ކޮވިޑް-19އާ ދެކޮޅަށް ކުރާ މަސައްކަތުގައި ރާއްޖެއަށް ގޮންޖެހުން ކުރިމަތިވޭ: އަމީން
15 މެއި 2020 | ހުކުރު 09:20ކޮމަންވެލްތް ގައުމުތަކުން ގުޅިގެން މަސައްކަތް ކުރުން މުހިންމު
ވަރޗުއަލްކޮށް ބޭއްވި މިބައްދަލުވުމުގައި ހެލްތް މިނިސްޓަރު އަބްދުﷲ އަމީން ރާއްޖޭގެ ހާލަތު ބަޔާންކޮށްދެއްވާފައި
ކޮވިޑް-19އާ ދެކޮޅަށް ކުރަމުންދާ މަސައްކަތުގައި ރާއްޖޭގެ ރަށްތައް ބެހިފައި ހުންނަ ގޮތުން ތަފާތު ގިނަ ގޮންޖެހުންތައް ކުރިމަތިވާ ކަމަށް ހެލްތު މިނިސްޓަރު އަބްދުﷲ އަމީން ވިދާޅުވެއްޖެއެވެ.
މިނިސްޓަރު އަމީން މިހެން ވިދާޅުވީ ކޮމަންވެލްތުގެ މެންބަރު ޤައުމުތަކުގެ ހެލްތު މިނިސްޓަރުންގެ ވާރޗުއަލް ބައްދަލުވުމުގައި ވާހަކަދައްކަވަމުންނެވެ.
މިއަހަރުގެ ބައްދަލުވުމުގައި ހެލްތު މިނިސްޓަރު އަމީން ރާއްޖޭގެ ހާލަތު ބަޔާންކޮށް ދެއްވައި ރާއްޖެއަށް ކުރިމަތިވެފައިވާ ގޮންޖެހުންތަކުގެ މައްޗަށް އަލިއަޅުވާލާ ވާހަކަ ދެއްކެވިއެވެ. އަދި ކޮމަންވެލްތު މެންބަރު ގައުމުތަކުން ގުޅިގެން ކޮވިޑް-19ށް ހައްލެއް ހޯދުމަށް މަސައްކަތް ކުރުމުގެ މުހިންމުކަން ވެސް މިނިސްޓަރު ވަނީ ފާހަގަ ކުރައްވާފަ އެވެ.
މިނިސްޓަރު އަމީން ވިދާޅުވީ ރާއްޖޭގެ އާބާދީގައި ނިސްބަތުން މީހުން މަދު ނަމަވެސް ރަށްތަށް ބެހިފައި ހުންނަގޮތުން ތަފާތު ގޮންޖެހުންތަކެއް ދިމާވާ ކަމަށާއި، ރާއްޖޭއިން މިކަމަށް ހައްލު ހޯދުމަށް އެހެން ގައުމުތަކާއެކު މަސައްކަތްކުރަން ތައްޔާރަށް އޮތް ކަމަށެވެ.
މިބައްދަލުވުމުގައި ކޮމަންވެލްތުގެ ސެކެޓްރީ ޖެނެރަލް ޕެޓްރީޝިއާ ސްކޮޓްލަންޑް ވިދާޅުވީ މިވަގުތަކީ ހުރިހާ ގައުމުތަކުން ވެސް އެކަތިގަނޑެއްގެ ގޮތުގައި މަސައްކަތް ކުރަން ޖެހިފައިވާ ދަނޑިވަޅެއް ކަމަށެވެ. އަދި ވިދާޅުވީ މިދަނޑިވަޅަކީ، ގައުމުތަކުގެ މެދުގައި ގުޅުން ހަރުދަނާކުރުމަށް ބާރުއަޅަންޖެހޭ ވަގުތެއް ކަމަށެވެ. ހަމައެހެންމެ، ގައުމުތަކުގެ އެތެރޭގެ ޚިޔާލު ތަފާތުވުންތައް ނައްތާލައި އެއްބައެއްގެ ގޮތުގައި މަސައްކަތްކުރަން ޖެހިފައިވާ ވަގުތެއްކަން ފާހަގަކުރެއްވިއެވެ. އެ ކަމަނާގެ ވާހަކަފުޅުގައި، އިސް ސަފުގައި މަސައްކަތް ކުރައްވާ ފަރާތްތަކަށް ޝުކުރުއަދާ ކުރައްވައި ޒިންމާ އުފުލުމުގެ ތެރޭގައި މި ދުނިޔެއާއި ވަކިވެގެން ދިޔަ ފަރާތްތަކުގެ ހަނދާނުގައި 1 މިނެޓުގެ ސުކޫތެއް ގެނެވުނެވެ.
