ކޮންޓެކްޓް ޓްރޭސިންގެ ތެރެއިން 3600 މީހަކު ފާހަގަ ކުރެވިއްޖެ
1 މެއި 2020 | ހުކުރު 17:48މިހާރު ފަރުވާ ދެމުން ދަނީ 461 މީހަކަށް، ޕޮޒިޓިވްވެފައިވަނީ 481 މީހަކު
ނެޝަނަލް އެމަރޖެންސީ އޮޕަރޭޝަން ސެންޓަރުގެ ތަރުޖަމާނު މަބްރޫކް އަޒީޒު
ރާއްޖޭގައި ކޮވިޑް-19 އަށް ޕޮޒިޓިވްވި މީހުންނާއި އެކި ގޮތްގޮތުން ކޮންޓެކްޓްވި 3600 މީހަކު ފާހަގަކުރެވިފައިވާ ކަމަށް ނެޝަނަލް އެމަރޖެންސީ އޮޕަރޭޝަން ސެންޓަރ (އެންއޯއީސީ) އިން ބުނެފިއެވެ.
ހުކުރު ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ސެންޓަރުގެ ތަރުޖަމާނު މަބްރޫކް އަޒީޒު ވިދާޅުވީ ރާއްޖޭގައި 481 މީހަކު ޕޮޒިޓިވްވެފައިވާ ކަމަށެވެ. އަދި މީގެ ތެރެއިން 461 މީހަކަށް ފަރުވާ ދެމުން އަންނަ އިރު 6 މީހަކަށް ފަރުވާ ދެމުން އަންނަނީ ދަރުމަވަންތަ ހޮސްޕިޓަލުގެ ކްރިޓިކަލް ކެއަރގައެވެ.
މަބްރޫކް ވިދާޅުވީ މިހާތަނަށް ކުރެވިފައިވާ މަސައްކަތުގެ ތެރެއިން ކޮންޓެކްޓް ޓްރޭސިންގެ ތެރެއިން 3600 މީހަކު ވަނީ ފާހަގަ ކުރެވިފައިވާ ކަމަށެވެ. މީގެ އިތުރުން 256 ތަނެއް މޮނިޓަރިންގެ ހާލަތަށް ލެވިފައިވާ ކަމަށް މަބްރޫކް ވިދާޅުވިއެވެ.
އޭނާ ވިދާޅުވީ އައިސޮލޭޝަން ފެސިލިޓީތަކުގައި މިވަގުތު 418 މީހަކު އެބަތިބި ކަމަށެވެ. އަދި ކަރަންޓީންގައި 1225 މީހުން ތިބި އިރު މީގެ ތެރެއިން 3 މީހަކު ދޫކުރެވިފައިވާ ކަމަށެވެ.
މޮނިޓަރިންގެ ހާލަތަށް ބަލާއިރު، ނ. މަނަދޫ އަދި ހއ. ތަކަންދޫ މޮނިޓަރިންގެ ހާލަތަށް ލެވިފައެވެ. އަދި 3 ރަށެއް ވަނީ އާންމު ހާލަތަށް ގެނެސްފައެވެ. އެއީ ނ. މިލަދޫ، ހއ. އުލިގަމް އަދި ތުޅާގިރި އައިލެންޑް ރިސޯޓެވެ.
