އެޓަލާންޓާގެ ޒުވާން މިޑްފީލްޑަރު އަންދްރެއާ ރިނާލްޑީ މަރުވެއްޖެ

އިޓާލީގެ އެޓަލާންޓާ އަށް ކުޅެމުން އަންނަ އުމުރުން 19 އަހަރުގެ އަންދްރެއާ ރިނާލްޑީ މަރުވެއްޖެ އެވެ.

ޒުވާން މިޑްފީލްޑަރު މަރުވީ ބޮލަށް ލިބުނު އަނިޔާއަކަށް ފަރުވާ ދެމުން ދަނިކޮށެވެ. އެޓަލާންޓާގެ ލޯނު އެއްބަސްވުމެއްގެ ދަށުން އިޓަލީގެ ހަތަރުވަނަ ޑިވިޝަނުގެ ލެންޔާނޯ އަށް ކުޅެމުން އަންނަ އަންދްރޭގެ ބޮލަށް އަނިޔާވީ، ގޭގައި އޭނާ ފަރިތަ ކުރަނިކޮށެވެ.

ލެންޔާނޯ އިން ނެރުނު ބަޔާނެގައި ބުނެފައިވަނީ ރިނާލްޑީ މަރުވުމަކީ އެ ކްލަބަށް ލިބުނު ބޮޑު ހިތާމައެއް ކަމަށެވެ. މި ބަޔާނުގައިވާ ގޮތުން ބޮލަށް ލިބުނު އަނިޔާއާ ގުޅިގެން ރިނާލްޑީ ހޮސްޕިޓަލަށް ގެންގޮސްފައިވަނީ ހުކުރު ދުވަހު އެވެ. އަދި އޭނާ މަރުވީ ފަރުވާދެމުން ދަނިކޮށް ހޯމަ ދުވަހުގެ ވަގުތެއްގައެވެ.

އުމުރުން 13 އަހަރުގައި އިޓާލިއަން ލީގުގައި ވާދަކުރަމުން އަންނަ އެޓަލާންޓާއާ ގުޅުނު ރިނާލްޑީ ވަނީ އެ ކްލަބާއެކު 17 އަހަރުން ދަށުގެ ލީގު ޗެމްޕިއަންކަން ހޯދުމުގެ އިތުރަށް 2016 ވަނަ އަހަރުގެ ސުޕަ ކަޕް ކާމިޔާބުކޮށްފައެވެ. އަދި ލޯނު އެއްބަސްވުމެއްގެ ދަށުން ލެންޔާނޯ އަށް ބަދަލުވުމަށްފަހު، އޭނާ ވަނީ މި ސީޒަނުގައި އެޓީމަށް 23 މެޗު ކުޅެދީފައެވެ.