ކޮވިޑް-19 ފެތުރުން ކޮންޓްރޯލް ކުރުމަށް މަތިވެރި ކައުންސިލުން ޙާއްސަ ފިޔަވަޅުތަކެއް އަޅަން ނިންމައިފި
ދިރިއުޅޭ ގޭބިސީ ފިޔަވާ އެހެން އެއްވެސްތަނެއްގައި އެއްވެ އުޅުން ވަނީ މަނާކޮށްފައި
އއ. މަތިވެރި؛ ކޮވިޑުން ރައްކާތެެރިވުމަށް ރަށުގައި ވަނީ ހާއްސަ ފިޔަވަޅުތަކެއް އަޅާފައި
މާލެއިން ކޮވިޑް-19 ގެ ކޭސްތައްކެއް ފެނިފައިވާތީ ރައްކާތެރިކަމުގެ ގޮތުން ޓާސްކްފޯސްގެ ލަފާގެ މަތިން އއ. މަތިވެރި ކައުންސިލުން ޚާއްޞަ ފިޔަވަޅުތަށް އަޅަން ނިންމައިފިއެވެ.
އެގޮތުން އެޅުމަށް ނިންމާފައިވާ ފިޔަވަޅުތަކުގެ ތެރޭގައި މާލެއާއި މާލެކައިރިން ޞަރަޙައްދުން 14 އޭޕްރީލްގެ ފަހުން އެ ރަށަށް އައިސްފައިވާ ފަރާތްތަކުން 14 ދުވަސްވަންދެން ގޭގައި މަޑުކުރުމަށް ވަނީ އަންގާފައެވެ.
އަދި ޒަރޫރީ ބޭނުންތަކުގައި މެނުވީ އެއްރަށުން އަނެއްރަށަށް އަރާފޭބުން ހެލްތ ޕްރޮޓެކްޝަން އޭޖެންސީ (އެޗްޕީއޭ) އިން މަނާކުރުމާއިގުޅިގެން މަތިވެރިއަށް ޒަރޫރީ ބޭނުންތަކުގައި އަންނަ ފަރާތްތަކުން ވަކި ނަންބަރުތަކަށް ގުޅާ މަޢުލޫމާތު ޙިއްސާ ކުރުމަށް ވަނީ އެދިފައެވެ. ނަންބަރުތަކަކީ 9665188، 9907298، 7772549 އަދި 9997886 އެވެ.
މީގެ އިތުރުން ދިރިއުޅޭ ގޭބިސީ ފިޔަވާ އެހެން އެއްވެސްތަނެއްގައި އެއްވެ އުޅުމާއި ޙާއްޞަކޮށް ޕާޓީތަކާއި، ޙަފުލާތަށް ބޭއްވުމާއި، ދަތުރު ދިޔުމާއި، މޫއްދަށް އެރުމާއި، ކުޅިވަރު ކުޅުމާއި، ގުރޫޕް ހަދާފައި އުޅުމަކީ މަނާކަމެއް ކަމަށް ވަނީ އަންގާފައެވެ. އަދި ބަލިން ރައްކާތެރިވުމުގެގޮތުން ކަމާބެހޭ އިދާރާތަކުން ދީފައިވާ އިރުޝާދުތަކާއި އެއްގޮތަށް ހުރިހާ ވަގުތެއްގައި ވެސް ޢަމަލުކުރުމާއި ޒަރޫރީ ބޭނުންތަކަށް ތަންތަނަށް ގޮސް އުޅުމުގައިވެސް މީހުންނާއި 3 ފޫޓް ގައިދުރުކަން ބެހެއްޓުމަށް ވަނީ އަންގާފައެވެ.
މީގެ އިތުރުން މާލެއިންނާއި، ރިސޯޓުތަކުންނާއި، ސަފާރިތަކުން ރަށަށް ދަތުރުކޮށްފައިވާ ފަރާތްތަކުން ކެއްސުމާއި ހުންއައުން އަދި ނޭވާއަށް އުނދަގޫވުން ފަދަ ކޮވިޑް-19 ގެ ޢަލާމާތެއް ހުރިނަމަ، ލަސްނުކޮށް 1676 ނަންބަރާއި ގުޅާ ނުވަތަ މެސެޖަކުން މަޢުލޫމާތު ޙިއްސާކުރުމަށް ވަނީ އެދިފައެވެ.
މަތިވެރި ކައުންސިލުން ބުނީ ފިޔަވަޅުތަކާއި ޚިލާފަށް ޢަމަލުތަށް ބަހައްޓާ ފަރާތްތަކާއި މެދު ޤާނޫނީ ފިޔަވަޅުއެޅުމަށް ކަމާބެހޭ ފަރާތްތަކަށް އަންގަމުންދާނެ ކަމަށާއި، މިކަން ޓާސްކްފޯހުގެ ފަރާތުން ވެސް ބަލަމުންދާނެ ކަމަށެވެ.
