ސިންގަޕޫރުގައި އޮންނަ އޭޝިއަން ޕޭސްޓްރީ ކަޕްގައި ރާއްޖެއިން ފުރަތަމަ ފަހަރަށް ބައިވެރިވަނީ !
މި ކަޕް އޮންނާނީ 24-25 އަށް
އޭޝިއަން ޕޭސްޓްރީ ކަޕްގައި ބައިވެރިވާ ޗެފުން
މިއަހަރުގެ އޭޕްރިލް މަހުގެ 24 ވަނަ ދުވަހުން 25 ވަނަ ދުވަހާއި ހަމައަށް ސިންގަޕޫރުގައި އޮންނަ އޭޝިއަން ޕޭސްޓްރީ ކަޕްގައި ރާއްޖޭން ފުރަތަމަ ފަހަރަށް ބައިވެރިވާން ނިންމައިފިއެވެ.
މި ޕޭސްޓްރީ ކަޕްގައި ރާއްޖެ ތަމްސީލް ކުރުމަށް ބައިވެރިވަނީ ކޮންރަޑް މޯލްޑިވްސް ރަންގިލި އައިލެން ރިސޯޓުގެ ޝެފެއް ކަމަށްވާ އައިމިނަތު ހަމީދު އާއި ސޮނެވާ ފުށި ރިސޯޓުގެ ޝެފް އިބްރާހީމް ފަރީދުގެ އިތުރުން ހުޅުލެ އައިލެންޑް ހޮލެޓެލްގެ ޝެފް އިންދްރަ ކުމާރް ލިމްބޫ އެވެ.
މި ތިން ޝެފުން ވެސް ޕޭސްޓްރީ ކަޕްގައި ބައިވެރިވުމުގެ ކަންތައްތައް އިންތިޒާމްކޮށް ސްޕޮންސަރޝިޕް ހަމަޖައްސާދީފައިވަނީ މޯލްޑިވްސް އެގްޒިބިޝަން އެންޑް ކޮންފަރެންސް ސަރވިސަސް އާއި ބެސްޓް ބައި މޯލްޑިވްސް ޕްރައިވެޓް ލިމިޓަޑް ގުޅިގެންނެވެ.
ބެސްޓް ބައި މޯލްޑިވްސްގެ ސީއީއޯ މުހައްމަދު މަޒްލޫމް ވިދާޅުވީ ތިން ޝެފުން ވެސް ވަނީ މި ކަޕްގައި ބައިވެރިވުމަށް އެހީތެރިވެދީ އެއްބާރުލުންދިން ހުރިހާ ފަރާތްތަކަށް ޝުކުރު އަދާކޮށްފައެވެ.
2016 ވަނަ އަހަރުގެ އޭޝިއަން ޕޭސްޓްރީ ކަޕްގައި ގޯލްޑް ޓްރޮފީ ސިންގަޕޫރުން ހާސިލް ކޮށްފައިވާއިރު ސިލްވަރ ޓްރޮފީ ހާސިލްކޮށްފައި ވަނީ މެލޭޝިއާ އިންނެވެ. އަދި ބްރޮންޒް ޓްރޮފީ ހާސިލްކޮށްފައިވަނީ އިންޑިއާ އިންނެވެ.
