ބިދޭސީން ދިރިއުޅެމުންދާ 24 ތަނެއް ފުލުހުން ދަނީ ބަލަހައްޓަމުން: ސީޕީ ހަމީދު
22 މެއި 2020 | ހުކުރު 06:25ގިނަ ބިދޭސީން ތޮށް ޖެހިގެން ދިރިއުޅެމުންދޭ
ގިނަ އަދަދެއްގެ ބިދޭސީން ކަރަންޓީން ފެސިލިޓީތަކަށް ގެންދެވިފައިވޭ
ކޮވިޑް-19ގެ މިހާލަތާ ގުޅިގެން ބިދޭސީން ދިރިއުޅޭ 24 ތަނެއް ފުލުހުން ބަލަހައްޓަމުން ދިޔަ ކަމަށް ޕޮލިސް ކޮމިޝަނަރ މުޙައްމަދު ޙަމީދު ވިދާޅުވެއްޖެ އެވެ.
ރާއްޖެޓީވީގެ ކޮވިޑް-19ގެ ކަވަރޭޖަށް ދެއްވި އިންޓަވިއު އެއްގައި ސީޕީ ހަމީދު ވިދާޅުވީ މާލެ ތެރޭގައި 'ކޮމިއުނިޓީ ސްޕްރެޑް' ފެށުމުން ޚާއްސަ ސަމާލުކަމެއް ދިނީ ބިދޭސީންނަށް ކަމަށެވެ. އެމީހުން ދިރިއުޅެމުން ދަނީ ގިނަ ބަޔަކު އެއްތަނެއްގައި ތޮށް ޖެހިގެން ކަމަށާއި، ބިދޭސީންގެ ދިރިއުޅުމުގެ ހާލަތު ހުރި ގޮތުން ވައިރަސް ފެތުރުމުގެ ބިރު ބޮޑުވި ކަމަށް ސީޕީ ހަމީދު ވިދާޅުވިއެވެ.
ކުރެވުނު މަސައްކަތުގެ ދަށުން ގިނަ އަދަދެއްގެ ބިދޭސީން އެކި ފެސިލިޓީތަކަށް ގެންދެވުނު ކަމުގައިވީ ނަމަވެސް ތޮއް ޖެހިގެން ބިދޭސީން ދިރިއުޅެމުން ދިޔަ 24 ތަނެއް ފުލުހުން ބަލަހައްޓަމުންދާ ކަމަށެވެ. އަދި މިއިން އެއްވެސް ތާކުން ބިދޭސީއަކު ފިލި މައްސަލައެއް ރިޕޯޓު ކޮށްފައި ނުވާކަން ސީފީ ފާހަގަކުރެއްވިއެވެ.
ސީޕީ ހަމީދު ވިދާޅުވީ މާލެ ސިޓީގެ އެކި ސަރަހައްދުތަކުން ކޮވިޑް-19ށް ރެންޑަމް ސާންޕަލްތައް ނެގިއިރު ބިދޭސީންތަކެއް ޕޮޒިޓިވްވެ އެމީހުން ހޯދުމަށް ދަތިތަކެއް ކުރިމަތިވި ކަމަށެވެ. ނަމަވެސް މިހާރު ރެންޑަމްގެ ސާމްޕަލްތައް ނެގުމުގެ ކުރިން އެމީހާގެ ފުރިހަމަ މައުލޫމާތާއި، ފޮޓޯ ނަގާނެ ކަމަށެވެ. އަދި އެމީހަކު ޓްރޭސް ކުރެވޭނެ ކަމަށް ސީޕީ ވިދާޅުވި އެވެ.
ގާނޫނާ ޚިލާފަށް ގިނަ އަދަދެއްގެ ބިދޭސީން އުޅޭކަން ފާހަގަކުރައްވައި ސީޕީ ހަމީދު ވިދާޅުވީ މިސަބަބާ ހުރެ ވެސް ގިނަ ދަތިތައް ކުރިމަތިވާ ކަމަށެވެ.
