މުވައްޒަފުން ވަކިކުރި ކުންފުނިތަކަށް ޝަރުތުތަކާއެކު ލޯނު ހޯދަން އިތުރު ފުރުސަތެއް
16 މެއި 2020 | ހޮނިހިރު 11:27ބޭނުމަކީ ވަޒީފާއިން ވަކިކުރި ފަރާތްތަކަށް އަނބުރާ ވަޒީފާ ލިބި، ވަޒީފާ ނެތިފައިތިބި މީހުން މަދުކުރުން
ފިނޭންސް މިނިސްޓަރ އިބްރާހީމް އަމީރު: މުވައްޒަފުން ވަޒީފާއިން ވަކިކުރި ކުންފުނިތަކަށް ވެސް ލޯނަށް އެދެވޭނެ ފުރުސަތު ލިބޭނެ އުސޫލެއް ގާއިމު ކޮށްފައިވާ ކަމަށް ވިދާޅުވި
ކޮވިޑް-19 ބަލިމަޑުކަމާއި ގުޅިގެން ބައެއް ކުންފުނިތަކުން ވަޒީފާއިން މީހުން ވަކިކޮށް، ނުވަތަ މުސާރަ އުނިކޮށް ނުވަތަ މުސާރަ ނުހިނގާ ގޮތައް ޗުއްޓީއަށް ދާން މަޖުބޫރު ކުރި ކުންފުނިތަކަށް ވެސް އެހީތެރިވުމުގެ ގޮތުން ސަރުކާރުން ދޫކުރާ ލޯނަށް އެދި ހުށަހެޅުމުގެ ފުރުސަތު ލިބިގެންދާނެ ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެ އެވެ.
ހޮނިހިރު ދުވަހު ނޭޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރ އިބްރާހީމް އަމީރު ވިދާޅުވީ، ކޮވިޑް-19 އާ ގުޅިގެން ރާއްޖޭގެ އިގްތިޞާދަށްވެސް ވަރަށް ބޮޑަށް ނުރަނގަޅު އަސަރުތަކެއްކޮށް، ގިނަ ބައެެއްގެ ވަޒީފާތަކަށް އަސަރުކޮށްފައިވާ ކަމަށެވެ. އެހެންނަމަވެސް ސަރުކާރުން ބާރު އަޅަނީ ވަޒީފާތަކުން މުވައްޒަފުން ވަކި ނުކުރުމަށް ކަމަށް މިނިސްޓަރު ވިދާޅުވި އެވެ.
އެގޮތުން، ވަޒީފާތަކުން މުވައްޒަފުން ވަކި ނުކުރާ އަމިއްލަ ވިޔަފާރިތަކަށް ސްޓިމިއުލަސް ޕެކޭޖްގެ ދަށުން ލޯނު ދޫކުރާނެ ކަމަށް ސަރުކާރުން ވަނީ މީގެކުރިން ހާމަކޮށްފަ އެވެ.
ފިނޭންސް މިނިސްޓަރ އަމީރު ވިދާޅުވީ، ލޯނަށް އެެދި ހުޅުވާލި ފުރުސަތުގައި ވަޒީފާއިން މުވައްޒަފުން ވަކިކޮށް، މުސާރަ އުނިކޮށް ނުވަތަ މުސާރަ ނުހިނގާ ގޮތައް ޗުއްޓީއަށް ދާން މަޖުބޫރު ކުރި ބައެއް ކުންފުނިތަކުގެ ލޯން އެޕްލިކޭޝަންތައް ކުރިން 'ރިޖެކްޓް' ކުރަމުން އައި ނަމަވެސް އެފަރާތްތަކަށްވެސް މިހާރު އިތުރު ފުރުސަތެއް ހުޅުވާލަން ނިންމާފައިވާ ކަމަށެވެ.
އެގޮތުން، ވަޒީފާއިން މުވައްޒަފުން ވަކިކުރި، ނުވަތަ މުސާރަ ނުހިނގާ ގޮތައް ޗުއްޓީއަށް ދާން މަޖުބޫރު ކުރި ކުންފުނިތަކުން، ވަޒީފާއިން ވަކިކޮށްފައިވާ މުވައްޒަފުން އަލުން އަނބުރާ ވަޒީފާ ދިނުމާއި، އަދި މަދުވެގެން 5000ރ އެފަރާތްތަކުގެ މުސާރައަށް ދޭން އެއްބަސްވާ ކުންފުނިތަކަށް ލޯނަށް އެދުމުގެ ފުރުސަތު ލިބިގެންދާނެ ގޮތަށް މިހާރު ހަމަޖައްސާފައިވާ ކަމަށް މިނިސްޓަރު އަމީރު ވިދާޅުވި އެވެ. މިނިސްޓަރު އަމީރު ވިދާޅުވީ، މިކަމާ ގުޅޭ ފިނޭންސް މިނިސްޓްރީގެ ސަރކިއުލަރ މިއަދު އާންމު ކުރައްވާނެ ކަމަށެވެ.
ކޮވިޑް-19 އާ ގުޅިގެން ވަޒީފާއިން ވަކިކުރި ފަރާތްތަކަށް ސަރުކާރުން ވަނީ 5،000ރ ދޭން ނިންމާފަ އެވެ. އަދި ވިޔަފާރިތަކުންނާއި އަމިއްލަ މަސައްކަތުން އާމްދަނީ ހޯދަމުންދިޔަ ފަރާތްތަކުގެ ތެރެއިން އާމްދަނީ ދަށްވެފައިވާ ފަރާތްތަކަށްވެސް ސަރުކާރުން ވަނީ ލޯނަށް އެެދުމުގެ ފުރުސަތު ހުޅުވާލާފަ އެވެ.
