ކޮވިޑް-19އާއި ގުޅިގެން ފަލަސްތީނުގައި އަޅާފައިވާ ފިޔަވަޅުތަކައް ލުޔެއް ދެނީ

ކޮވިޑް-19އާއި ގުޅިގެން ފަލަޞްޠީނުން އަޅާފައިވާ ބައެއް ފިޔަވަޅުތައް ލުއިކުރަން ނިންމައިފި އެވެ.

ފަލަޞްޠީނުގައި ކޮވިޑް-19ގެ ނުރައްކާ ބޮޑުވުމުގެ ސަބަބުން ސަލާމަތާއި ރައްކާތެރިކަމުގެ ފިޔަވަޅެއްގެ ގޮތުން މާރޗް މަހުގެ 5 ވަނަ ދުވަހު ޖަމާޢަތުގައި ނަމާދުކުރުމާއި އެއްވެ އުޅުން މަނާކޮށް، ސަރުކާރުގެ އިދާރާތައް ބަންދުކުރި އެވެ. އެހެން ނަަމަވެސް ބަރަކާތްތެރި ރަމަޟާން މަހު ޢާންމު ރައްޔިތުންނަށް ލުއި ފަސޭހަކޮށް ދިނުމުގެ ބޭނުމުގައި މިހާރު ވަނީ ލުއި ދޭން ފަށާފަ އެވެ.

ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމެއްގައި ފަލަޞްޠީނުގެ ޞިއްޙަތާ ބެހޭ ވަޒީރު، މާއީ އަލް- ޚައިލާ ވިދާޅުވީ ކޮވިޑް-19ގެ ޙާލަތާއި ގުޅިގެން އަޅާފައިވާ ފިޔަވަޅުތަކަށް ވެވުނު އެންމެ ބޮޑު މިންވަރަކުން ދޫދިނުމަށް ސަރުކާރުން ނިންމަވާފައިވަ ކަމަށެވެ. އެގޮތުން ވައިރަސްގެ ނުފެތުރޭ އަވަށްތަކުގައި ހުރި ސަރުކާރުގެ ހުރިހައި މިނިސްޓްރީ ތަކާއި، ޢާންމު ޚިދުމަތްދޭ އިދާރާތައް އަލުން ހުޅުވަން ވަޒީރުންގެ މަޖިލީހުން ނިންމާފައިވާކަމަށް ވިދާޅުވި އެވެ.

މީގެ އިތުރުން ޢާންމު ވިޔަފާރިތަކާއި، ދަތުުރު ފަތުުރުގެ ޚިދުމަތައް ވެސް ލުޔެއް ދިނުމަށް ނިންމާފައިވާ ކަމަށާއި، ލުއި ދިންކަމުގައިވީ ނަމަވެސް، ޚިދުމަތް ލިބިގަތުމުގައި ޢާންމުން ސަމާލުވާން ޖެހޭ ކަންތައްތަކެއް ކަނޑައަޅާފައިވާ ކަމަށް ވިދާޅުވި އެވެ.

ޚިދުމަތްތަކަށް ލުއި ދިންނަމަވެސް، އަންނަ ފިޠުރު ޢީދާއި ދިމާކޮށް، އެއް ސިޓީން އަނެއް ސިޓީއަށް ދަތުރުކުރުމުގެ ހުއްދަ ދޭން ނިންމާފައެއް ނުވެއެވެ. މަރޗް މަހުގެ 5 ވަނަ ދުވަހުން ފެށިގެން އެޤައުމުގެ ސަރުކާރުން ވަނީ އެއް ސިޓީން އަނެއް ސިޓީއަށް ނުވަތަ އެއް އަވަށުން އަނެއް އަވަށަށް އެއްވެސް ބާވަތެއްގެ އުޅަނދެއްގައި ދަތުރު ކުރުން މަނާކޮށްފަ އެވެ.

ފަލަޞްޠީނުގެ ސުޕްރީމް ކޯޓުގެ އިސް ފަނޑިޔާރު މަޙްމޫދު އަލް- ޙައްބާޝް ވެސް ވަނީ އަންގާރަ ދުވަހު ހުޅަނގު އައްސޭރީގެ ހުރިހައި ކޯޓެއް ހުޅުވަން ނިންމާފައިވާ ކަން އިޢުލާނު ކުރައްވާ ފައެވެ.

ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ފަލަޞްޠީނުގެ ޞިއްޙަތާ ބެހޭ ވަޒީރު ވިދާޅުވީ، ހޯމަ ދުވަހުގެ ނިޔަލަށް އެޤައުމުގައި ކޮވިޑް-19 ގެ 567 ކޭސް ރިކޯޑު ކުރެވިފައިވާ ކަމަށާއި، 108 މީހުން މިހާރުވެސް ފަރުވާ ހޯދަމުން އަންނަ ކަމަށެވެ.

ކޮވިޑް-19 ގެ ނުރައްކަލާހުރެ ފަލަޞްޠީނުގެ މުސްލިމުން މިއަހަރުގެ ރަމަޟާން މަސް ހޭދަކުރަމުން ދަނީ ވަރަށް ދަތި އުނދަގުލުގައެވެ. ވަކިން ޚާއްޞަކޮށް އިސްރާއީލާއި، ފަލަޞްޠީނު ގުޅޭ ޞަރަޙައްދީ އިން ކައިރީ ދިރިއުޅޭ މީހުންނާއި ޣައްޒާގެ ރައްޔިތުން ތަޙައްމަލު ކުރަމުން ދަނީ ވަރަށް ދަތި ދުވަސްތަކެކެވެ. އެހެން ރަމަޟާން މަަސް ތަކުގައި ތަރާވީޙާއި ރޯދަ ވީއްލުންތަކާއި ލިބޭ ޞަދަޤާތުން ފުރާނަ މުއްތި ކޮށް ގެން އުޅުނު އެތައް ބަޔަކު މިހާރު ވަނީ ކޮވިޑް-19 އާއި ގުޅިގެން މި ޙަރަކާތްތައް މަނާކުރުމުން ބަނޑަށް ޖެހިފައެވެ. ވެލްފެއަރ ފަންޑުތަކުްނ އެހީތެރިކަން ލިބުނު ނަމަވެސް ދިރިއުޅުުމުގެ ޒަރޫރީ ހުރިހައި ކަމެއް މިމީހުންނަށް ނުފުއްދޭ ކަމަށް ބޭރުގެ އިންސާނީ އެހީދޭ ޖަމާާއަތްތަކުން ބުނެއެވެ.