިން ޕޮލިސް އިން ހިންގި މި އޮޕަރޭޝަނުގައި މަސް ދޯންޏަކުން 61.06 ކިލޯގެ ހެރޮއިން އަތުލައިގަނެފައިވާކަން ޕޮލިސް ކޮމިޝަނަރު މުޙައްމަދު ހަމީދު މީގެ ކުރިން ވިދާޅުވެފައިވެ އެވެ. އެގޮތުން މިތަކެތީގެ އަގު 72 މިލިއަން ރުފިޔާއަށް އަރާ ކަމަށްވެސް ސީޕީ ވިދާޅުވި އެވެ.
އެކަމާ ގުޅޭގޮތުން އާދިއްތަ ދުވަހު ޕީޖީ އޮފީހުން ކުރި ޓްވީޓެއްގައި ބުނީ، މިއީ މ. ބޮއިލިންގފިޝް، އަޙްމަދު ވިސާމް ނަމަކަށް ކިޔާ މީހަކު އިސްވެހުރެ، އިތުރު ބަޔަކާ ބައިވެރިވެގެން ހިންގި ކަމެއް ކަމަށެވެ. އަދި މިތަކެތި އެތެރެކޮށްފައި ވަނީ "އިރުއަލިމަސް" ކިޔާ ދޯންޏެއްގައި ކަމަށް ޕީޖީ އޮފީހުން ބުނެފައި ވެއެވެ.
މި 11 މީހުންގެ މައްޗަށްވެސް ދައުވާ ކުރުމަށް ކްރިމިނަލް ކޯޓަށް ވަނީ ހުށައަޅާފަ އެވެ.
އެކަމާ ގުޅޭގޮތުން ޕީޖީ ހުސައިން ޝަމީމް ކުރެއްވި ޓްވީޓެއްގައި ވަނީ މި މައްސަލައިގައި ފުލުހުންނާ ޕީޖީ އޮފީހުން ކުރަމުންދާ މަސައްކަތްތައް ފާހަގަ ކުރައްވާފަ އެވެ. އެގޮތުން ޕީޖީ ވިދާޅުވީ، މި މައްސަލައިގެ ދައުވާ ފޯމުގައި ވެސް 576 ސަފްޙާ ހިމެނޭ ކަަމަށާއި، މައްސަލައާ ގުޅޭ ގިނަ ހެކިތަކަކާއި ބަޔާންތަކެއް އޭގައި ހިމެނިފައިވާނެ ކަމަށެވެ.
އަދި އަވަހަށް ޝަރީއަތްތައް ފެށުމަށް އެދިވަޑައިގަންނަވާ ކަމަށް ޕީޖީ ވިދާޅުވި އެވެ.
މި މައްސަލައިގައި 11 ދިވެއްސަކު ހިމެނޭއިރު، އޭގެ ތެރެއިން 7 މީހުން ހައްޔަރު ކޮށްފައިވަނީ މަސް ދޯނިން ކަމަށާއި އަނެއް 4 މީހުން ހައްޔަރު ކޮށްފައިވަނީ ހުޅުމާލެއިން ކަމަށް ފުލުހުން ބުނެފައި ވެއެވެ.
