ކޮވިޑް-19އާ ގުޅިގެން މިމަހުގެ 28 ވަނަ ދުވަހުގެ ނިޔަލަށް ސަރުކާރުގެ އޮފީސް ބަންދުކުރި ނަމަވެސް ވެކްސިން ދިނުމުގެ ޚިދުމަތް ދޭނެ ކަމަށް ދަމަނަވެށިން ބުނެފިއެވެ.
ދަމަނަވެށިން ބުނީ މެއި މަހުގެ 17 ވަނަ ދުވަހުން ފެށިގެން މެއި މަހުގެ 28 ވަނަ ދުވަހުގެ ނިޔަލަށް ސަރުކާރުގެ އޮފީސްތައް ނުހުޅުވާ ގޮތަށް ހަމަޖައްސާފައި ވީނަމަވެސް ދަމަނަވެށީގެ ޚިދުމަތްތައް މެދުކަނޑާލުމަށް ނިންމި ނިންމުން ބާޠިލު ކޮށްފައިވާ ކަމަށެވެ.
އެގޮތުން، މިމަހުގެ 17ން 23ގެ ނިޔަލަށް ދޫކޮށްފައިވާ އެޕޮއިންޓްމަންޓް ތަކަށް ވެކްސިން ދިނުމުގެ އިންތިޒާމު ހަމަޖައްސާފައިވާ ކަމަށެވެ.
ދަމަނަ ވެށިން ބުނީ މިމަހުގެ 22ން ފެށިގެން 30ށް ސަރުކާރު ރަސްމީކޮށް ބަންދުކޮށްފައި ވާތީ، މި މުއްދަތުގައި ދަމަނަ ވެށިންވެސް ޚިދުމަތް ނުދޭނެ ކަމަށެވެ. ނަމަވެސް، އެ މުއްދަތުގައި ވެސް ވެކްސިން ޖަހަން އެޕޮއިންޓްމަންޓް ހައްދަން ބޭނުންވާ ފަރާތްތަކަށް އެ ފުރުޞަތު ހުޅުވާލާފައިވާ ކަމަށެވެ.
އެޕޮއިންޓްމަންޓް ހެއްދުމަށް ހުކުރު، ހޮނިހިރު އަދި އީދު ދުވަސް ފިޔަވައި އެހެން ކޮންމެ ދުވަހަކު ހެނދުނު 10:00ން މެންދުރު 1:00ށް 3322403 ނަންބަރަށް ގުޅާލުމުން އެޕޮއިންޓްމަންޓް ހަމަޖައްސައި ދޭނެކަަމަށް ދަމަނަ ވެށިން ބުނެއެވެ.
