ލޮކްޑައުންގެ މުއްދަތު އިތުރު 14 ދުވަހަށް ދަންމައިފި
13 މެއި 2020 | ބުދަ 19:01ސިއްހީ ކުއްލި ނުރައްކަލުގެ ހާލަތު ވަނީ އިތުރު ކޮށްފައި
މާލޭ ލޮކްޑައުންގެ މުއްދަތު ވަނީ 14 ދުވަހަށް އިތުރު ކޮށްފައި- ކުރިއަށް އޮތް ދުވަސްތަކުގައި ސަރޖްއަކަށް ދާނެކަމަށް ވަނީ ބެލެވިފައި
ގްރޭޓާ މާލެ ސަރަހައްދު (މާލެ، ވިލިމާލެ، ހުޅުމާލެ، ގުޅީފަޅު) ގައި އިއުލާނު ކޮށްފައިވާ ލޮކްޑައުންގެ މުއްދަތު 14 ދުވަހަށް އިތުރުކޮށްފި އެވެ.
މުއްދަތު އިތުރު ކޮށްފައިވަނީ އާއްމު ސިއްހަތު ރައްކާތެރި ކުރުމުގެ ޤާނޫނުގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރަށް ލިބިގެންވާ ބާރުގެ ދަށުންނެވެ.
މާލެއިން ކޮވިޑް-19 ގެ ކޭސްއެއް ފެނުމާއި ގުޅިގެން އެންމެ ފުރަތަމަ މާލެ ލޮކްޑައުން ކޮށްފައިވަނީ އޭޕްރީލް މަހުގެ 15 ވަނަ ދުވަހުއެވެ. އޭގެ ފަހުން ދެވަނަ ފަހަރަށް ލޮކްޑައުންގެ މުއްދަތު އިތުރު ކޮށްފައިވަނީ އޭޕްރީލް މަހުގެ 29 ވަނަ ދުވަހު އެވެ.
އެއާއެކު މާލެ، ވިލިމާލެ އަދި ހުޅުމާލޭގައި އެއްގަމު އުޅަނދުފަހަރު ދުއްވުމާއި މަގުމައްޗާއި، އާންމު ތަންތަނަށް އެއްވެ އުޅުން ވަނީ މަނާކޮށްފައެވެ. ލޮކްޑައުން ކޮށްފައިވާއިރު، ބޭރަށް ނިކުމެ އުޅެވެނީ ފުލުހުންނާއި، ސިފައިންނާއި، ސިއްހީ ހިދުމަތްދޭ ތަންތަނުގެ މުވައްޒަފުންނާއި އެ ތަންތަނުގެ އުޅަނދު ދުއްވާ ފަރާތްތަކަށެވެ.
އަދި އޭގެ އިތުރުން ނޭޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) ގެ ފާސް ލިބިފައިވާ ފަރާތްތަކާއި އެންއޯއީސީގެ ފާސް ލިބިފައިވާ މީޑިޔާގެ ފަރާތްތަކެވެ.
ނަމަވެސް މާލޭގެ މަގުމަތީގައި އެއްވެސް ހުއްދައެއް ނެތި އުޅޭ މީހުންގެ ތެރެއިން ގިނަ ބަޔަކު ފުލުހުން ވަނީ ފާއިތުވި ދުވަސްތަކުގައިވެސް ޖޫރިމަނާ ކޮށްފަ އެވެ. އަދި ކާބޯތަކެތި ގަތުމަށާއި، ޒަރޫރީ ބޭނުން ތަކުގައި ބޭރަށް ނިކުންނަން ބޭނުންވާ ފަރާތްތަކަށް ފުލުހުން ދަނީ ފާސް ދޫކުރަމުންނެވެ. ފާސް ދޫކުރުމުން ދަނީ ކޮންމެ ގެއަކުން ކޮންމެވެސް އެކަކަށް އެއް ގަޑިއިރަށެވެ.
މާލެ ސަރަޙައްދު ލޮކްޑައުން ކުރި ނަމަވެސް، އަތޮޅު ތެރޭގައި ދިރިއުޅޭ ފަރާތްތަކުގެ ތެރެއިން ޒަރޫރީ ބޭނުމެއްގައި އެއްރަށުން އަނެއް ރަށަށް ދަތުރުކުރަން ބޭނުންވާ ފަރާތްތަކަށް ކައުންސިލްގެ ހުއްދައަކާއެކު އެއްރަށުން އަނެއް ރަށަށް ދަތުރު ކުރެވޭނެކަމަށް ލޯކަލް ގަވަރމަންޓް އޮތޮރިޓީން އަންގާރަ ދުވަހު ވަނީ ބުނެފައެވެ.
