ޖަރުމަން ލީގުން ދައްކުވައިދިނީ މިސާލެއް ކަމަށާއި، އެހެން ލީގުތަކުން ވެސް އެގޮތަށް އަމަލުކުރުމަށް ލަލީގާގެ ރައީސް ހާވިއޭ ޓެބާސް ވިދާޅުވެއްޖެ އެވެ.

ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލި ޖަރުމަން ލީގު ވަނީ މިދިޔަ ހޮނިހިރު ދުވަހު އަލުން ފަށާފަ އެވެ. ޖަރުމަން ލީގަކީ ޔޫރަޕްގެ ގަދަ ފަސް ލީގުގެ ތެރެއިން ކުޅުން ފެށި ފުރަތަމަލީގެވެ. މީގެ ކުރިން ޔޫރަޕުން ފްރެންޗު ލީގު، ނެދަލެންޑްސް ލީގު، ބެލްޖިއަމް ލީގު އަދި ސްކޮޓްލެންޑް ލީގު ވަނީ ކެންސަލް ކޮށްފަ އެވެ.

ޖަރުމަން ލީގު އަލުން ފަށާފައިވަނީ ޓީމުތަކުން އަމަލުކުރަން ޖެހޭ ހަރުކަށި އުސޫލަތަކެއް ކަނޑައެޅުމަށްފަހު އެވެ. އެގޮތުން ލީގު ފެށުމުގެ ކުރިން ހުރިހާ ކުޅުންތެރިން ވަނީ ކޮވިޑް-19 އަށް ޓެސްޓުކޮށްފަ އެވެ. އަދި މެޗު ފެށުމުގެ ކުރިން ސަލާން ކުރުން މަނާ ކޮށްފައިވާއިރު، ބެންޗުގައި ތިބޭ ކުޅުންތެރިންގެ ދެމެދުގައި ވެސް އެކަށީގެންވާ ދުރުމިނެއް ބަހައްޓަން ވަނީ އަންގާފަ އެވެ. އަދި މެޗުކުޅޭ ބޯޅަތައް ޑިސްއިންފެކްޓް ކުރުމުގެ އިތުރުން، ލަނޑު ޖެހުމަށްފަހު ކުޅުންތެރިން ގައިގޯޅިވެ އުފާފާޅު ނުކުރަން ވަނީ ލަފާ ދީފަ އެވެ.

ލަލީގާގެ ރައީސް ހާވިއޭ ޓެބާސް ވިދާޅުވީ ޖަރުމަން ލީގު އަލުން ފެށުމުން ޖަރުމަން ލީގުގެ ރައީސަށް މަރުހަބާ ދެންނެވި ކަމަށާއި، ޖަރުމަން ލީގުން ދައްކުވައިދިނީ އެހެން ލީގުތަކަށް މިސާލެއްކަމަށެވެ. އެގޮތުން އެހެން ލީގު ތަކުންވެސް އެގޮތަށް އަމަލުކުރުމަށް ޓެބާސް ވަނީ ގޮވާލައްވާފަ އެވެ.

ޖަރުމަން ލީގު އަލުން ފެށިއިރު، ސްޕެނިޝް ލީގު ވެސް އަލުން ފަށަން އަންނަނީ މަސައްކަތް ކުރަމުންނެވެ. އެގޮތުން ސްޕެނިޝް ލީގު ޖޫން މަހުގެ 12 ވަނަ ދުވަހު ފެށޭނެ ކަމަށް އުންމީދުކުރައްވާ ކަމަށް ޓެބާސް މީގެ ކުރިން ވަނީ ވިދާޅުވެފައެވެ.