ސެކިއުރިޓީޒް ވިއްކާފައިވާ ކުންފުނިތަކުން ފުރަތަމަ ކުއާޓަރގެ ރިޕޯޓު ޝާއިޢުކުރުމުގެ މުއްދަތު އިތުރުކޮށްފި

ސެކިއުރިޓީޒް ވިއްކާފައިވާ ކުންފުނިތަކުން ފުރަތަމަ ކުއާޓަރުގެ ރިޕޯޓު ޝާއިޢުކުރުމުގެ މުއްދަތު އިތުރުކޮށްދީފިއެވެ.

ކެޕިޓަލް މާކެޓް ޑެވަލަޕްމަންޓް އޮތޯރިޓީ (ސީއެމްޑީއޭ) އިން ބުނީ ސެކިއުރިޓީޒް ދޫކުރާ ފަރާތްތަކުގެ މަޢުލޫމާތު ހާމަކުރުމުގެ ޒިންމާއާބެހޭ ގަވާއިދުގެ ދަށުން ނެރެންޖެހޭ، މި އަހަރުގެ ފުރަތަމަ ކުއާޓަރުގެ ރިޕޯޓާއި ކޮވިޑް 19 އެސެސްމަންޓް ރިޕޯޓު ހިމަނައިގެން ދެވަނަ ކުއާޓަރުގެ ރިޕޯޓާއެކު، 31 ޖުލައި 2020 ގެ ނިޔަލަށް ފުރަތަމަ ކުއާޓަރުގެ ރިޕޯޓު ޝާއިޢުކުރުމުގެ މުއްދަތު އިތުރުކޮށްދީފައިވާ ކަމަށެވެ.

މިގޮތަށް މުއްދަތު އިތުރުކޮށްދީފައިވީ ނަމަވެސް، ޙިއްޞާގެ އަގަށް ބަދަލު އަތުވެދާނެ ފަދަ އެއްވެސް މުޢާމަލާތެއް ކުންފުންޏަކުން ހިންގައިފިނަމަ، ނުވަތަ އެފަދަ ޙާލަތެއް ދިމާވެއްޖެނަމަ، ސެކިއުރިޓީޒް ދޫކުރާ ފަރާތްތަކުގެ މަޢުލޫމާތު ހާމަކުރުމުގެ ޒިންމާއާބެހޭ ގަވާއިދުގެ ދަށުން އެ ކުންފުންޏަކުން ވަގުތުން މަޢުލޫމާތު ހާމަކުރަންޖެހޭނެ ކަމަށެވެ.

އެ ގޮތަށް ހަމަޖެއްސުމުގެ މައިގަނޑު މަޤްޞަދަކީ ކޮވިޑް 19 އާގުޅިގެން ކުންފުނިތަކުގެ ވިޔަފާރިއަށް ކުރާނެ އަސަރާއި ކުންފުނީގެ އާމްދަނީއަށް އަތުވެދާނެ ބަދަލުތަކުގެ ސަބަބުން ކުންފުންޏަށް ލިބިދާނެ ގެއްލުންތަކަށް އެޑްރެސްކޮށް، ކުންފުނިތަކުން ރިޕޯޓެއް ނެރުމަށް ފުރުޞަތު ދިނުމުގެ ގޮތުން ކަމަށް ސީއެމްޑީއޭއިން ބުނެއެވެ.

މީގެ އިތުރުން ކުންފުނީގެ ވިޔަފާރީގެ ޙާލަތަށް އަންނަމުންދާ ބަދަލުތަކުގެ ސަބަބުން ކުންފުނިތަކުގެ މާލީ ޙާލަތަށް އަސަރުކުރާނެ ނުވަތަ އަސަރުކޮށްފައިވާ ގޮތް ވަޒަންކުރުމަށް އިންވެސްޓަރުންނަށް ފުރުޞަތު ލިބިދިނުމާއި ސެކިއުރިޓީޒް ގަނެވިއްކުމުގައި އިންވެސްޓަރުންނަށް ގޮތެއް ނިންމުމުގައި މަގުފަހިކޮށްދިނުން ވެސް ހިމެނޭ ކަމަށް އެ އޮތޯރިޓީން ބުނެއެވެ.