ނ. މަނަދޫއިން ކޮވިޑް-19އަށް ޕޮޒިޓިވްވި 9 މީހުން އެއަތޮޅު އިރުފުއްޓަށް ބަދަލު ކުރުމަށް ނިންމާފައި ވާކަމަށް ނ މަނަދޫ ކައުންސިލުން ބުނެފި އެވެ.

ހުކުރު ދުވަހުގެރޭ ރާއްޖެޓީވީގެ ކޮވިޑް-19 ކަވަރޭޖަށް ދެއްވި ޚާއްސަ އިންޓަރވިއުއެއްގައި ނ. މަނަދޫ ކައުންސިލްގެ ރައީސް މުހައްމަދު އުމަރު ވިދާޅުވީ، އެރަށުން ނެގި 34 ސާމްޕަލްގެ ތެރެއިން 9 ސާމްޕަލްއެއް ޕޮޒިޓިވްވެފައިވާ ކަމަށާއި، އެ މީހުންނަކީ އެ ރަށުން އެންމެ ފުރަތަމަ ޕޮޒިޓިވްވި އަންހެން މީހާއައި ކޮންޓެކްޓްވި މީހުން ކަމަށެވެ.

އޭގެ އިތުރުން، ޕޮޒިޓިވްވި މީހުން އެކަހެރިކޮށް އެ މީހުން ކަރަންޓީނަށް ގެންދިޔުމުގެ މަސައްކަތް ކުރަމުންދާ ކަމަށާއި، ހޮނިހިރު ދުވަހުގެ ވަގުތެއްގައި އެމީހުން އެ އަތޮޅު އިރުފުއްޓަށް ބަދަލު ކުރުމަށް ނިންމާފައިވާކަމަށް އޭނާ ވިދާޅުވި އެވެ. އަދި މިވަގުތު ކުރިއަށްދަނީ އެމީހުން ރަށުގައި އައިސޮލޭޓް ކުރުމުގެ މަސައްކަތްކަން ފާހަގަ ކުރައްވައި އޭނާ ވިދާޅުވީ، ރަށުގެ ގެސްޓުހައުސްތަކާއި، އަތޮޅުގޭގެ ކޮޓަރިތައް އެކަމަށް ބޭނުންކުރަމުންދާ ކަމަށެވެ.

އުމަރު ވިދާޅުވީ، އެ މަސައްކަތުގެ ތެރެއިން ހުކުރު ދުވަހުގެ ވަގުތެއްގައި މަނަދޫއަށް ވިއްސާރަވެ މުޅި ރަށުން ކަރަންޓު ދިއުމާއެކު، އެ މަސައްކަތްތަކުގައި ދަތިތަކެއް ދިމާވި ކަމަށެވެ. އަދި އެކަމުގެ ސަބަބުން މީހުން ބަދަލު ކުރުމުގެ މަސައްކަތް ލަސްވެގެންދިޔަކަން ފާހަގަކުރައްވައި އޭނާ ވިދާޅުވީ، ކަރަންޓު ލިބިފައިހުރި މަގުތަކުގައި ހުރި ގޭގޭއަށް މީހުން ބަދަލު ކުރުމުގެ މަސައްކަތްވެސް ކުރަމުންދާ ކަމަށެވެ.

އެކަމާ ގުޅޭގޮތުން ރާއްޖެޓީވީގެ ކަވަރޭޖްގައި ވާހަކަ ދައްކަވަމުން ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދު މުޙައްމަދު ވިދާޅުވީ، އެ މައްސަލަ ހައްލު ކުރުމުގެ މަސައްކަތް މިހާރު ކުރަމުންދާ ކަމަށާއި، މަނަދޫގައި ދިމާވި މައްސަލައަކީ ކުއްލި ގޮތަކަށް ދިމާވި މައްސަލައެއް ކަމަށެވެ. އެގޮތުން އިންޖީނުގޭގެ ކެޕޭސިޓީގެ މައްސަލައެއް ނެތް ކަމަށާއި، ރަށުގައި އާދަޔާ ޚިލާފަށް ފެންބޮޑުވުމުގެ ސަބަބުން ކޭބަލްތަކަށް ފެން ވަދެފައިވާކަން ފާހަގަކުރައްވައި ސައީދު ވިދާޅުވީ، މިވަގުތުވެސް ކެނޑިނޭޅި މަސައްކަތް ކުރަމުންދަނީ އެ މައްސަލަތައް ހައްލު ކުރުމަށް ކަމަށެވެ.

މަނަދޫއިން އިތުރު ބަޔަކު ޕޮޒިޓިވްވެ ކޮމިއުނިޓީ ސްޕްރެޑެއް ފެނިފައިވާއިރު، މިވަގުތު ރަށުގެ ރައްޔިތުންވެސް ތިބީ ބޮޑު ކަންބޮޑުވުމެއްގައި ކަން ފާހަގަ ކުރައްވައި ކައުންސިލްގެ ރައީސް އުމަރު އިތުރަށް ވިދާޅުވީ، މިވަގުތުވެސް ކޭސްތަކާ ގުޅިގެން ކޮންޓެކްޓް ޓްރޭސިންގ ގެ މަސައްކަތް ކުރަމުންދާ ކަމަށެވެ. އަދި މިވަގުތު ރައްޔިތުން ބޭރަށް ނުކުތުންވެސް މަނާ ކޮށްފައިވާކަމަށާއި، ރައްޔިތުންނަށް ބޭނުންވާ ޚިދުމަތްތައް ފޯރުކޮށްދިނުމުގެ މަސައްކަތް ޓާސްކްފޯހުން ކުރަމުންދާކަމަށް އޭނާ ވިދާޅުވި އެވެ.