ސްރީލަންކާގައި ކޮވިޑް-19 ފެތުރޭ މައި ކްލަސްޓަރތައް މިހާރު ދެނެގަނެވިފައިވާކަމަށް އެ ޤައުމުގެ ޖާސޫސީ އިދާރާއިން ބުނެފި އެވެ.

ކޮވިޑް-19 ފެތުރުން ހުއްޓުވުމަށާއި ބަލިން ރައްކާތެރިވުމަށް ޖާސޫސީން އިދާރާއިން ކުރަމުންދާ މަސައްކަތްތައް ހިއްސާކުރުމަށް ވެރިރަށް ކޮލޮމްބޯގައި ބޭއްވި ބައްދަލުމުއްގައި، އެ އިދާރާގެ އެސިސްޓެންޓް ޑައިރެކްޓަރ ޕަރަކްރަމަ ޑިސިލްވާ ވިދާޅުވީ ވައިރަސް ފެތުރެމުންދާ ގޮތް ބެލުމަށް އެ އިދާރާއިން ކުރި މަސައްކަތުން ވައިރަސް ފެތުރޭ މައި ކްލަސްޓަރތައް މިހާރު ދެނެގަނެވިފައިވާކަމަށެވެ.

ސްރީލަންކާގެ ހުރިހާ ޓީވީ ޗެނެލްތަކުން ވަގުތުން ދުރަށްދެއްކި މިބައްދަލުވުމުގައި ޕަރަކްރަމަ ވިދާޅުވީ، ކޮވިޑް-19 މައިގަނޑުގޮތެއްގައި ފެތުރެމުންދާ ޞަރަޙައްދުތައްވެސް މިހާރު ލޮކޭޓް ކުރެވިފައިވާކަމަށެވެ. އަދި މައި ކްލަސްޓަރތަކާއި ވައިރަސް ފެތުރޭ ޞަރަހައްދުތައް ދެނެގަނެވުމާއެކު، ވައިރަސް ފެތުރުން ކޮންޓްރޯލް ކުރެވިފައިވާކަމަށެވެ.

ސްރީލަންކާގެ ކޮވިޑް-19 މައި ކްލަސްޓަރތައް:

ސްރީލަންކާގެ ދައުލަތުގެ ޖާސޫސީ އިދާރާއިން މަޢުލޫމާތުދޭ ގޮތުގައި އެޤައުމުގައި ކޮވިޑް-19 ފެތުރެމުންދާ ޒާތައް ބަލާއިރު، އެންމެ މައި ކްލަސްޓަރ އަކީ ކަނޑުގެ އަސްކަރިއްޔާ (ނޭވީ)ގެ ކްލަސްޓަރ އެވެ. އެންމެ ނުރައްކާތެރި، އަދި ފެތުރުން ހުއްޓުވުމަށް އެންމެ ގިންޖެހުން ބޮޑު ކްލަސްޓަރއެއްގެ ގޮތުގައިވެސް ފާހަގަކޮށްފައިވަނި އެ ކްލަސްޓަރ އެވެ.

ކަނޑުގެ އަސްކަރިއްޔާގެ ގިނަ ޢަދަދެއްގެ އޮފިސަރުން ކޮވިޑް-19 އަށް ޕޮޒިޓިވްވީކަން އެނގުނުއިރު، އޭގެތެރެއިން ބައެއް މީހުން ތިބީ ޗުއްޓީގައި އެވެ. އެެހެންކަމުން އެމީހުން ބައްދަލުވެފައިވާ މީހުން ހޯދުމުގެ މަސައްކަތްތައް މިހާރު ދަނީ ކުރަމުންނެވެ.

ސްރީލަންކާއިން އިއްޔެ 3 މީހުން ކޮވިޑް-19 އަށް ޕޮޒިޓިވް ވިއެވެ. އެއާއެކު އެޤައުމުގައި ވައިރަސް ޖެހުނު މީހުންގެ ޢަދަދުވަނީ 705ށް އަރާފައެވެ. ފަރުވާދީގެން 172 މީހުން ރަނގަޅުކުރެވިފައިވާއިރު، 7 މީހުން ވަނީ މަރުވެފައެވެ. މިހާރުވެސް، 526 މީހުންނަށް ފަރުވާދެމުންދާއިރު އޭގެތެރެއިން އެކަކުގެ ޙާލަތު ވަރަށް ސީރިއަސްކަމަށް ސްރީލަންކާގެ ޞިއްޙަތާބެހޭ އިސް މަސްއޫލުވެރިން ބުނެ އެވެ.

ކޮވިޑް-19ގެ ކަންކަން ވިލަރެސްކުރުމަށް ސްރީލަންކާ ސަރުކާރުން ވަނީ ނެޝަނަލް އޮޕަރޭޝަން ސެންޓަރެއް ޤާއިމުކޮށްފަ އެވެ. އަދި ވައިރަސްއިން ރައްކާތެރިވެ ކޮންޓްރޯލް ކުރުމަށް ގިނަ ފިޔަވަޅުތަކެއްދަނީ އަޅަމުންނެވެ. އެގޮތުން ވައިރަސްގެ ނުރައްކާ ބޮޑު ޞަރަޙައްދުތައް ފުރަބަންދުކޮށް، ބައެއް ޞަރަޙައްދުތަކުގައި ވަނީ ކާފިއުގެ ޢަމުރު އިޢުލާނުކޮށްފަ އެެވެ.

ކޮވިޑް-19އާ ގުޅިގެން ސަރުކާރުން ޢަމަލު ކުރަމުންދާ ނުވަތަ ތަންފީޒުކުރަމުންދާ ޚާއްޞަ އުޞޫލުތަކައް ތަބާވުމަށް އެޤައުމުގެ ފުލުހުންގެ އިދާރާއިން ވަނީ ޢާންމު ރައްޔިތުންނަށް އިލްތިމާސްކުރަމުންނެވެ. އެހެންނަމަވެސް ވަކި ވަކި ފަރުދުން މިއުޞޫލުތަކާއި މަދުން ނަމަވެސް ޚިލާފުވަމުންދާކަމަށް ފުލުހުން ބުނެފައި ވެއެވެ. ޑެޕިއުޓީ އިންސްޕެކްޓަރ އޮފް ޕޮލިސް އަޖިތު ރޯހަނަ ވިދާޅުވެފައިވަނީ ފާއިތުވެދިޔަ 24 ގަޑީއިރު، 1،217 މީހުން ކާފިއުގެ އަމުރާއި ޚިލާފުވެގެން ހައްޔަރުކޮށްފައިވާއިރު، 314 އެއްގަމު އުޅަނދެއްވެސް ފުލުހުންގެ ބެލުމުގެ ދަށަށް ގެނެސްފައިވާކަމަށެވެ.