އިރާނުގެ ބައެއް މިސްކިތްތައް މިއަދު ހުޅުވަނީ

އިރާނުގެ ބައެއް މިސްކިތްތައް ހޯމަ ދުވަހު ހުޅުވަން ނިންމަވާފައިވާކަމަށް އެޤައުމުގެ ރައީސް ޙަސަން ރޫޙާނީ ވިދާޅުވެއްޖެ އެވެ.

ރޫޙާނީ ވިދާޅުވީ އެޤައުމުގައި ކޮވިޑް-19 ފެތުރުމާއި ގުޅިގެން ރައްޔިތުންގެ ސަލާމަތާއި ރައްކާތެރިކަމަށް އެޅި ފިޔަވަޅެއްގެ ގޮތުން މީހުން މިސްކިތަށް އެރުން މަނާކޮށްފައި އޮތް އޮތުން ހޯމަ ދުވަހު ނިމުމަކަށް ގެންނަވާ، 100ށް ވުރެ ގިނަ ސިޓީތަކުގައި ހުރި މިސްކިތްތައް ޢާންމުކޮށް ހުޅުއްވާލައްވާނެކަމަށެވެ.

އިރާނުން މި އަހަރުގެ ފެބްރުއަރީ މަހުގެ ތެރޭގައި މިސްކިތްތައް ބަންދުކުރީ އެޤައުމުގެ ސަރުކާރުން ހާމަކުރަމުންދާ ކޮވިޑް-19އަށް ޕޮޒިޓިވްވި މީހުންގެ ޢަދަދަށްވުރެ، ވައިރަސްޖެހިފައިވާ މީހުންގެ ޢަދަދު ގިނަކަމަށް ބުނެ ރިޕޯޓުތައް ފެތުރުމާއި ގުޅިގެންނެވެ. މި ރިޕޯޓުތައް ފެންމަތިވުމުން މިސްކިތްތަކުގެ އިތުރުން ދީނީ އެކި ކަންކަމަށް ބޭނުންކުރާ ޞަރަޙައްދުތައް ވެސް މަރޗުމަހުގެ ތެރޭގައި ބަންދުކުރި އެވެ.

އިރާނުގައި 97,424 މީހުން ވައިރަސްއަށް ޕޮޒިޓިވްވެ، 6,203 މީހަކު ވަނީ މަރުވެފައެވެ. ވައިރަސް ޖެހޭ މީހުންގެ ޢަދަދު އިތުރުވަމުން ދިޔަ ނަމަވެސް އިރާން ސަރުކާރުން މިހާރު ވަނީ ވަކި އުޞޫލެއްގެ ދަށުން މިސްކިތްތައް ޢާންމުކޮށް ހުޅުވާލަން ނިންމާފަ އެވެ.

އިރާނުގެ ދައުލަތުގެ މީޑިއާއަށް ދެއްވި ބަސްދީގަތުމެއްގައި އެޤައުމުގެ ރައީސް ޙަސަން ރޫޙާނީ ވިދާޅުވީ ކޮވިޑް-19 ފެތުރުމުގެ ހިރާސް ކުޑަކަމަށް ބެލެވޭ 132 ސިޓީއެއްގެ މިސްކިތްތައް ހުޅުވަން ނިންމަވާފައިވާކަމަށެވެ. އަދި މި މިސްކިތްތައް ހުޅުވަން ނިންމެވީ ޞިއްޙީގޮތުން ބަލަން ޖެހޭ މިންގަނޑުތަކައް ބެއްލެވުމަށްފަހުގައި ކަމަށާއި، މި ހަފުތާއިން ފެށިގެން މިސްކިތްތަކުގައި ޖަމާޢަތުގައި ހުކުރު ނަމާދުކުރެވޭނެކަމަށް ވިދާޅުވި އެވެ. މިސްކިތްތައް ހުޅުވި ނަމަވެސް، އަޅުކަންކުރަން ބޭނުންކުރާ ޤަދީމީ ޞަރަޙައްދުތައް ހުޅުވާލާނީ މެއިމަހުގެ ފަހުކޮޅުކަމަށް ރޫޙާނީ ވިދާޅުވެފައި ވެއެވެ.

އިރާނު ސަރުކާރުން ވަނީ ކޮވިޑް-19ގެ ރިސްކް ކުޑަ ޞަރަޙައްދުތަކުގައި ހުރި ސްކޫލްތައްވެސް މެއިމަހުގެ 16 ވަނަ ދުވަހު ހުޅުވާލަން ނިންމާފަ އެވެ.