ނިޝާން ކަލާފާނުގެ ޝަރަފުގެ ޢިއްޒަތް އަރުވާފައިވާ ހުސައިން އަބްދުﷲ އަވަހާރަވުމާއި ގުޅިގެން ރައީސް ތައުޒިޔާ ވިދާޅުވެއްޖެ

ނިޝާން ކަލާފާނުގެ ޝަރަފުގެ ޢިއްޒަތް ދައުލަތުން އަރުވާފައިވާ މަރޮށީ ޙުސައިން ޢަބްދުﷲ (މަރޮށީ ޙުސައިން ކަލޭފާނު) ރޭ ދެމިއޮތުމުގެ ޢާލަމަށް ދަތުރުކުރެއްވުމާ ގުޅިގެން، އެ ޢާއިލާގެ ބޭފުޅުންނަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ތަޢުޒިޔާ ވިދާޅުވެއްޖެއެވެ.

ރައީސް އޮފީހުން ބުނީ ރައީސުލްޖުމްހޫރިއްޔާ، އެ ޢާއިލާއާ ފޯނުން ގުޅުއްވައި ވާހަކަފުޅު ދައްކަވަމުން، ޙުސައިން ޢަބްދުﷲ އަވަހާރަވި ޚަބަރު އެއްސެވީ ވަރަށް ފުން ހިތާމައާ އެކުގައި ކަމަށް ވިދާޅުވިކަމަށެވެ. އަދި ރާއްޖޭގެ ވިޔަފާރީގެ ދާއިރާއަށާއި، އިޖުތިމާޢީ ޚިދުމަތުގެ ދާއިރާއަށް އަދި އެނޫން އެހެން ރޮނގުތަކުން އެމަނިކުފާނު ކޮށްދެއްވާފައިވާ ޚިދުމަތްތަކަކީ، އަބަދަށް ދެމިހުންނާނޭ މަންފާކުރަނިވި ޚިދުމަތްތަކެއްކަން ފާހަގަކުރެއްވި ކަމަށެވެ.

Advertisement

މި ލިބިވަޑައިގެންނެވި ފުން ހިތާމައިގައި ބައިވެރިވެވަޑައިގެން ޢާއިލާއަށް ވަރަށް އިޚްލާޞްތެރިކަމާއެކު ރައީސް ވަނީ ތަޢުޒިޔާ ވިދާޅުވެފައެވެ. އަދި މަރްޙޫމް ޙުސައިން ޢަބްދުﷲ ގެ ފުރާނައަށް މާތްﷲ ހެޔޮ ރަޙްމަތް ލައްވައި، ސުވަރުގޭގެ ދާއިމީ ނިޢުމަތް މިންވަރު ކުރެއްވުމަށާއި، ޢާއިލާއަށް ކެތްތެރިކަން ދެއްވުން އެދި މާތްﷲގެ ޙަޟްރަތުގައި ދުޢާ ދަންނަވާކަމަށްވެސް ވަނީ ވިދާޅުވެފައެވެ.

މަރޮށީ ޙުސައިން ޢަބްދުﷲ އަކީ، ޖަމާޢަތަށް ފައިދާހުރި ޚާއްޞަ ޚިދުމަތް ކުރެއްވުމުގެ ދާއިރާއާއި، ވިޔަފާރީގެ ދާއިރާގައި ވަރަށް ޚާއްޞަ ގޮތެއްގައި ފާހަގަކޮށްލެވޭ ބޭފުޅެކެވެ. މަރޮށީ ކަތީބުކަމުގައި ހުންނަވައިގެން، ރަށުގެ ތަރައްޤީއަށާއި، ރަށުގެ ރައްޔިތުންނަށް އަދި މުޅި އަތޮޅަށް ވަރަށް އިޚްލާޞްތެރި ޚިދްމަތްތަކެއް ކޮށްދެއްވި ބޭފުޅެކެވެ. އެމަނިކުފާނުގެ ހިތްޕުޅުގައި، މަރޮށީ ރައްޔިތުންނަށް ޚާއްޞަ ލޯތްބަކާއި ޤަދަރެއް އޮތް ބޭފުޅެކެވެ.

