ބިދޭސީން ބަދަލު ކޮށްފައިވާ ސައިޓްތަކުން 500ށް ވުރެ ގިނަ ސާމްޕަލް ނަގާފައިވޭ

މާލޭގައި ތޮއްޖެހިގެން ދިރިއުޅެމުންދާ ބިދޭސީން އެއަށްވުރެ ރަނގަޅު ތަންތަނަށް ބަދަލުކުރުމަށް ސަރުކާރުން ފަށާފައިވާ މަސައްކަތުގައި އެމީހުން ބަދަލުކޮށްފައިވާ ސައިޓްތަކުން މިހާތަނަށް އައިއިރު 500 ށް ވުރެ ގިނަ ސާމްޕަލް ނަގާފައިވާ ކަމަށް ކޮވިޑް-19 ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.

ބުރާސްފަތި ދުވަހުގެ ރޭ ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ މާލޭގައި ތޮއްޖެހިގެން ބިދޭސީން ދިރިއުޅެމުންދިޔަ 33 ތަނެއްގައި ތިބި މީހުންގެ ސާމްޕަލްތައް މިހާރު ނަގާފައިވާ ކަމަށެވެ. އަދި އެތަންތަނުން ކަރަންޓީނު ފެސިލިޓީތަކަށް އަދި އައިސޮލޭޝަނަށް ގެންދަންޖެހޭ މީހުން މިހާރު ގެންދެވިފައިވާ ކަމަށް މަބްރޫކް ވިދާޅުވި އެވެ.

Advertisement

ރާއްޖޭގައި މިހާތަނަށް އައިއިރު ކޮވިޑް-19 އަށް 982 މީހުން ޕޮޒިޓިވް ވެފައިވާއިރު މީގެތެރޭގައި ގިނައީ ބަންގްލަދޭޝް މީހުންނެވެ. ކޮވިޑް-19 އަށް ރާއްޖޭގައި ޕޮޒިޓިވްވެފައިވާ ބަންގްލަދޭޝް މީހުންގެ އަދަދު 500 ށް ވުރެ މައްޗަށް އަރައެވެ. މީގެތެރޭގައި ގިނައީ ތޮއްޖެހިގެން މާލެ ސަރަހައްދުގައި ދިރިއުޅެމުންދާ މީހުންނެވެ.

މިހާތަނަށް ސަރުކާރުގެ ކަމާބެހޭ ފަރާތްތަކުން ހާމަކޮށްފައިވާ އަދަދުތަކަށް ބަލާއިރު މާލެ ސަރަހައްދުގައި ތޮއްޖެހިގެން ބިދޭސީން ދިރިއުޅެމުންދިޔަ 307 ތަނެއް މިހާތަނަށް އައިއިރު ފާހަގަވެފައިވާ ކަމަށް މާލެ ސިޓީގެ ޑެޕިޔުޓީ މޭޔަރ ޝަމާޢު ޝަރީފް ވަނީ ވިދާޅުވެފަ އެވެ. ޝަމާއު ވިދާޅުވީ ކޮވިޑް-19 އައުމުގެ ކުރިންވެސް ބިދޭސީން މާލޭގައި ތޮއްޖެހިގެން އުޅޭ ތަންތަން ބެލުމުގެ ސަރވޭ އެއް ކުރިޔަށް ގެންދިޔަކަމަށެވެ.

އެގޮތުން ފާހަގަވި އެފަދަ 307 ތަނެއްގެ މައުލޫމާތު ފުލުހުންނާއި ހިއްސާކޮށްގެން އެކަމުގެ އިންތިޒާމުތައް ހަމަޖެހި ގިނަ މީހުން މާލެއިން ބޭރަށް ކަރަންޓީނު ފެސިލިޓީތަކަށް ފޮނުވާލެވިފައިވާ ކަމަށް ޝަމާޢު ވިދާޅުވި އެވެ. އަދި އިތުރު ތަންތަން ދެނެގަތުމުގެ މަސައްކަތްވެސް ކުރަމުންދާ ކަމަށް ޝަމާޢު ވިދާޅުވި އެވެ.

ކަރަންޓީނު ފެސިލިޓީތަކަށް ބަދަލު ކުރެވިފައިވާ ބިދޭސީންގެ އަދަދުތަކާއި ގުޅޭގޮތުން އެންމެ ފަހުން މަބްރޫކް ވިދާޅުވެފައިވަނީ ބިދޭސީ ކަރަންޓީން ފެސިލިޓީތަކުގައި 612 މީހަކު ތިބިކަމަށެވެ. އަދި މީގެ ތެރެއިން 475 މީހުންނަކީ ތޮއްޖެހިގެން އުޅޭ ތަންތަނުން އައިސޮލޭޝަނަށް ގެންދެވޭ މީހުން ކަމަށް ކޮވިޑް-19 ޓާސްކް ފޯސްގެ ތަރުޖަމާނު މަބްރޫކް ޢަޒީޒް ވަނީ ވިދާޅުވެފަ އެވެ.

މީގެ އިތުރުން މާލޭގައި އުޅޭނެ ތަނެއް ނެތި، ވަކި ވަޒީފާއެއް އަދާ ނުކުރާ މީހުން އެހެން ތަނަކަށް ބަދަލުކުރުމަށް އެޗްޕީއޭއިން ކުރަމުންދާ މަސައްކަތުގެ ތެރެއިން 566 ބިދޭސީއަކު އެފަދަ އެކޮމަޑޭޝަން ތަކަށް ބަދަލު ކުރެވިފައިވާކަމަށްވެސް މަބްރޫކް ވިދާޅުވެފައި ވެއެވެ.

މި މަހުގެ ހަތަރު ވަނަ ދުވަހު ގައުމާ މުހާތަބުކުރައްވާ ދެއްވި ހިތޯބުގައި ރައީސް އިބްރާހިމް މުހައްމަދު ސޯލިހު ވިދާޅުވީ، ބަންގްލަދޭޝްގެ 1500 މީހަކު ފޮނުވާލުމަށް ހަމަޖެހިފައިވާ ކަމަށެވެ. ރައީސް ސޯލިހުގެ ހިތާބުގައި އެމަނިކުފާނު ވިދާޅުވެފައިވަނީ ބަލި ފެތުރުން ކޮންޓްރޯލް ކުރުމުގައި، ކުރިމަތިވާ އެންމެ ބޮޑު ދައްޗަކީ ބިދޭސީން ކަމަށެވެ.