ބަންގުލަދޭޝްގެ އިތުރު 67 މީހަކު އަނބުރާ ގައުމަށް ފޮނުވާލައިފި

ގަވައިދާހިލާފަށް ރާއްޖޭގައި އުޅެމުން ދިޔަ ބަންގްލަދޭޝްގެ 67 މީހަކު އަނބުރާ އެ ގައުމަށް ފޮނުވާލައިފި އެވެ.

ފޮރިން މިނިސްޓްރީން ބުނީ މި މީހުން ބަންގްލަދޭޝް އަށް ދިޔައީ ކާނާ އާއި ސިއްހީ ބައެއް ތަކެތި ހިފައިގެން އިއްޔެ ރާއްޖެ އައި އެ ގައުމުގެގެ އަސްކަރީ މަތިންދާބޯޓެއްގައި ކަމަށެވެ. މީގެ އިތުރުން ވެސް އިތުރު މީހުން ގެންދިއުމުގެ މަސައްކަތް ކުރާނެކަމަށް ސަރުކާރުން ވަނީ ހާމަކޮށްފަ އެވެ.

އާދީއްތަ ދުވަހު 67 ބަންގުލަދޭޝް މީހަކު އަނބުރާ ގައުމަށް ފޮނުވާލާފައިވަ އިރު ސައްހަ ލިޔެކިއުން ނެތި ރާއްޖޭގައި އުޅުނު ބަންގްލަދޭޝްގެ 335 މީހަކު ހޮނިހިރު ދުވަހު ވެސް ވަނީ އެ ގައުމަށް އަނބުރާ ފޮނުވާލާފަ އެވެ.

އެ މީހުން ފޮނުވާލާފައި ވަނީ ރާއްޖޭން ޗާޓަރުކުރި ބަންގްލާދޭޝްގެ ގައުމީ އެއާލައިން ބިމާންގެ ފްލައިޓެއްގަ އެވެ. ފޮރިން މިނިސްޓްރީން އިއްޔެ ބުނީ ބަންގްލަދޭޝްގެ ވައިގެ ސިފައިންގެ މަތިންދާބޯޓް އާދީއްތަ ދުވަހު ފުރާ އިރު އެ ގައުމުގެ 70 މީހުން ދާނެ ކަމަށެވެ. ނަމަވެސް ތިން މީހަކަށް ނުފުރުނީ އެކި ސަބަބުތަކާއި ގުޅިގެން ކަމަށް ފޮރިން މިނިސްޓްރީން ބުނެ އެވެ.

ގަވާއިދާ ހިލާފަށް ރާއްޖޭގައި މަސައްކަތްކުރާ ބިދޭސީންގެ އަދަދު 60،000 ށް ވުރެ ގިނަ ކަމަށް ސަރުކާރުން ވަނީ ހާމަކޮށްފަ އެވެ. އަދި މީގެ ތެރޭގައި ގިނައީ ބަންގުލަދޭޝްގެ މަސައްކަތްތެރިންނެވެ.