އިންޑޮނޭޝިއާގައި ތިބި 18 ދިވެހިން ރާއްޖެ ގެނެސްފި
1 މެއި 2020 | ހުކުރު 22:24ރާއްޖެއިން ވަނީ ކޮމިއުނިޓީ ސްޕްރެޑެއް ފެނިފައި
އެ 18 ދިވެހިން ގެނައީ އިންޑޮނޭޝިއާގެ ގަރުޑާ އެއާލައިންސްގެ ފްލައިޓަކުން
ރާއްޖެއިން ބޭރުގައި ދިރިއުޅެމުންދާ ދިވެހިން ރާއްޖެ ގެނައުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން އިންޑޮނޭޝިއާގައި ތިބި 18 ދިވެހިން ރާއްޖެ ގެނެސްފިއެވެ.
އެކަމާ ގުޅޭގޮތުން "ރާއް.ޖެއެމްވީ" އަށް މައުލޫމާތު ދެއްވަމުން ފޮރިން މިނިސްޓްރީގެ ކޮމިއުނިކޭޝަންސް ޑިރެކްޓަރ މިއުވާން މުޙައްމަދު ވިދާޅުވީ، އިންޑޮނޭޝިއާގައި ތިބި 18 ދިވެހިން އިންޑޮނޭޝިއާގެ ގަރުޑާ އެއާލައިންސްގެ ފްލައިޓަކުން ހުކުރު ދުވަހުގެރޭ މާލެ ގެނެވިފައިވާ ކަމަށާއި، މި 18 ދިވެހިންނަކީ ތަމްރީނުތަކެއް ފުރިހަމަ ކުރުމަށް އެ ޤައުމަށް ގޮސް ތިބި ބައެއް ކަމަށެވެ.
އޭގެ އިތުރުންވެސް ރާއްޖެ އަންނަން ބޭނުންވާ ދިވެހިން އިންޑޮނޭޝިއާގައި ތިބިކަން ފާހަގަކުރައްވައި މިއުވާން ވިދާޅުވީ، އެ ފަރާތްތަކަށްވެސް އަލުން ފުރުސަތު ހުޅުވާލާނެ ކަމަށެވެ. އެގޮތުން އިންޑޮނޭޝިއާއިން މިވަގުތު ރަޖިސްޓްރީވެފައިވަނީ ވިޔަފާރީގެ ބޭނުންތަކާއި، ޓްރެއިނިންގގެ އިތުރުން، ފަތުރުވެރިކަމުގެ ބޭނުމަށް އެ ޤައުމަށްގޮސް ތިބި ދިވެހިންކަމަށް މިއުވާން ވިދާޅުވިއެވެ.
މިއުވާން ވިދާޅުވީ، ކޮވިޑް-1 9އާ ގުޅިގެން އިންޑޮނޭޝިއާއިންވެސް ގިނަ ފިޔަވަޅުތަކެއް އަޅާފައިވާއިރު، އެ ފިޔަވަޅުތަކުގެ ސަބަބުން އެތެރޭގެ ދަތުރުފަތުރުތަކަށްވެސް ބޮޑެތި ދަތިތަކާ ކުރިމަތިވެފައިވާ ކަމަށެވެ. އަދި އެއާއެކު ރާއްޖެ އަންނަން ބޭނުންވެފައި ތިބި ފަރާތްތަކަށްވެސް އޭގެ ސަބަބުން ދަތިތަކާ ކުރިމަތިވިކަން މިއުވާން ފާހަގަކުރެއްވިއެވެ.
މިއުވާން ވިދާޅުވީ، އިންޑޮނޭޝިއާގައި ތިބި ދިވެހިން އަނބުރާ ގެނައުމުގައި އެ ޤައުމުގެ ފޮރިން މިނިސްޓްރީއާއި، މެލޭޝިއާގައި ހުންނަ ހައި ކޮމިޝަނާއި، ރާއްޖޭގެ ޚާރިޖީ ވުޒާރާ ގުޅިގެން ގިނަ މަސައްކަތްތަކެއް ކޮށްފައިވާ ކަމަށެވެ. އަދި ކުރިއަށް އޮތް ތަނުގައި އެހެނިހެން ޤައުމުތަކުގައި ދިރިއުޅެމުންދާ ދިވެހިންވެސް ގެނައުމަށް ފޮރިން މިނިސްޓްރީން މަސައްކަތް ކުރާނެކަން މިއުވާން ފާހަގަކުރެއްވިއެވެ.
ކޮވިޑް-19 ދުނިޔޭގެ އެކި ޤައުމުތަކުގައި ފެތުރެމުންދިއުމާއެކު، ރާއްޖެއިން ބޭރުގައި ދިރިއުޅެމުންދާ ދިވެހިން ރާއްޖެ ގެނައުމުގެ މަސައްކަތް ސަރުކާރުން ދަނީ ކުރަމުންނެވެ. އެގޮތުން މީގެ ކުރިންވެސް ބައެއް ޤައުމުތަކުން ދިވެހިން ރާއްޖެ ގެނެސްފައިވެއެވެ.
