ޗައިނާގައި ތިބި އާމިރުގެ ފޭނުންނަށް ހާއްސަ މެސެޖެއް

ޗައިނާގެ ވޫހަން ސިޓީން ފެށިގެން ފެތުރެމުންދާ ނުރައްކާތެރި ނޮވެލްކޮރޯނާ ވައިރަހުގެ ސަބަބުން އެ ގައުމުގެ ރައްޔިތުން ތަހައްމަލު ކުރަމުންދާ ކަންތައްތަކަށް ކަންބޮޑުވުން ފާޅުކޮށް، ބޮލީވުޑްގެ ތަރި އާމިރްޙާން ޗައިނާގައި ތިބި އޭނާގެ ފޭނުންނަށް މެސެޖެއް ފޮނުވައިފިއެވެ.

މިދިޔަ އަހަރުގެ ޑިސެމްބަރު މަހުގެ ފަހުކޮޅުން ފެށިގެން ފެތުރެމުންދާ ކޮވިޑް-19 ގެ ސަބަބުން ޗައިނާއިން އެކަނި 2،300 މީހަކު ވަނީ މަރުވެފައެވެ. އާމިރް ވަނީ، ޗައިނާގެ ސަރުކާރުގެ އިރުޝާދުތަކަށް ބޯލަނބައި ރައްކާތެރި ކަމުގެ ފިޔަވަޅު އެޅުމަށް ޗައިނާގައި ތިބި އޭނާ އަށް ސަޕޯޓްކުރާ ހުރިހާ ފަރާތްތަކަށް އިލްތިމާސް ކޮށްފައެވެ.

އުމުރުން 54 އަހަރުގެ އާމިރްހާން ޗައިނާގެ މީހުންގެ މެދުގައި މަގުބޫލްވެގެން ގޮސްފައިވަނީ ''3 އިޑިއެޓްސް'' އަދި ''ދަންގަލް'' އިންނެވެ. ޗައިނާގެ ފޭނުންނަށް އާމިރްގެ މެސެޖް ހިއްސާކޮށްފައިވަނީ، ޗައިނާގައި ބޭނުންކުރާ ޝޯޝަލް މީޑިއާ ޕްލެޓްފޯމެއް ކަމަށްވާ ''ވެއިބޯ'' އަށް އަޕްލޯޑްކުރި ވީޑިއޯއެއް ގައެވެ.

ޗައިނާ ބަހުން ސަބްޓައިޓަލް އަރުވާފައިވަ ވީޑިއޯއެއްގައި އާމިރްހާން ބުނަނީ، ކޮވިޑް-19 ގެ ހަބަރު އަޑުއެހީ ވަރަށް ފުން ހިތަމާއާ އެކު ކަމަށާއި، ޗައިނާގައި ތިބި އޭނާގެ ރައްޓެހިންގެ ހާލު އަހުވާލު ވަރަށް ގާތުން ބަލަމުންދާ ކަމަށެވެ.

ވައިރަހުގެ ސަބަބުން މަރުވި ފަރާތްތަކަށް އާމިރްހާން ވަނީ ތައުޒީޔާ ފޮނުވާފައެވެ. އަދި މި ދަނޑިވަޅުގައި އެންމެ މުހިއްމު ކަމަކީ ބަލިން ސަލާމަތްވާން އަޅަން ޖެހޭ ފިޔަވަޅުތައް އެޅުން ކަމަށް އާމިރްހާން ޗައިނާގެ ފޭނުންނަށް ފޮނުވި މެސެޖްގައި ބުންޏެވެ.