ތިން ދަރުމަވެރިއަކު ވަނީ ކަރަންޓީން ކުރެވިފައި: ދިވެހި ރެޑްކްރެސެންޓް
14 ދަރުމަވެރިއަކު ވަނީ ހޯމް ކަރަންޓީން ގައި
ދިވެހި ރެޑްކްރެސެންޓްގެ ސެކްރެޓަރީ ޖެނެރަލް ފާތިމަތު ހިމްނާ
ކޮވިޑް-19 އާ ގުޅިގެން ފްރޮންޓްލައިން ގައި މަސައްކަތް ކުރަމުންދާ ތިން ދަރުމަވެރިއަކު ކަރަންޓީންކޮށްފައިވާ ކަމަށް ދިވެހި ރެޑްކްރެސެންޓުން ބުނެފިއެވެ.
ކޮވިޑް-19 އާ ގުޅިގެން ދިވެހި ރެޑް ކްރެސެންޓުން ކުރަމުންދާ މަސައްކަތްތަކާއި ގުޅޭ މަޢުލޫމާތު ހިއްސާ ކުރުމަށް އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި އެ ޖަމްޢިއްޔާގެ ސެކްރެޓަރީ ޖެނެރަލް ފާތިމަތު ހިމްނާ ވިދާޅުވީ ދިވެހި ރެޑްކްރެސެންޓްގެ ދަރުމަވެރިންނަކީވެސް ފްރޮންޓް ލައިންގައި މަސައްކަތް ކުރަމުންދާ ކުދިންކަމަށާއި ނަމަވެސް އެއްވެސް ކުއްޖަކު ޕޮޒިޓިވްވި ކަމުގެ މަޢުލޫމާތު މިހާތަނަށް ލިބިފައިވާ ކަމަށެވެ.
ކަރަންޓީ ފެސިލިޓީސްގައި މިވަގުތުވެސް ތިން ދަރުމަވެރިއަކު ތިބި ކަމަށާއި، އެޗްޕީއޭގެ ލަފާގެ މަތިން 14 ދަރުމަވެރިއަކު މިވަގުތުވެސް ހޯމް ކަރަންޓީންގައި އެބަތިިބި ކަމަށެވެ. އަދި ހޯމް ކަރަންޓީން މުއްދަތު ހަމަވުމާއި ގުޅިގެން އިތުރު ހަތަރު ދަރުމަވެރިއަކު މަސައްކަތަށް ނުކުމެފައިވާ ކަމަށްވެސް ރެޑްކްރެސެންޓުން މަޢުލޫމާތު ދެއެވެ. ނަމަވެސް އެކިފަހަރު ނުރައްކަލަށް ހުށަހެޅުމުގެ ސަބަބުން އެކިފަހަރުމަތިން ގޭގައި އައިސޮލޭޓްކޮށް، ބައެއް ޙާލަތްތަކުގައި ކަރަންޓީން ފެސިލީޓީ އަށްވެސް ކުދިން ގެންދެވިފައިވާ ކަމަށެވެ.
ހިމްނާ ވިދާޅުވީ ސިފައިންނާއި، ފުލުހުންނާއި، ޕްރޮންޓްލައިންގައި މަސައްކަތް ކުރާ އެހެން ފަރާތްތަކެކޭ އެއްފަދައިން ރެޑްކްރެސެންޓްގައި މަސައްކަތް ކުރާ ކުދިން އެކުރާ މަސައްކަތުގެ ގޮތުން ރިސްކްވެސް ބޮޑު ކަމަށެވެ. ނަމަވެސް ކުރިއަށް އޮތް ތަނުގައި މިހާރަށް ވުރެވެސް ބޮޑަށް ރައްކާތެރިކަމުގެ ފިޔަވަޅުތައް އަޅަމުންދާނެ ކަމަށެވެ. އަދި ކުރިންވެސް މަސައްކަތް ކުރަމުންދިޔައީ ހެލްތު ޕްރޮޓެކްޝަން އޭޖެންސީ(އެޗްޕީއޭ) އެބޭފުޅުންނަށް އަރުވާ ލަފައާއި އެއްގޮތަށް ކަމަށް އެނާ ވިދާޅުވިއެވެ.
