ކައުންސިލްތަކުގެ ދައުރު އިތުރުކުރަން ގާނޫނުއަސާސީއަށް ހުށަހެޅިފައިވާ އިސްލާހުގެ ބިލުގެ ފުރަތަމަ ކިއުން އިއްވައިފި
މިއީ މި ބިލު މަޖިލީހަށް ހުށަހެޅި ދެވަނަ ފަހަރު
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ލޯކަލް ކައުންސިލް އިންތިޚާބު ފަސްކުރުމާއެކު މިހާރު ތިބި ކައުންސިލްތަކުގެ ދައުރު ދިގުކުރުމަށް ޤާނޫނު އަސާސީ އިޞްލާޙު ކުރުމަށް، ހުށަހެޅި އިޞްލާޙުގެ ބިލު އެޖެންޑާ ކޮށްފި އެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި މި ބިލުގެ ފުރަތަމަ ކިއުން އިއްވާފައިވަނީ މަޖިލީހުގެ ރައީސް މުޙައްމަދު ނަޝީދެވެ.
ސަރުކާރުގެ ފަރާތުން ބިލެތްދޫ ދާއިރާގެ މެންބަރު އަޙުމަދު ޙަލީމު ހުށަހެޅުއްވި މި ބިލަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 5 ވަނަ އިޞްލާޙު ގެނައުމުގެ ޤާނޫނަށް އިޞްލާޙު ގެނައުމުގެ ބިލެވެ.
ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އާ ގުޅިގެން އަޅަންޖެހޭ ރައްކާތެރިކަމުގެ ފިޔަވަޅުތައް އެޅުމަށްޓަކައި، ޤާނޫނު ޢާންމު ޞިއްޙަތު ރައްކާތެރިކުރުމުގެ ޤާނޫނުގެ 33 ވަނަ މާއްދާގެ ދަށުން ދިވެހިރާއްޖޭގައި ވަނީ ޢާންމު ޞިއްޙަތުގެ ކުއްލި ނުރައްކަލުގެ ޙާލަތު އިޢުިލާނުކޮށްފަ އެވެ.
ސަރުކާރުގެ މި ބިލު ހުށަހެޅުމުގެ ބޭނުމަކީ ލޯކަލް ކައުންސިލްތަކުގެ އިންތިޚާބު ބޭއްވުމަށް ރައްކާތެރި މާޙައުލެއް ޤާއިމު ކުރެވެންދެން އެ އިންތިޚާބު ފަސްކުރުމަށް މަގުފަހިކޮށް، އެ އިންތިޚާބު ބާއްވައި، އާ މެންބަރުން އިންތިޚާބުވެ، މަޤާމާ ޙަވާލުވަންދެން މިހާރު އިންތިޚާބުވެފައި ތިބި އަތޮޅު ކައުންސިލުތަކާއި، ރަށު ކައުންސިލުތަކާއި، ސިޓީ ކައުންސިލުތަކުގެ މެންބަރުން، އެމީހުންގެ މަޤާމުގައި ދެމިތިބޭނެ ކަމަށް ކަނޑައެޅުމަށް ޤާނޫނުއަސާސީ އަށް ގެންނަން ޖެހޭ އިޞްލާޙުތައް ގެނައުމެވެ.
މިދިޔަ މަހުގެ ފަސް ވަނަ ދުވަހު ވެސް މި ބިލު މަޖިލީހުގެ ޖަލްސާއަށް އެޖެންޑާ ކުރިއެވެ. ނަމަވެސް ފަހުން ބިލު އެޖެންޑާއިން ނެގުމަށް ފަހު އަލުން ހޯމަ ދުވަހުގެ ޖަލްސާއަށް ބިލު އެޖެންޑާ ކޮށްފައި ވަނީ ދޮޅު މަހަށްވުރެ ގިނަ ދުވަސް ފަހުންނެވެ.
މިދިޔަ މަހު މި ބިލު އެޖެންޑާއިން ނެގުމަށް ފަހު މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝިދު އެޖެންޑާ ކުރެއްވީ، ކައުންސިލަރުންގެ ދައުރު ދިގު ދެންމުމަށް ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށަހެޅުއްވި ބިލެވެ. މި ބިލު އެޖެންޑާ ކޮށްފައިވަނީ، ޢާންމު ޤާނޫނަކުން ކައުންސިލަރުންގެ ދައުރު އިތުރު ނުކުރެވޭނެ ކަމަށް ރައްޔިތުންގެ މަޖިލީހުގެ ކައުންސެލަރ ޖެނެރަލް ފާތިމަތު ފިލްޒާ ލަފާ ދެއްވުމުން ނެވެ. ފިލްޒާ ލަފާދެއްވީ ޤާނޫނުއަސާސީގައި ވާ ކައުންސިލަރުންގެ ދައުރާ ގުޅޭ މާއްދާ އިޞްލާޙު ކުރުމަށެވެ.
މިހާރު ހިނގަމުންދާ ކައުންސިލްތަކުގެ ދައުރަކީ ތިން އަހަރުކަމަށް ޤާނޫނުއާސާސީގައި ބަޔާންކޮށްފައިވެއެވެ. އިންތިޚާބު ނުބޭއްވޭ ޙާލަތަކާއި ގުޅިގެން އެއްވެސް ޤާނޫނުއާސާސީގައި ޤާނޫނަކުން ވެސް ބަޔާންކޮށްފައެއް ނުވެއެވެ.