މަރޮށީ ޙުސައިން ކަލޭފާނަކީ، މަޝްހޫރު އެމް.އެޗް.އޭ.ގެ ބާނީއެވެ. ތަޢުލިމީ ދާއިރާއިންނާއި، ވިޔަފާރީގެ ދާއިރާއިންވެސް އެމަނިކުފާނު ވަނީ އުފަން ރަށް މަރޮށްޓަށް ގިނަގުނަ ހޭދަތަކެއް ކުރައްވާފައެވެ.

11 ނޮވެމްބަރ 1979 ގައި އެންމެ ތިން މުދައްރިސުންނާއެކު، [އަލްމަދްރަސަތުލް މުނައްވަރާ]ގެ ނަމުގައި އެމަނިކުފާނުގެ އަމިއްލަ ގޭގައި ރަށުގެ ދަރިންނަށާއި، އަތޮޅުގެ ދަރިންނަށް އެ ސްކޫލްގެ ހިޔާވަހިކަން ހިލޭ ސާބަހަށް ފޯރުއްވައިދެއްވަން ފެށްޓެވުން އެމަނިކުފާނުގެ ޚިދުމަތްތަކުގެ ތެރެއިން ޚާއްޞަ ގޮތެއްގައި ފާހަގަކޮށްލަން ޖެހެއެވެ. 27 އަހަރު ސްކޫލް ހިންގެވުމަށް ފަހު، ސްކޫލްގެ ޢިމާރާތްތައް ޒަމާނީ ފެންވަރަށް އަމިއްލަފުޅު ޚަރަދުގައި ބަދަލުކުރެއްވި އެވެ. އެމަނިކުފާނުގެ އަމިއްލަފުޅު ޚަރަދުގައި ރާއްޖެއިން ބޭރުގެ ޔުނިވަރސިޓީތަކުން ތަޢުލީމު ޙާޞިލުކުރުމުގެ ފުރުޞަތުވެސް ބައެއް ކުދިންނަށް ވަނީ ހޯއްދަވައިދެއްވާފަ އެވެ.

މަރޮށީ ޙުސައިން ކަލޭފާނަކީ، އިޖުތިމާޢީ، އިޤްތިޞާދީ އަދި ޢުމްރާނީ ތަރައްޤީގައިވެސް އެފަދަ ދެވަނައެއް ނުވާ ޚިދުމަތްތެރިއެ ކެވެ. އަތޮޅުގެ ގިނަ ރަށްތަކެއްގައި އެމަނިކުފާނުގެ އަމިއްލަފުޅު ޚަރަދުގައި މިސްކިތްތައް ބިނާކޮށްދެއްވާކަން ވެސް ފާހަގަކޮށްލަންޖެހެ އެވެ.

ޖަމާޢަތަށް ފައިދާހުރި ޚާއްޞަ ޚިދުމަތް ކުރެއްވުމުގެ ރޮނގުން 1992 ވަނަ އަހަރު މަރޮށީ ޙުސައިން ކަލޭފާނަށް ވަނީ ޢާންމު ޚިދްމަތުގެ ހިތްވަރު ދިނުމުގެ އިނާމު، ސަރުކާރުން އަރުވާފަ އެވެ. އަދި އޭގެ 13 އަހަރު ފަހުން، 2005 ވަނަ އަހަރު މިރޮނގުން ޝަރަފުވެރިކަމުގެ އިނާމުވެސް އެމަނިކުފާނަށް ވަނީ އަރުވާފަ އެވެ.

ނިޝާން ކަލާފާނުގެ ޝަރަފުގެ ޢިއްޒަތް (ނ.ކ.ޝ.ޢ) އެމަނިކުފާނަށް އަރުވާފައިވަނީ، 2011 ވަނަ އަހަރުގެ މިނިވަން ދުވަހު އެވެ.