މެއި 28ގެ ނިޔަލަށް ޖަމާޢަތުގައި ނަމާދު ނުކުރެވޭނެ
14 މެއި 2020 | ބުރާސްފަތި 11:05ޖަމާއަތުގައި ނަމާދު ކުރުމަށް ހުއްޓާލާފައިވަނީ ކޮވިޑް-19 ގެ ހާލަތު ގޯސްވުމުން
ލޮކްޑައުން އާއި ގުޅިގެން ބަންދުކޮށްފައިވާ މާލޭގެ މިސްކިތެއް
ކޮވިޑް-19 ގެ މިހާރު އޮތް ހާލަތާއި ގުޅިގެން, މިސްކިތުގައި ޖަމާއަތުގައި ނަމާދު ނުކުރާ ގޮތަށް ނިންމާފައި އޮތް އޮތުން އިތުރު 14 ދުވަހަށް ދިގުދަންމާލަން މިނިސްޓްރީ އޮފް އިސްލާމިކް އެފެއަރޒުން ނިންމައިފިއެވެ.
އެންމެ ފުރަތަމަ މިސްކިތްތަކުގައި ޖަމާޢަތުގައި ނަމާދުކުރުން ހުއްޓާލުމަށް އެންގި އިރު އިސްލާމިކް މިނިސްޓްރީން ބުނެފައިވަނީ މިގޮތަށް ނިންމީ ކޮވިޑް-19 ރާއްޖޭގައި ހަލުވިކަމާއެކު ފެތުރެމުންދާތީ، ޙާލަތަށް ރިޢާޔަތްކޮށް، ރާއްޖޭގައި އިތުރަށް ވައިރަސް ފެތުރުން ހުއްޓުވުމުގެ ގޮތުން އެޅި ރައްކާތެރިކަމުގެ މުހިންމު ފިޔަވަޅެއް ކަމަށެވެ. އަދި އެގޮތަށް ނިންމީ އިސްލާމީ ފަތުވާދޭ އެންމެ މަތީ މަޖިލީހާއި ދީނީ ޢިލްމުވެރިންގެ ލަފާގެ މަތިން ކަމަށް އިސްލާމިކް މިނިސްޓްރީން ބުނެފައި ވެއެވެ.
އަނެއްކާވެސް ޙާލަތު މުރާޖަޢާ ކުރުމަށް ފަހު 28 މެއި 2020 ވާ ބުރާސްފަތި ދުވަހުގެ އަޞްރު ނަމާދުގެ ނިޔަލަށް ރާއްޖޭގެ ހުރިހާ މިސްކިތެއްގައި ފަރުޟު ނަމާދުތަކާއި، ހުކުރު ނަމާދާއި، ތަރާވީޙް ނަމާދު ޖަމާޢަތުގައި ނުކުރަން އިސްލާމިކް މިނިސްޓްރީން ނިންމާ އެގޮތަށް ޢަމަލުކުރުމަށް ވަނީ އަންގާފައެވެ.
އިސްލާމިކް މިނިސްޓްރީން ވަނީ މިޙާލަތުގައި މިސްކިތުގައި ހަމައެކަނި ބަންގި ގޮވުމަށާއި، ބަންގީގެ ފަހުގައި "ސައްލޫ ފީ ބުޔޫތިކުމް" އަދި ދިވެހި ބަހުން "ހުރިހާ ބޭފުޅުން ގޭގައި ނަމާދު ކުރައްވާ" މިފަދައިން 2 ފަހަރު ގޮވުމަށް އިމާމުންނަށް އަންގާފައެވެ.
އަދި މި މިދަނޑިވަޅުގައި ކަމާބެހޭ ފަރާތްތަކުންދޭ އިރުޝާދުތަކާ އެއްގޮތަށް ޢަމަލުކުރުމަށާއި، މިސްކިތުގައި ޖަމާޢަތުގައި ނަމާދު ނުކުރި ނަމަވެސް، ފަރުޟު ފަސް ނަމާދު ބަރާބަރަށް އަދާކުރުމަށާއި، ތަރާވީޙް ނަމާދު ކުރުމަށާއި، ސުންނަތް ނަމާދު ގިނަކޮށް، ކީރިތި ޤުރްއާން ކިޔަވައި، ﷲގެ ރަޙްމަތުން މާޔޫސް ނުވެ، ސަބަބު ތަކުގައި ހިފާ، ފުރިހަމައަށް ﷲއަށް ވަކީލުކޮށް ގިނަ ގިނައިން ދުޢާކޮށް، އިސްތިޣްފާރު ކުރުމަށް ހުރިހާ ރައްޔިތުންނަށް ނަޞޭޙަތްތެރި ވެފައެވެ.
