މިިހާލަތަށް އައިއިރު ސަރުކާރު ތައްޔާރުވެފައި ނެތް، އިހުމާލު އެބައޮތް: އިދިކޮޅު
1 މެއި 2020 | ހުކުރު 08:03ފެންނަނީ ފަރުވާ ކުޑަކޮށް އަމަލު ކުރަމުން ގެންދާތަން: އިދިކޮޅު
ޕީޕީއެމް/ޕީއެންސީން ބޭއްވި ނޫސްވެރިންގެ ބައްދަލުވުމުގެ ތެރެއިން
ރާއްޖޭގެ އާއްމުންގެ ތެރޭގައި ކޮވިޑް-19 ފެތުރެން ފަށައި، އެ ބަލިން މީހަކު މަރުވިއިރު ސަރުކާރުން އޮތީ މިހާލަތަށް ތައްޔާރުވެގެން ނޫން ކަމަށް އިދިކޮޅު ޕީޕީއެމް/ޕީއެންސީ އިން ތުހުމަތު ކޮށްފިއެވެ.
ރާއްޖޭގައި އާއްމުންގެ ތެރޭގައި ކޮވިޑް-19 ގެ ކޭސްއެއް ފުރަތަމަ ފަހަރަށް ފެނިފައިވަނީ ހުސްވި އޭޕްރިލް މަހުގެ 15 ވަނަ ދުވަހުއެވެ. އެ ކޭސް އަށް ފަހު ކޭސްތަކުގެ އަދަދު އިތުރުވެ މިހާތަނަށް 400 އަށްވުރެ ގިނަ މީހުން ވަނީ މި ބައްޔަށް ޕޮޒިޓިވްވެފައެވެ.
ބުރާސްފަތި ދުވަހުގެރޭ އިދިކޮޅު ކޯލިޝަނުން އޮންލައިންކޮށް ކުރިޔަށް ގެންދިޔަ ނޫސްވެރިންގެ ބައްދަލުވުމުގައި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ، ސަރުކާރުގެ ފަރާތުން ކޮވިޑް-19 އާ ގުޅޭ ގޮތުން މައުލޫމާތު ދެއްްވާ ފަރާތްތަކުގެ ވާހަކަތައް ދިމާނުވާކަން ފާހަގަކުރެވިފައިވާ ކަމަށާއި، ހުދު ރައީސް އިބްރާހިމް މުހައްމަދު ސޯލިހު ދައްކަވާ ވާހަކަފުޅުތައްވެސް ދިމާނުވާ ކަމަށެވެ.
އަބްދުއްރަހީމް ވިދާޅުވީ، މި ހާލަތަށް އައިރު ފެންނަމުންދަނީ ސަރުކާރުން މިކަމާއި ދެކޮޅަށް ފަރުވާ ކުޑަކޮށް އަމަލު ކުރަމުން ގެންދާ މަންޒަރު ކަމަށާއި، ސަރުކާރުން ކޮވިޑް-19 އަށް ތައްޔާރުވެފައިވާތަން ނުފެންނަ ކަމަށެވެ.
އަބްދުއްރަހީމް ވިދާޅުވީ، ރައީސް އަބްދުﷲ ޔާމީން ގެއަށް ގެނައުމަށް ރައީސް ސޯލިހުއާ ފޯނުން ގުޅުއްވަމުން ގެންދަވާ ކަމަށެވެ. ނަމަވެސް އަދި މިހާތަނަށް ޔާމިން ގެއަށް ބަދަލުކުރުމަށް ރައީސް ސޯލިހުގެ ފަރާތުން އެންމެ އެކަށީގެންވާ ޖަވާބެއް ލިބިފައިނުވާ ކަމަށެވެ.
އިދިކޮޅުން ޕްރެސްކޮންފަރެންސް ބޭއްވުމުގެ ކުރިން ވަނީ، ރާއްޖެއިން ފުރަތަމަ ފަހަރަށް ކޮވިޑް-19 ގައި މީހަކު މަރުވުމާއި ގުޅިގެން އެކަމުގައި ސަރުކާރު ފަރުވާ ކުޑަކާމާއި އިހުމާލު އެބައޮތް ކަމަށް ބުނެ ނޫސްބަޔާނެއް ވަނީ ނެރެފައެވެ.
އެ ނޫސް ބަޔާނުގައި ބުނީ، އެ އަންހެން މީހާގެ ސާމްޕަލް ނަގާ ޓެސްޓް ލަސްވެގެން ދިއުމަކީ ސަރުކާރުގެ ފަރާތުން އެކަމަށް ދޭންޖެހޭ ސަމާލުކަން ކުޑަވުމާއި ފަރުވާ ކުޑަކުރުމުން ކަމަށެވެ.
ކުރިޔަށް އޮތް ތަނުގައި ބައްޔަށް ޝައްކުކުރެވޭ ފަރާތްތައް ޓެސްޓު ކުރުމާއި، ބަލީގެ ސަބަބުން ފުރާނައަށް ނުރައްކާވެދާނެ ފަދަ ފަރާތްތަކުގެ ސާމްޕަލް ނެގުމަށްފަހު ނަތީޖާ ލިބެންދެން މަޑުކުރުމުގެ ބަދަލުގައި، އެފަދަ ފަރާތްތައް ވިހާވެސް ގާތުން މޮނިޓަރ ކުރެވޭނެފަދަ ގޮތަކަށް އިންތިޒާމުތައް ހަމަޖެއްސުމަށް އިދިކޮޅުން ވަނީ ގޮވާލާފައެވެ.
