މި މަހުގެ 15 ވަނަ ދުވަހު މާލެއިން ފުރައިގެން އުތުރުގެ އަތޮޅުތަކަށް ދަތުރު ކުރި ''އަމާޒް'' ބޯޓުގެ ކެޕްޓަން ކޮވިޑް-19 އަށް ޕޮޒިޓިވްވުމާއި ގުޅިގެން އެކުލަސްޓަރ އިން ފެންނަމުންދާ ކޮންޓެކްޓްސްގެ ތެރެއަށް ދެ މީހަކު އިތުރުވެފައިވާ ކަމަށް ކޮވިޑް-19 ޓެކްނިކަލް އެޑްވައިސަރީ ގްރޫޕް (ޓެގް) ޓީމް ގެ ޑޮކްޓަރު އިބްރާހިމް އަފްޒަލް ވިދާޅުވެއްޖެ އެވެ.

ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ އަފްޒަލް ވިދާޅުވީ އަމާޒު ބޯޓު ކޭސްއާ ގުޅިގެން އިތުރު މީހަކު އަދި ޕޮޒިޓިވް ވެފައިނުވާ ކަމަށެވެ. މިހާތަނަށް އައިއިރު މިކޭސްއާ ގުޅިގެން ށ ނަރުދޫން 8 މީހެއް އަދި މިލަންދޫން އެކަކު ވަނީ ޕޮޒިޓިވްވެފަ އެވެ.

މީގެކުރިން ބޭއްވި ނޫސްވެރިންގެ ބައްދަލުވުމުގައި ޑރ އަފްޒަލް ވިދާޅުވީ މިކޭސްއާ ގުޅިގެން މިހާތަނަށް ހައި ރިސްކް 36 މީހެއް ފާހަގަ ވެފައިވާކަމަށެވެ. ބުދަ ދުވަހުގެ ރޭގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ އަފްޒަލް ވިދާޅުވީ އެކޭސްއާ ގުޅިގެން މިހާތަނަށް 118 ކޮންޓެކްޓެއް ފާހަގަ ވެފައިވާކަމަށެވެ. މީގެ އިތުރުން، 13 މީހެއްގެ ކިބައިން ބަލީގެ އަލާމަތްތައް ފެންނަމުންދާ ކަންވެސް ޑޮކްޓަރ ފާހަގަކުރެއްވިއެވެ.

އެބޯޓުން 98 މީހަކު ދަތުރު ކޮށްފައިވާއިރު ދަތުރުކުރި މީހުން ނިސްބަތްވަނީ ށ އަދި ނ އަތޮޅުގެ ރަށްރަށެވެ. އެއާއެކު އެމީހުންގެ ސާމްޕަލްތައް ނަގާ ޓެސްޓް ކުރަމުންދާއިރު ގިނަ ބަޔެއްގެ ނަތީޖާ ވަނީ ލިބިފައެވެ. މި ކްލަސްޓަރއަށް ރ އަތޮޅު އިނގުރައިދޫ އިތުރުވެފައިވާ ކަމަށް ޑޮކްޓަރ ވަނީ ވިދާޅުވެފަ އެވެ.

އަމާޒު ބޯޓުން ދަތުރުކުރި މީހުން ނިސްބަތްވާ ރަށްތައް:

ނ. މާފަރު

ނ. ހެނބަދޫ

ނ. މިލަދޫ

ނ. ކެނދިކުޅުދޫ

ނ. ވެލިދޫ

ނ. ހޮޅުދޫ

ށ. ނަރުދޫ

ށ. ފުނަދޫ

ށ. މިލަންދޫ

ށ. ފީވަށް

ށ. މާއުނގޫދޫ

ހއ ދިއްދޫ

ހއ އުތީމް