''ކޮވިޑް-19 ސީޒަނަލް ބައްޔަކަށްވުން އެކަށީގެންވޭ''
15 މެއި 2020 | ހުކުރު 06:48އެންޑެމިކް ރޯގާތަކަކީ ދުނިޔޭގެ އެކި ސަރަހައްދުތަކުން ދޭތެރެ ދޭތެރެއިން ފެންނަ ރޯގާ
ޑރ. އިބްރާހިމް އަފްޒަލް: ހާއްސަވެގެން ހުންނެވީ ގައިންގަޔަށް އަރާ ބަލިތަކުގެ ދާއިރާއިން
ދުނިޔޭގެ ގައުމުތަކުގައި ހުއްޓުމެއް ނެތި، ހަލުވިކަމާއި އެކު ފެތުރެމުންދާ ކޮވިޑް-19 އަކީ މޫސުމީ ރޯގާ އަކަށް ވުން އެކަށީގެންވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފި އެވެ.
މިހެން ވިދާޅުވީ އެޗްޕީއޭ ގެ އެޕިޑަމޮލޮޖިސްޓް ޑރ. އިބްރާހިމް އަފްޒަލް އެވެ. އިތުރަށް ތަފްސީލުކޮށްދެއްވަމުން ޑރ. އަފްޒަލް ވިދާޅުވި ގޮތުގައި، ބަލީގެ ގޮތް ނޭނގޭހާ ދުވަހު، މި ބައްޔަކީ ވެސް މޫސުމީ ބައްޔަކަށްވުން އެކަަށީގެންވާ ބައްޔެކެވެ.
މޫސުމީ ރޯގާއަކަށް ވުމުގެ ފުރުސަތު އެބައޮތް ކަމަށް ޑރ. އަފްޒަލް ވިދާޅުވި ބަހަށް އިތުރަށް ބާރު ދިނުމުގެ ގޮތުން މިސާލު ނެންގެވީ މީގެ ކުރިން ދުނިޔެ ތަހައްމަލުކޮށްފައިވާ ބައެއް ވަބާތަކުންނެވެ. އެގޮތުން އެޗް1އެން1 (ސްވައިން ފްލޫ) ފަދަ "އެންޑެމިކް" ރޯގާތަކަކީ މިކަމުގެ ހެއްކެއް ކަމަށް ވިދާޅުވި އެވެ.
އެންޑެމިކް ރޯގާތަކަކީ، ވަކި ސަރަހައްދުތަކެއްގައި އަބަދުވެސް ދޭތެރެ ދޭތެރެއިން ފެންނަ ރޯގާތަކާއި ބަލިތަކެވެ. މިފަދަ ރޯގާތައް "ޕެންޑެމިކް" ނުވަތަ އާލަމީ ވަބާއެއްގެ ގޮތުގައި ކަނޑައެޅެނީ ދުނިޔޭގެ އެހެން ސަރަހައްދުތަކަށް ރޯގާ ފެތުރިގަތުމުންނެވެ.
ސައިންސް ދިރާސާތަކުން ދައްކާގޮތުގައި، ކޮވިޑް-19 މޫސުމީ ރޯގާ އަކަށް ވުމުގެ ފުރުސަތު ބޮޑެވެ. ނަމަވެސް، މިކަން ކަށަވަރު ކުރެވޭނީ ވައިރަސް ޖެހި، ބަލި ފަސޭހަވެފައިވާ މީހުންގެ ދީފާއީ ނިޒާމުގައި އެންޓިބޮޑީޒް ހުރި ވަރު ދެނެގަންނަން ކުރާ އިތުރު ދިރާސާތަކަށް (ސީރޮލޮޖީ ޓެސްޓްތައް) ފަހު އެވެ.
