ފުޓްބޯޅަ ފެޑެރޭޝަނުގެ ރައީސަކަށް ޑްރޮގްބާ ގެންނަށް ތާއީދު: ޔާޔާ ޓޫރޭ

އައިވަރީ ކޯސްޓުގެ ފުޓްބޯޅަ ފެޑެރޭޝަނުގެ ރައީސްގެ މަގާމަށް ޑިޑިއޭ ޑްރޮގްބާ ގެންނަން ތާއީދުކުރާ ކަމަށް ޔާޔާ ޓޫރޭ ބުނެފިއެވެ.

އައިވަރީ ކޯސްޓުގެ ފުޓްބޯޅަ ފެޑެރޭޝަނުގެ ރައީސްގެ މަގާމަށް ކުރިމަތިލުމަށް ޝައުގުވެރިވާކަން އައިވަރީ ކޯސްޓުގެ ގައުމީ ޓީމަށް ކުޅެފައިވާ ޑްރޮގްބާ ވަނީ މިދިޔަ އަހަރުގެ ސެޕްޓެމްބަރު މަހު އިއުލާނު ކޮށްފައެވެ. އޭނާ ވާދަކުރަން ޖެހޭނީ މިހާރުގެ ރައީސް ސޮރީ ޑައިބޭޓް އާއި ނައިބު ރައީސް އިދްރީސީ ޑިއާޔޯ އާއެވެ.

ނޮވެލް ކޮރޯނާވައިރަސް (ކޮވިޑް-19) އާ ގުޅިގެން މީގެ ކުރިން އައިވަރީ ކޯސްޓުގެ ފުޓުބޯޅަ ފެޑެރޭޝަނުގެ އިންތިޚާބު ފަސްކޮށްފައިވާއިރު، އިންތިޚާބު ދެން ބާއްވާނެ ތާރިޚެއް އަދި އިއުލާން ކޮށްފައެއް ނުވެއެވެ.

ޑްރޮގްބާ އާއެކު އައިވަރީ ކޯސްޓަށް ކުޅުނު ޔާޔާ ޓޫރޭ ބުނީ މިއީ އެ ގައުމުގެ ފުޓްބޯޅަ އަށް ބަދަލެއް ގެންނަންވީ ވަގުތު ކަމަށާއި އެ އިދާރާގެ ރައީސް ކަމަށް އެންމެ ގާބިލު މީހަކީ މިހާރު ޑްރޮގްބާ ކަމަށެވެ.

މީގެ ތެރެއިން ޑްރޮގްބާ އަންނަނީ ފުޓްބޯޅައިގެ ބޭރުން ވެސް އައިވަރީ ކޯސްޓާއި އެފްރިކާ ބައްރަށް އެހީތެރިވަމުންނެވެ. އެގޮތުން (ކޮވިޑް-19) ގެ ކަންކަމުގައި އެހީވުމުގެ ގޮތުން ޑްރޮގްބާ ދާދި ފަހުން ވަނީ އޭނާގެ ހޮސްޕިޓަލް އައިވަރީ ކޯސްޓުގެ ސަރުކާރުގެ ބޭނުމަށް ދީފައެވެ.

ޑްރޮގްބާ އަށް ތާއީދު ކުރާކަން ޓޫރޭ ހާމަކުރިއިރު، ޓޫރޭ އާއި ޑްރޮގްބާ ވަނީ އައިވަރީ ކޯސްޓަށް އެކުގައި ކުޅެދީ 2015 ވަނަ އަހަރުގެ އެފްރިކަން ކަޕް އޮފް ނޭޝަންސް ކާމިޔާބުކޮށްދީފަ އެވެ. އަދި ޑްރޮގްބާ ވަނީ އައިވަރީ ކޯސްޓް ގައުމީ ޓީމަށް 2002ން 2014ށް ކުޅެދީ 105 މެޗުން 65 ލަނޑު ޖަހާފައެވެ.