މިނިސްޓަރ މަޚްލޫފް ސެލްފް އައިސޮލޭޝަންގެ މުއްދަތު ހަމަކުރެއްވުމަށްފަހު އަނެއްކާވެސް ޑެލިވަރީއަށް!
3 މެއި 2020 | އާދީއްތަ 12:11އައިސޮލޭޝަން މުއްދަތު ހަމަވިއިރު ކޮވިޑް-19 ގެ އެއްވެސް އަލާމާތެއް ނުފެންނަ ކަމަށް ވިދާޅުވި
ޔޫތު މިނިސްޓަރ އަޙްމަދު މަޚްލޫފް އިހުސާން ފިހާރައިގެ ޑެލިވަރީގައި އަމަލީގޮތުން ބައިވެރިވަނީ
ޔޫތު މިނިސްޓަރ އަޙްމަދު މަޚުލޫފް ސެލްފް އައިސޮލޭޝަންގެ މުއްދަތު ހަމަކުރެއްވުމަށްފަހު އަނެއްކާވެސް ޑެލިވަރީގެ މަސައްކަތަށް ނުކުންނަވައިފިއެވެ.
އާދިއްތަ ދުވަހު މިނިސްޓަރ މަޚުލޫފް ކުރައްވާފައިވާ ޓްވީޓްގައި ވަނީ ފަނަރަ ދުވަސް ހަމަކުރުމަށްފަހު އިހުސާން ފިހާރައިގެ ވޮލަންޓިއަރުންނާއެކު އެނބުރި މަސައްކަތަށް ނުކުންނެވި ކަމަށެވެ. މިކަމުން ލިބުނު އެންމެ ބޮޑު ފިލާވަޅަކީ ހެލްތު ޕްރޮޓެކްޝަން އޭޖެންސީ(އެޗްޕީއޭ) އިން ޑެލިވަރީ ކުރުމަށް ކަނޑައަޅާފައިވާ އުޞޫލާއި އެއްގޮތަށް ރައްކާތެރިކަމުގެ ފިޔަވަޅު އަޅައިގެން މަސައްކަތް ކުރުމުން ބަލިޖެހުމުގެ ފުރުޞަތު ކުޑަކަން ކަމަށް މަޚްލޫފު ވިދާޅުވެފައިވެއެވެ.
ރާއްޖެ އެމްވީއާ ވާހަކަ ދައްކަވަމުން މިނިސްޓަރ މަޚްލޫފް ވިދާޅުވީ ޑެލިވަރީ އަށް ނުކުންނެވީ ސެލްފް އައިސޮލޭޝަން މުއްދަތު ހަމަކުރެއްވުމަށްފަހު ކޮވިޑް-19 ގެ އެއްވެސް އަލާމާތެއް ފެންނަން ނެތުމުން ކަމަށެެވެ.
މިނިސްޓަރ މަޚްލޫފް ސެލްފް އައިސޮލޭޝަންގައި ހުންނަވަން ޖެހުނީ އިހުސާން ފިހާރައިގެ ޑެލިވަރީގައި ޢަމަލީގޮތުން ބައިވެރިވަމުން ދަނިކޮށް އެފިހާރައިގެ މުވައްޒަފުންތަކެއް ކޮވިޑް-19 އަށް ޕޮޒިޓިވް ވުމާއި ގުޅިގެންނެވެ.
މަޚްލޫފްގެ އިތުރުން އިކޮނޮމިކް މިނިސްޓަރ ފައްޔާޒުވެސް ވަނީ ކޮވިޑް 19 އަށް ޕޮޒިޓިވްވި މީހަކާއި ޑައިރެކްޓް ކޮންޓެކްޓް ވުމުގެ ސަބަބުން ސެލްފް އައިސޮލޭޝަންގެ މުއްދަތު ފުރިހަަމަ ކުރައްވާފައެވެ. އަދި މުއްދަތު ހަމަވިއިރު ބަލީގެ އެއްވެސް އަލާމާތެއް ފެންނާން ނެތްކަމަށާއި ޙލު ވަރަށް ރަނގަޅު ކަމަށް މިނިސްޓަރ ފައްޔާޒު ވަނީ ވިދާޅުވެފައެވެ.
