ރާއްޖޭގައި ޕޮޒިޓިވްވި ޕާކިސްތާނު މީހެއް ބޮޑު ތިން ހޮސްޕިޓަލަށް ދިޔަ!

ކޮވިޑް-19 ޖެހިގެން ރާއްޖެއިން ޕާކިސްތާންގެ 2 މީހަކު ޕޮޒިޓިވްވެފައިވާ އިރު، އޭގެ ތެރެއިން އެކަކު މާލެ ސަރަހައްދުގައި ހިމެނޭ ބޮޑު 3 ހޮސްޕިޓަލަށް ޑޮކްޓަރަށް ދައްކަން ދިޔަކަމަށް ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) އިން ބުނެފިއެވެ.

އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެންއީއޯސީގެ ތަރުޖަމާނު މަބްރޫކް އަޒީޒު ވިދާޅުވީ ޕާކިސްތާން މީހާ ހުން އައިސްގެން ފުރަތަމަ ދިޔައީ އޭޑީކޭ ހޮސްޕިޓަލަށް ކަމަށާއި، މިކަމާއި ގުޅިގެން އޭޑީކޭ ހޮސްޕިޓަލުން 8 މީހަކު ފާހަގަކުރެވި އެމީހުން އައިސޮލޭޓްކުރެވި ސާމްޕަލް ނެގުނު ކަމަށެވެ. ނަމަވެސް އެމީހުންގެ ސާމްޕަލްގެ ނަތީޖާ ނެގެޓިވް ކަމަށް މަބްރޫކް ވިދާޅުވިއެވެ.

އަދި އޭގެ ފަހުން ޓްރީޓޮޕް ހޮސްޕިޓަލަށް އޭނާ 2 ފަހަރެއްގެ މަތިން ދިޔަކަމަށާއި، މިކަމާއި ގުޅިގެން ހަތަރު މީހަކު ފާހަގަކުރެވި 4 މީހުންގެ ސާމްޕަލް ނެގިފައިވާ ކަމަށެވެ. އަދި އެމީހުން މިހާރު ތިބީ އައިސޮލޭޝަންގައި ކަމަށާއި،ސާމްޕަލްތަކުގެ ނަތީޖާ އަދި ނުލިބޭ ކަމަށް މަބްރޫކް ވިދާޅުވިއެވެ.

މީގެ އިތުރުން އެމީހާ އައިޖީއެމްއެޗް ހޮސްޕިޓަލަށް ޑޮކްޓަރަށް ދައްކަން ދިޔަ ކަމަށާއި، އައިޖީއެމްއެޗްގައި އޭނާގެ ސާމްޕަލް ނެގުމަށްފަހު ސާމްޕަލް ޕޮޒިޓިވްވެގެން އެމީހާ ދަރުމަވަންތަ ހޮސްޕިޓަލުގައި އެޑްމިޓްކުރެވި ފަރުވާ ދެމުންދާ ކަމަށް މަބްރޫކް ވިދާޅުވިއެވެ.

އެޗްޕީއޭއިން ބުނެފައިވަނީ ދަރުމަވަންތަ ހޮސްޕިޓަލުގެ ކްރިޓިކަލް ކެއަރގައި އެމީހާއަށް ފަރުވާ ދެމުންދަނީ އެމީހާގެ އޮކްސިޖަން ލެވެލް ދަށްވުމުން ކަމަށެވެ.