އިސްލާހު ކުރަން ބުނި ކަންކަން އިސްލަހުކުރުމަށްފަހު ނޫނީ، ވިލިވަރުގައި ކަރަންޓީން ނުކުރުމަށް އެޗްއާރުސީއެމުން އެދިއްޖެ
މަރުކަޒުގައި މީހުން ކަރަންޓީނު ކުރުމުގެކުރިން މި މަރުކަޒުގައި ތިބޭ ފަރާތްތައް ވިއްސާރައިން ސަލާމަތްވާނޭ ގޮތަކަށް ފާޚާނާތަކަށް ދެވޭނެ އިންތިޒާމު ހަމަޖެއްސުން
ވިލިވަރުގައި ތަރައްގީކުރި ކަރަންޓީން ފެސިލިޓީގެ ބައެއް - މިތަނުގައި 250 އެނދު ހުންނާނެ
ކ. ވިލިވަރުގައި ގާއިމުކޮށްފައިވާ ކަރަންޓީނު ފެސިލިޓީގައި މީހުން ބައިތިއްބަންވާނީ، އިސްލާހު ކުރަން ބުނި ކަންކަން އިސްލަހުކުރުމަށްފަހުގައި ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން ބުނެފި އެވެ.
ވިލިވަރުގައި ގާއިމުކޮށްފައިވާ ކަރަންޓިނު ނުވަތަ ސިއްހީގޮތުން އެކަހެރިކުރާ މަރުޒަކަޒަށް އެޗްއާރުސީއެމުން ޒިޔާރަތް ކުރުމަށްފަހު، އެކޮމިޝަނުން އާންމުކޮށްފައިވާ ރިޕޯޓްގައި ބުނެފައިވާގޮތުގައި، ފާހަގަކުރެވުނު މުހިއްމު ކަންކަމުގެ ތެރޭގައި 22 ކަމެއް ހިމެނެ އެވެ. އެކަންތައްތަކާއި ގުޅިގެން، 11 ހުށަހެޅުމެއް ޑިފެންސް މިނިސްޓްރީއަށާއި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އަށް ހުށަހަޅާފައިވެއެވެ.
މިގޮތުން އެޗްރާސީއެމްގެ ނިންމުމުގައި މައިގަނޑު ގޮތެއްގައި ބުނެފައިވަނީ، ކ. ވިލިވަރުގައި ކަރަންޓީނު ނުވަތަ ޞިއްޙީގޮތުން އެކަހެރިކުރުމަށް ޤާއިމުކުރެވިފައިވާ މަރުކަޒަށް ކުރި ޒިޔާރަތުގައި މިމަރުކަޒަކީ ދައުލަތުގެ ބެލުމުގެ ދަށުގައި މީހުން ބޭތިއްބުމަށް ކަނޑައަޅާ މިންގަނޑުތަކާ އެއްގޮތަށް މެޓީރިއަލް ކޮންޑިޝަން ފަރުމާކޮށްފައިވާ މަރުކަޒެއްތޯ ބަލާފައިވާނެއެވެ. މަރުކަޒުގައި މީހުން ކަރަންޓީނު ކުރުމުގެކުރިން މި މަރުކަޒުގައި ތިބޭ ފަރާތްތައް ވިއްސާރައިން ސަލާމަތްވާނޭ ގޮތަކަށް ފާޚާނާތަކަށް ދެވޭނެ އިންތިޒާމު ހަމަޖެއްސުމަށާއި، ފެންވެރުމަށް ބޭނުންކުރާ ތަނަށް ބަދަލުގެނެސް އެ ފަރާތްތަކުގެ އިންސާނީ ކަރާމާތް ރައްކާތްތެރިކޮށްދިނުމަށް ހުށަހަޅާފައިވެއެވެ.
މީގެއިތުރުން، މަރުކަޒުގައި ބޭނުންކުރަމުންދާ ބަދިގޭގެ ސާފު ތާހިރުކަމަށް އެކަށީގެންވާ ހައްލެއްގެނެސް، މަރުކަޒުގައި މަދިރިއާ މެހި އަދި ސޫފާސޫފި މަދުކުރެވޭނެ އިންތިޒާމުތައް ހަމަޖެއްސުމަށާއި، މަރުކަޒުގައި ހުރި ޓެންޓުތަކަކީ ވިއްސާރައިން ރައްކާތެރިވެވޭނެ ތަންތަނަށް ބަދަލުކުރުމާއެކު މިތަނުގައި މަސައްކަތްކުރާ މުވައްޒަފުންނަށް ފެންވެރުމާއި ފާޚާނާކުރަމަށް ހަރުދަނާ އިންތިޒާމުތަކެއް ހަމަޖައްސައި ދިނުމަށްވެސް އެޗްއާރުސީއެމްގެ ރިޕޯޓުގެ ހުށަހެޅުންތަކުގެ ގޮތުގައި ހުށަހަޅާފައިވެއެވެ.
އޭގެއިތުރުން މަރުކަޒުގައި އަލިފާން ނިއްވާލެވޭނެ އިންތިޒާމުތައް ހަމަޖެއްސުމަށް އެޗްއާރުސީއެމުން ހުށަހަޅާފައިވެއެވެ.
