އިތުރު 14 މީހުން ޕޮޒިޓިވްވެ، ބަލި ޖެހުނު ޖުމްލަ މީހުންގެ އަދަދު 982ށް އަރައިފި
14 މެއި 2020 | ބުރާސްފަތި 17:23ޕޮޒިޓިވްވި މީހުންގެ މައުލޫމާތު އަދި ހާމައެއް ނުކުރޭ
ކޮވިޑް-19 އަށް ރެންޑަމް ސާމްޕަލް ނެގުމުގެ ތެރެއިން މާލޭ ބާޒާރު މަތީގައި މީހެއްގެ ނޭފަތުން ސާމްޕަލް ނަގަނީ
އިތުރު 14 މީހުން މިއަދު ކޮވިޑް-19 އަށް ޕޮޒިޓިވްވެއްޖެ އެވެ.
ނެޝަނަލް އެމަރޖެންސީ އޮޕަރޭޝަން ސެންޓަރުގައި ބުރާސްފަތި ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ސެންޓަރުގެ ތަރުޖަމާނު މަބްރޫކް އަޒީޒު ވިދާޅުވީ ބުރާސްފަތި ދުވަހު އިތުރު 14 މީހަކު ޕޮޒިޓިވްވެފައިވާ ކަމަށެވެ. މިއާއެކު ރާއްޖޭގައި ޕޮޒިޓިވްވި މީހުންގެ ޖުމްލަ އަދަދަކީ 982 އެވެ.
އެންމެ ފަހުން ޕޮޒިޓިވްވި މީހުންގެ ތަފްސީލެއް އަަދި ހާމަ ކޮށްފައި ނުވެ އެވެ. އަދި އިތުރު 6 މީހަކު ބަލިން ރަނގަޅުވެފައިވާ ކަމަށް މަބްރޫކް ވަނީ ވިދާޅުވެފަ އެވެ. އަދި މިއީ ހުސް ދިވެހިން ކަމަށް މަބްރޫކް ވިދާޅުވި އެވެ.
ބުރާސްފަތި ދުވަހު އިތުރު 13 މީހަކު ޕޮޒިޓިވްވި ކަމަށް މެންދުރުގެ ވަގުތެއްގައި އެޗްޕީއޭއިން އިއުލާން ކުރި އެވެ. ނަމަވެސް މި 13 ކޭސްއަކީ ބުދަ ދުވަހު ޕޮޒިޓިވްވި މީހުންނެވެ. މި މީހުންގެ ތެރޭގައި ހިމެނެނީ 8 ދިވެހިންނާއި ބަންގުލަދޭޝްގެ 5 މީހެކެވެ.
