ލޯކަލް ކައުންސިލް އިންތިޚާބަށް ކުރިމަތިލުމުގެ ސަބަބުން ސަސްޕެންޑް ކުރެވުނު ސިވިލް ސަރވިސް މުވައްޒަފުންގެ ސަސްޕެންޝަން އުވުމާއި ގުޅިގެން އެ މުވައްޒަފުންނަށް ރަމަޟާން މަހުގެ އެލަވަންސް ދޭނީ ސަސްޕެންޝަން އުވުނު ދުވަހުން ފެށިގެން ކަމަށް ސިވިލް ސަރވިސް ކޮމިޝަނުން ބުނެފިއެވެ.

ރަމަޟާން މަހުގެ އެލަވަންސްގެ ގޮތުގައި 3000 ރުފިޔާ ކޮންމެ މުވައްޒަފަކަށް ދޭން ޖެހެއެވެ. ނަމަވެސް ސަސްޕެންޝަން އުވުނު މުވައްޒަފުންގެ 14 ދުވަހަށް ލިބޭނީ 1400 ރުފިޔާކަމަށް އެކޮމިޝަނުން ބުނެއެވެ.

އިންތިޚާބަށް ކުރިމަތިލި މުވައްޒަފުންގެ ސަސްޕެންޝަން އުވުނުކަން އަންގާ ސިވިލް ސަރވިސް ކޮމިޝަނުން ނެރުނު އިޢުލާނެއްގައި ބުނެފައިވަނީ މިނިސްޓްރީ އޮފް ފިނޭންސްގެ ނަންބަރު 2/2020 ދެންނެވުމުގެ (އ) ގައި ރަމަޟާން މަސް ފެށޭ އިރު، އޮފީހަށް ޚިދުމަތް ނުލިބޭ ގޮތަށް ޕޭ ލީވް އަދި ނޯ ޕޭ ލީވްއެއްގައި ހުރި މުވައްޒަފަކު ރަމަޟާން މަހުގެ ތެރެއިން އެނބުރި ޚިދުމަތަށް ނުކުމެއްޖެ ނަމަ، އެ ދުވަހަކުން ފެށިގެން ރަމަޟާން މަހުގެ ނިޔަލަށްޖެހޭ ޢަދަދެއް ބަލައި، އެ ޢަދަދަށް ރަމަޟާން މަހުގެ އިނާޔަތުގެ ފައިސާ ދޭންވާނެކަމަށެވެ.

އަދި ލޯކަލް ކައުންސިލްތަކުގެ އިންތިޚާބަށް ކުރިމަތިލުމާ ގުޅިގެން ސަސްޕެންޑުކުރެވިފައިވާ މުވައްޒަފުންގެ ސަސްޕެންޝަން ބާޠިލުކުރެވޭ ތާރީޚުން ފެށިގެން އެ ފަރާތަކަށް ޙައްޤުވާ ރަމަޟާން މަހުގެ އިނާޔަތްތައް އެ ފަރާތަކަށް ލިބޭނެކަމަށް ބުނެފައި ވެއެވެ.

މި އަހަރުގެ ލޯކަލް ކައުންސިލްތަކުގެ އިންތިޚާބު ފަސްކުރުމުގެ ބިލު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ތަޞްދީޤު ކުރައްވާފައިވަނީ 10 ވީ އާދީއްތަ ދުވަހުއެވެ. އެހެންކަމުން މި މުއްދަތުން ފެށިގެން ރަމަޟާން މަހުގައި ބާކީ އޮންނާނީ 14 ދުވަހެވެ.

މީގެ އިތުރުން ސިވިލް ސަރވިސްގެ އެންގުމުގައި ވަނީ ސަސްޕެންޝަން އުވި މުވައްޒަފުން އަލުން ވަޒީފާއަށް ނުކުންނަން ހަމަޖެހުނު އިރު، ސިއްޙީ ކުއްލި ނުރައްކަލުގެ ޙާލަތާ ގުޅިގެން މި ވަގުތު ސަރުކާރުގެ އޮފީސްތަކުގައި މަސައްކަތްކުރުމަށް ހަމަޖެހިފައިވަނީ ވަކި ޚާއްޞަ އުޞޫލުތަކެއްގެ މަތިން ކަމުގައެވެ. އެހެންކަމުން ވަޒީފާއަށް ނުކުތުމަށް ހަމަޖެހޭ މުވައްޒަފުން ޢަމަލުކުރަންވާނީ އެ އޮފީހެއްގެ ޒިންމާދާރު އިސްވެރިޔާ ނުވަތަ ސެކްރެޓަރީ ޖެނެރަލްގެ މަސައްކަތް ވަގުތީގޮތުން ޙަވާލުކުރެވިފައިވާ ފަރާތުން އަންގާ ގޮތެއްގެ މަތިން ކަމުގައި ބުނެފައިވެއެވެ.