މިބައްދަލުވުމުގައި ދުނިޔޭގެ ޞިއްޙަތު ޖަމްޢިއްޔާ (ޑަބްލިޔު.އެޗް.އޯ) ގެ ޑިރެކްޓަރ ޖެނެރަލް ޑރ. ޓެޑްރޯސް އެދަނޯމް ގެބްރިއޭސަސް ބައިވެރިވެ ވަޑައިގެންނެވިއެވެ. ބައްދަލުވުމުގައި އެމަނިކުފާނު ދެއްކެވި ވާހައިގައި، 'ޕްރައިމަރީ ހެލްތު ކެއަރ' އަށް ގައުމުތަކުން ދޭ އަހަމިއްޔަތު މިހާރަށްވުރެ ބޮޑަށް ހަރުދަނާ ކުރަންޖެހޭ ކަމަށް ވިދާޅުވިއެވެ. އަދި ގައުމުތަކުން އާންމު ސިއްހަތުގެ ރޮނގުން ހޯދާފައިވާ ކުރިއެރުންތަށް ދެމެހެއްޓޭނޭ ގޮތަށް ކަންކަން ބައްޓަންކޮށް، އެ ކަންކަމަށް ސަމާލުވުމަށް އިލްތިމާސް ކުރެއްވިއެވެ.
ދެގަޑި އިރެއްހާއިރަށް ކުރިއަށްދިޔަ މިބައްދަލުވުން ނިމިގެން ދިޔައީ، ގައުމުތަކުގެ ހެލްތު މިނިސްޓަރުން އެއްބަސްވާ އެއްބަސްވުމެއް ހުށަހަޅާފައެވެ. މިއެއްބަސްވުމުގައި ކޮވިޑް-19އާ ގުޅިގެން ގައުމުތަކުން ކުރަމުންދާ މަސައްކަތާ ބެހޭ މަޢުލޫމާތު ބަދަލުކުރުމާއި، ކޮވިޑް-19އާއި ގުޅިގެން ނާޒުކު ޙާލަތްތައް މެދުވެރި ވެފައިވާ ފަރާތްތަކައް އިތުރު އަޅާލުން ފޯރުކޮށްދިނުމާއި، އުމުރުން ދުވަސްވީ މީހުންނާއި، ދިގުމުއްދަތަކަށް ބޭސް ފަރުވާ ކުރަމުންދާ އެކިއެކި ފަރާތްތަކަށް އިތުރު ސަލާމުކަމެއް ދިނުމުގެ މައްޗަށް އަލިއަޅުވާލާފައި ވެއެވެ.
ޑަބްލިއުއެޗްއޯ އިން ކޮވިޑް-19ގައި ފޯރުކޮށް ދެމުން ގެންދާ ފަންނީ އެހީތެރިކަން ފާހަގަކޮށް، އެކި ދާއިރާތަކުން އެއް މިސްރާބަކަށް މަސައްކަތް ކުރުމުގެ މުހިއްކަން ފާހަގަކޮށް، ގައުމުތަކަށް ބޭނުންވާ ބޭހާއި ސިއްހީ އާލާތްތައް ފޯރުކޮށްދެވޭނެގޮތަށް ކަންކަން މަގުފަހިކޮށްދިނުމަށް ހުށަހަޅާފައި ވެއެވެ.
މިބައްދަލުވުމުމަކީ، ރާއްޖެ އަލުން ކޮމަންވެލްތާއި ގުޅުމަށް ފަހު ރާއްޖެއިން ބައިވެރިވި ފުރަތަމަ ބައްދަލުވުމެވެ. އަދި މިބައްދަލުވުމަކީ ކޮމަންވެލްތުގެ ހެލްތު މިނިސްޓަރުން ފުރަތަމަ ފަހަރަށް ވާރޗުއަލްކޮށް ބޭއްވި ބައްދަލުވުން ވެސް މެއެވެ. ބުރާސްފަތި ދުވަހު ބޭއްވި މިބައްދަލުވުމުގައި ކޮމަންވެލްތުގެ މެންބަރު 57 ގައުމުތަކުގެ ތެރެއިން 27 ގައުމެއްގެ ހެލްތު މިނިސްޓަރުން ބައިވެރިވެ ވަޑައިގެންނެވި އެވެ.
އާންމުގޮތެއްގައި ކޮމަންވެލްތު ހެލްތު މިނިސްޓަރުންގެ ބައްދަލުވުމަކީ ކޮންމެ އަހަރަކުވެސް ބާއްވާ ވަރލްޑް ހެލްތު އެސެމްބްލީގެ ކުރިން ޖެނީވާގައި ބާއްވާ ބައްދަލުވުމެކެވެ. ނަމަވެސް ކޮވިޑް-19އާ ގުޅިގެން މިފަހަރު މި ބައްދަލުވުމުގައި ގައުމުތަކުން ބައިވެރިވެ ވަޑައިގެންނެވީ އެބޭފުޅެއްގެ އަމިއްލަ ގައުމުން ވާރޗުއަލްކޮށެވެ.
ކޮމަންވެލްތު ހެލްތު މިނިސްޓަރުންގެ ބައްދަލުވުމުގައި ރާއްޖެއިން އެންމެ ފަހުން ބައިވެރިވެވީ 2016 ވަނަ އަހަރު ސްވިޓްޒަރލޭންޑުގެ ޖެނީވާގައި ބޭއްވި ބައްދަލުވުމުގަ އެވެ.
