އެޗްއާރްސީއެމްގެ މެމްބަރުން ވަކިކުރާ މައްސަލަ މަޖިލީހުގެ ޖަލްސާއަށް އެޖެންޑާކޮށްފި
މެމްބަރުން ވަކިކުރާ މައްސަލަ އެޖެންޑާކުރީ ހިއުމަން ރައިޓްސް އެންޑް ކޮމިޓީން އެދިގެން
ހިއުމަން ރައިޓްސް ކޮމިޝަންގެ ރައީސް އައިމިނަތު އީނާސް (ވ-2) އާއި ނައިބު ރައީސް މުހައްމަދު ޒާހިދު (ވ-3)
ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ މެމްބަރުން މަގާމުން ވަކިކުރުމުގެ މައްސަލަ، ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާ އަށް އެޖެންޑާކޮށްފި އެވެ.
މެމްބަރުން ވަކިކުރާ މައްސަލަ އެޖެންޑާ ކޮށްފައިވަނީ މަޖިލީހުގެ ޖަލްސާއަށް މަޖިލިހުގެ ރައީސްގެ މޭޒުން ހުށަހަޅާ ކަންތައްތަކުގެ ތެރޭގައި އެވެ. މި މައްސަލަ ރިޔާސަތުން އެޖެންޑާކުރި ހިއުމަން ރައިޓްސް އެންޑް ކޮމިޓީގެ އެދުމުގެ މަތިންނެވެ.
މައްސަލައިގެ ތަފްސީލެއް މަޖިލީހުން އަދި ހާމަކޮށްފައެއް ނުވެއެވެ.
މިހާރު އެޗްއާރްސީއެމް ގެ މެމްބަރުންގެ ގޮތުގައި ތިއްބެވީ އެ ކޮމިޝަނުގެ ރައީސްގެ މަގާމުގައި ހުންނެވި، އައިމިނަތު އީނާސް އާއި ނައިބު ރައީސް މުހައްމަދު ޒާހިދުގެ އިތުރުން މޫސާ އަލީ ކަލޭފާނު، ނައިވީން އަބްދުﷲ އަދި އައިޝަތު އަފްރީން މުހައްމަދު އެވެ.
މިހާރު ކޮމިޝަނުގައި ތިއްބެވި މެމްބަރުންގެ ތެރެއިން ނައިބު ރައީސް މުހައްމަދު ޒާހިދު ފިޔަވައި ދެން ތިއްބެވި މެމްބަރުން އެޗްއާރްސީއެމް އަށް އައްޔަނުކުރެވުނީ 2015 ވަނަ އަހަރު އެވެ. ޒާހިދު އެ ކޮމިޝަނަށް އައްޔަނުކުރެވުނީ 2017 ވަނަ އަހަރު އެވެ.
އެޗްއާރްސީއެމްގެ މެމްބަރުން ވަކިކުރަން ހުށައަޅާފައިވާއިރު، އެ ކޮމިޝަނަށް ގާނޫނުން މަތިކުރެވިފައިވާ ޒިންމާ އަދާނުކުރާ ކަމަށް ރައްޔިތުންގެ މަޖިލީހުގެ ގިނަ މެމްބަރުންތަކެއް ވަނީ ވިދާޅުވެފަ އެވެ. ހާއްސަކޮށް ޖަލުތަކުގެ އޮޑިޓް ރިޕޯޓާއި ގުޅިގެން ބޭއްވި މަޖިލިސް ބަހުސްގައި، ރައްޔިތުންގެ މަޖިލީހުގެ އަގުލަބިއްޔަތު އޮންނަ އެމްޑީޕީގެ މެމްބަރުން ވަނީ، މިކަން ފާހަގަކުރައްވާ، ކޮމިޝަނުގެ މެމްބަރުން ވަކިކުރުމަށް ގޮވާލައްވާފަ އެވެ.
