މާލެ ލޮކްޑައުން ކުރުމާއި ގުޅިގެން ވިޔަފާރިކުރުމަށް މިހާތަނަށް 27800 ފަރާތަކަށް ގްރޮސެރީ ޕާމިޓް ދޫކުރެވިފައިވާކަމަށް ނެޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) ބުނެފިއެވެ.

އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެންއީއޯސީގެ ތަރުޖަމާނު މަބްރޫކް އަޒީޒު ވިދާޅުވީ މާލޭގައި ޑެލިވަރީކުރަން މަސައްކަތްކުރާ ފަރާތްތަކުގެ ތެރެއިން ބިޒްނަސް ޕާމިޓްގެ ގޮތުގައި 14398 ޕާމިޓެއް މިހާތަނަށް ދޫކުރެވިފައިވާ ކަމަށެވެ. އަދި ފިހާރަތަކަށް ދިއުމަށް 27800 ގްރޮސެރީ ޕާމިޓް ދީފައިވާ ކަމަށެވެ.

ގްރޮސެރީ ޕާމިޓް ދޫކުރަނީ ކޮންމެ ގެބިސީއަކަށް ތިން ދުވަހުން އެއް ދުވަހު 1 ގަޑި އިރަށެވެ.

މީގެ އިތުރުން ބޭނުންވާ ތަކެތި އެތެރެކުރުމުގެ މަސައްކަތްތަކަށް ބަލާލައިރު އާދީއްތަ ދުވަހު އެކަނި 20 ފޫޓްގެ 43 ކޮންޓެއިނަރ އަދި 40 ފޫޓްގެ 29 ކޮންޓެއިނަރ އެއް ކުލިއަރެންސް ހެދިފައިވާ ކަމަށް މަބްރޫކް ވިދާޅުވި އެވެ. އަދި މާލެއިން ބޭރަށް ރަށްރަށަށް ބޭނުންވާ ކާޑުގެ ބާވަތްތައް ފޮނުވުމުގެ ގިނަ މަސައްކަތްތަކެއް އެސްޓޯއޯއިން ކޮށްފައިވާ ކަމަށް އޭނާ ވިދާޅުވި އެވެ.

ހޮނިހިރު ދުވަހު އެސްޓީއޯގެ މުވައްޒަފަކު ޕޮޒިޓިވްވެގެން އެސްޓީއޯއިން ދެމުންއައި ހިދުމަތްތައް ވަނީ މެދުކަނޑާލާފައެވެ. އަދި ފިހާރަތަކާއި ގުދަން ޑިސްއިންފެކްޓް ކޮށް އާދީއްތަ ދުވަހު ވަނީ އަލުން ހިދުމަތްދޭން ފަށާފައެވެ. އަދި އެސްޓީއޯގެ އީ ސްޓޯރގެ ހިދުމަތް ވެސް ވަނީ އަލުންދޭން ފަށާފައެވެ.