މި މަހުގެ 1 ވަނަ ދުވަހު ނ. މަނަދޫން ކޮވިޑް-19 އަށް ޕޮޒިޓިވްވި 80 އަހަރުގެ އުމުރުން ދުވަސްވީ އަންހެން މީހާގެ ދެވަނަ ސާމްޕަލް ނެގެޓިވް ކަމަށް އެޗްޕީއޭއިން ބުނެފިއެވެ.

ނެޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) ގައި އަދީއްތަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑިއަމަލޮޖިސްޓް ޑރ. އިބްރާހިމް އަފްޒަލް ވިދާޅުވީ 80 އަހަރުގެ މީހާގެ އެންމެ ފަހުގެ މައުލޫމާތަކީ އޭނާގެ ރިޒަލްޓް ނެގެޓިވްކޮށް އައިސްފައިވާ ކަމަށެވެ. ނަމަވެސް އެހެން ކަމަކަށް ފަރުވާ ހޯދަން އައި މީހަކަށްވާތީ އެކަންކަން ކުރިއަށް ގެންދާތީ އައިޖީއެމްއެޗްގައި އެޑްމިޓްކޮށްގެން ފަރުވާ ދެމުން އަންނަ ކަމަށް ޑރ. އަފްޒަލް ވިދާޅުވިއެވެ.

މެއި 1 ގައި ނ. އަތޮޅު ހޮސްޕިޓަލުން "ރާއްޖެއެމްވީ" އަށް މައުލޫމާތު ދެމުން ބުނީ، އެރަށުން 80 އަހަރުގެ އަންހެނަކު ކޮވިޑް-19 އަށް ޕޮޒިޓިވްވެފައިވާ ކަމަށާއި، އޭނާ ރަށުން ޑޮކްޓަރަށް ދެއްކީ އޭޕްރީލް މަހުގެ 29 ވަނަ ދުވަހުގައެވެ. އަދި އޭރު އޭނާއަކީ ކޮވިޑް-19 އަށް ޝައްކު ކުރެވިގެން ފަރުވާދިން ބަލިމީހެއް ނޫންކަންވެސް ފާހަގަ ކޮށްފައިވެއެވެ.

އޭގެ އިތުރުން، ބަލި މީހާގެ ޙާލު ބޮޑުވެގެން ބުރާސްފަތި ދުވަހުގެރޭ އޭނާ މާލެ ގެނެވިފައިވާއިރު، ހުން ހުރުމާއެކު އައިޖީއެމްއެޗުން ކޮވިޑް-19 އަށް ޓެސްޓް ކުރި ކަމަށާއި، ޕޮޒިޓިވްވިކަން އެނގިފައިވަނީ ހުކުރު ދުވަހުގެ ހަވީރު ކަމަށް ހޮސްޕިޓަލުން ބުނެފައިވެއެވެ.

އެއީ އެމީހާގެ ފުރަތަމަ ޓެސްޓެވެ. އެ ޓެސްޓަށް ޕޮޒިޓިވްވި ނަމަވެސް ފަހުން ހެދި ޓެސްޓްގެ ނަތީޖާ ވަނީ ނެގެޓިވްވެފައެވެ. އެހެންކަމުން އަދިވެސް އެމީހާ ގާތުން މޮނިޓަރ ކުރަމުންދާނެއެވެ.

އައިޖީއެމްއެޗްގެ ޑރ. މުހައްމަދު އަލީ ވިދާޅުވީ 80 އަހަރުގެ މީހަ އޮތީ އައިސީޔޫގައި ކަމަށެވެ. ނަމަވެސް އެޑްމިޓްކޮށްފައި އޮތީ ނޭވާލާން އުނދަގޫވެގެން ބަލިހާތަކުގެ ސީރިއަސް ވެގެން ނޫން ކަމަށާއި، އެހެންކަމަކަށް ޓެސްޓް ހަދަންޖެހޭތީ ހޮސްޕިޓަލުގައި ބާއްވާ އިރު އެހެން ބަލިމީހުންގެ ސަލާމަތަށްޓަކައި އައިސީޔޫއަށް ބަދަލު ކުރެވުނީ ކަމަށެވެ. އެގޮތުން އައިސީޔޫގައި ވަކިވަކި ކޮޓަރިތަކެއް ހުންނާނެ ކަމަށާއި، އެތަނުގައި ބަލި މީހާގެ ޓެސްޓްތައް ހެދެންދެން އެޑްމިޓް ކޮށްފައި ބާއްވާނެކަމަށް ޑރ. މުހައްމަދު އަލީ ވިދާޅުވިއެވެ.