ޖަޕާނު ސަރުކާރުން ޔުނިސެފާއި ރެޑްކްރެސެންޓް މެދުވެރިކޮށް 8 މިލިއަނަށްވުރެ ގިނަ ރުފިޔާގެ އެހީތެރިކަން ރާއްޖެއަށް ފޯރުކޮށްދީފި އެވެ.

ފޮރިން މިނިސްޓްރީން ބުނީ ކޮވިޑް-19 އާ ދެކޮޅަށް ދިވެހި ސަރުކާރުން ކުރަމުންދާ މަސައްކަތްތަލަށް އެހީތެރިވުމަށް ޔުނިސެފް މެދުވެރިކޮށް 5،634،468 (ފަސް މިލިއަން ހަލައްކަ ތިރީސްހަތަރުހާސް ހަތަރު ސަތޭކަ ފަސްދޮޅަސް އަށް) މިލިއަން ދިވެހި ރުފިޔާ ދީފައިވާކަމަށެވެ. އަދި ރެޑްކްރެސެންޓް މެދުވެރިކޮށް 2،852،700 (ދެ މިލިއަން އަށް ލައްކަ ފަންސާސްދެހާސް ހަތްސަތޭކަ) މިލިއަން ދިވެހި ރުފިޔާ ދީފައިވާކަމަށެވެ. މިއީ މުޅި ޖުމްލަ 8,487,168 (އަށް މިލިއަން ހަތަރު ލައްކަ އަށްޑިހަ ހަތްހާސް ސަތޭކަ ފަސްދޮޅަސް އަށް) މިލިއަން ދިވެހި ރުފިޔާއެވެ.

ފޮރިން މިނިސްޓްރީން ބުނީ މި އެހީ ބޭނުންކުރެވޭނީ މެޑިކަލް އިކުއިޕްމަންޓާއި ބޭހުގެ ބާވަތްތައް ގަތުމުގެ އިތުރުން ސްކޫލްތަކުގައި އޮންލައިންކޮށް ކިޔަވައިދިނުމަށް ބޭނުންވާ ސިސްޓަމްތައް ގާއިމުކުރުމަށް އެހީތެރިކަން ފޯރުކޮށްދިނުމަށް ކަމަށެވެ. އަދި މިފަދަ އެހީތެރިކަމަށް ބޭނުންވެފައިވާ ދަނޑިވަޅެއްގައި ޖަޕާން ސަރުކާރާއި ރައްޔިތުން ފޯރުކޮށްދެއްވި ދީލަތި އެހީތެރިކަމަށް ދިވެހި ސަރުކާރުން ޝުކުރު އަދާކުރުމަށް ފޮރިން މިނިސްޓްރީން ބުނެއެވެ.

މީގެއިތުރުން މިއީ ކޮވިޑް-19 އާ ދެކޮޅަށް ކުރެވޭ މަސައްކަތްތަކަށް ލިބިގެންދިޔަ އިތުރު ކުރިއެރުމެއްކަމަށް ފޮރިން މިނިސްޓްރީން ބުނެއެވެ.

ޖަޕާނަކީ ޒަމާންތަކެއް ވަންދެން ރާއްޖޭގެ ތަރައްޤީއަށް އެންމެ ބޮޑު އެހީތެރިކަމެއް ފޯރުކޮށްދެމުން އަންނަ ގައުމެވެ. އެގައުމުން ވަނީ ރާއްޖޭގެ ތައުލީމާއި، އުމްރާނީ ތަރައްޤީގެ އިތުރުން މޫސުމީ ބަދަލުތަކަށް އެޑަޕްޓުވުމަށް ހިންގާ ޕްރޮޖެކްޓްތަކަށް މީގެކުރިން އެހީތެރިކަން ފޯރުކޮށްދީފަ އެވެ. އަދި ޖަޕާނަކީ 2004 ވަނަ އަހަރުގެ ސުނާމީ ކާރިސާއަށްފަހު ރާއްޖެއަށް އެންމެ ފުރަތަމަ މާލީ އެހީތެރިކަން ފޯރުކޮށްދިން އެއް ގައުމެވެ.