ކްރިޓިކަލް ކެއަރގައި އޮތް 88 އަހަރުގެ މީހާގެ ހަށިގަނޑުގެ ޕްރެޝަރާއި ލޭގެ ޕްރެޝަރ ހިފަހައްޓާވަރު ދަށް: ޑރ. މުހައްމަދު އަލީ
ބަލި ސީރިއަސްވުމުގެ ސަބަބުން ނޭވާލާން އުނދަގޫވެ ނޭވާލާ ހޮޅިތަކުގެ ވަށައިގެން ފެން އުފެދި ނޭވާލުމުގެ ދަތިތަކެއް އާދޭ
އައިޖީއެމްއެޗްގެ ޑޮކްޓަރު މުަހައްމަދު އަލީ - ޑީއެޗް11 ގައި ފަރުވާ ދެމުން އަންނަ 88 އަހަރުގެ މީހާއަށް އިތުރު ފަރުވާތައް ދޭން ވަނި ފަށާފައި
ޑީއެޗް-11 ގައި ފަރުވާދެމުން އަންނަ 88 އަހަރުގެ މީހާ ވެންޓިލޭޓަރުގެ އެހީގައި އޮކްސިޖަން ދެމުން އަންނަ ކަމަށާއި، އެމީހާގެ ހަށިގަނޑުގެ ޕްރެޝަރ އަދި ލޭގެ ޕްރެޝަރ ހިފަހައްޓާވަރު ދަށްވެގެން ބޭސް ދޭން ފަށާފައިވާ ކަމަށް އައިޖީއެމްއެޗްގެ ޑރ. މުހައްމަދު އަލީ ވިދާޅުވެއްޖެއެވެ.
ނެޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) ގައި އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި 88 އަހަރުގެ މީހާގެ އެންމެފަހުގެ މައުލޫމާތު ދެއްވަމުން ޑރ. އަލީ ވިދާޅުވީ 88 އަހަރުގެ މީހާގެ ހާލަތު ސީރިއަސް ވެގެން ވެންޓިލޭޓަރުގައި އާދީއްތަ ދުވަހުގެ މެންދުރުން ފެށިގެން ފަރުވާ ދެމުން އަންނަ ކަމަށެވެ. އަދި ކޮވިޑް-19 ގައި ދިމާވާ ކޮމްޕްލިކޭޝަނެއް ކަމަށްވާ ބަލި ސީރިއަސްވުމުގެ ސަބަބުން ނޭވާލާން އުނދަގޫވެ ނޭވާލާ ހޮޅިތަކުގެ ވަށައިގެން ފެން އުފެދި ނޭވާލުމުގެ ދަތިތަކެއް އަންނަ ކަމަށް ޑރ. ވިދާޅުވި އެވެ.
88 އަހަރުގެ މީހާއަށް އެގޮތަށް އެ ހާލަތު ދިމާވުމުގެ ސަބަބުން ހަށިގަނޑުގެ ތެރެއަށް އޮކްސިޖަން ވަންނަ ވަރު މަދުވެފައިވާ ކަމަށާއި، އޮކްސިޖެން ދޭން ޖެހޭނީ ވެންޓިލޭޓަރަކަށްލައިގެން ކަމަށް ޑރ. މުހައްމަދު އަލީ ވިދާޅުވި އެވެ.
ޑރ. އަލީ ވިދާޅުވީ ވެންޓިލޭޓަރަށްލީ އިރާއި މިހާރާއި އަޅާބަލާއިރު 88 އަހަރުގެ މީހާގެ ހާލަު އިތުރަށް ގޯސްވެފައި ނުވާ ކަމަށެވެ.
ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑިއަމޮލަޖިސްޓް ޑރ. އިބްރާހިމް އަފްޒަލް ވިދާޅުވީ ޑީއެޗް ގައި 6 މީހަކަށް ފަރުވާ ދެމުން އަންނަ ކަމަށެވެ. އަދި މީގެ ތެރެއިން އެކަކު ހޮނިހިރު ދުވަހު ވަނީ ޑީއެޗް-16 އަށް ބަދަލު ކުރެވިފައި ކަމަށާއި، އެއީ އޭނާ ނެގެޓިވް ޓެސްޓް ރިޒަލްޓް އައުމުން އަދި ހާލަތު ރަނގަޅުވެފައިވާތީ ކަމަށެވެ.
މީގެ އިތުރުން 80 އަހަރުގެ ފިރިހެނަކު އޮކްސިޖަންއަށް ލެވިފައިވާ ކަމަށާއި، 69 އަހަރުގެ މީހާ ހާލަތު ސްޓޭބަލް ކަމަށެވެ. އަދި 48 އަހަރުގެ ބިދޭސީ ފިރިހެނެއް އޮކްސިޖެން ދެމުން އަންނަ ކަމަށާއި، އޭނާގެ ހާލަތު ރަނގަޅު ކަމަށެވެ. އަދި 70 އަހަރުގެ އަންހެނަކަށް ވެސް ޑީއެޗް-11 ގައި ފަރުވާ ދެމުން އަންނަ ކަމަށް ވެސް ޑރ. އަފްޒަލް ވިދާޅުވިއެވެ.
