ރިޝީގެ ފޭނުންނަށް އުފާވެރި ޚަބަރެއް، "ޝަރުމާޖީ ނަމްކީން" ރިލީޒް ކުރާނެ

މިދިޔަ ބުރާސްފަތި ދުވަހު ނިޔާވި ބޮލީވުޑްގެ ފިލްމީތަރި ރިޝީ ކަޕޫރު އެންމެ ފަހުން ކުޅެން ފަށާފައިވާ ފިލްމް "ޝަރްމާޖީ ނަމްކީން" ރިލީޒް ކުރާނެ ކަމަށް ފިލްމް އުފައްދާ ޓީމުން ބުނެފިއެވެ.

ބޮޑު ބައެއް ޝޫޓްކޮށް ނިމިފައިވާ މި ފިލްމުގެ ޕްރޮޑިއުސަރ ރިތޭޝް ސިދްވާނީއާއި، ފަރުޚާން އަޚްތަރު ގެންދަނީ ފިލްމު ނިންމުމުގެ މަސައްކަތް އަވަސް ކުރަމުންނެވެ.

މި ފިލްމުގައި ރިޝީއާއެކު ލީޑް ރޯލުން ފެނިގެންދާނީ ޖޫހީ ޗައުލާއެވެ.

ގާތް މަސްދަރަކުން ބުނެފައިވާ ގޮތުގައި މި ފިލްމުގެ މެއިން ކެރެކްޓަރ އަކީ ރިޝީއެވެ. އަދި އޭނާ ކުޅުނު ރޯލްގެ ބޮޑު ބައެއް ވަނީ ޝޫޓްކޮށް ނިންމާފައެވެ. އަދި މި ފިލްމަކީ ރިޝީގެ އެންމެ ފަހު މަސައްކަތް ކަމަށް ވުމުން ރިޝީގެ ޝަރަފުގައި ކޮންމެހެންވެސް މި ފިލްމު ރިލީޒް ކުރާނެ ކަމުގެ ޔަޤީންކަން ފިލްމުގެ ޕޮރޮޑިއުސަރުން ދީފައިވާ ކަމަށެވެ.

އެކްސެލް އެންޓަޓެއިންމަންޓުން އުފައްދާ މި ފިލްމު ވެގެންދާނީ ހިތޭޝް ބާޓިއާ ޑައިރެކްޓް ކުރާ ފުރަތަމަ ފިލްމަށެވެ.

ޝަރުމާޖީ ނަމްކީން" އަކީ ރިޝީ ކެންސަރަށް ފަރުވާ ހޯދަން ނިއުޔޯކަށް ފުރުމުގެ ކުރިން 17 ސެޕްޓެންބަރ 2018 ގައި އިޢުލާނު ކުރި ފިލްމެކެވެ.

29 ސެޕްޓެންބަރ 2018 ރިޝީ ފުރައިގެން ދިޔަ އިރު، ފިލްމުގެ ބައެއް ޝޫޓިންތައް ވަނީ ނަގާފައެވެ. ނަމަވެސް ރިޝީ އެނބުރި އަންނަންދެން ފިލްމުގެ ޝޫޓިންތައް ހުއްޓާލާފަ އޮތުމަށްފަހު އަލުން ޝޫޓިންތައް ފެށީ މިއަހަރުގެ ޖެނުއަރީ މަހުގެ ތެރޭގެއެވެ. ރިޝީ އެނބުރި އިންޑިއާއަށް ގޮސްފައިވަނީ އަހަރެއްހާ ދުވަހު ނިއުޔޯކްގައި ހުރުމަށްފަހު މިދިޔަ އަހަރުގެ ސެޕްޓެންބަރު މަހުގެ ތެރޭގައެވެ.