ޞިއްޙީ އާލާތްތައް ފޯރުކޮށްދިނުމަށް ފްލައިޓުތަކުން ޖާގަ އިތުުރުކޮށްދިނުމަށް ޑަބްލިއުއެޗްއޯއިން ގޮވާލައިފި

ޤައުމުތަކައް ފޮނުވަން ބޭނުންވާ ޞިއްޙީ އާލާތްތައް އުފުލުމަށް ފްލައިޓުތަކުންދޭ ޖާގަ އިތުރުކުރުމަށް ދުނިޔޭގެ ޞިއްޙަތު ޖަމްޢިއްޔާ(ޑަބްލިއުއެޗްއޯ)އިން ގޮވާލައިފިއެވެ.

ޑަބްލިއުއެޗްއޯއިން ބުނެފައިވަނީ، ކޮވިޑް-19 ތަހުލީލުކުރުމަށް ބޭނުންކުރާ ޑައިގްނޯސްޓިކް ކިޓްތަކާއި، އެއިން ރައްކާތެރިވުމަށް ބޭނުންވާ ފަންނީ އާލާތްތައް ޤައުމުތަކައް ފޮނުވަން ފްލައިޓްތަކުން އިތުރު ޖާގަ ބޭނުންވާކަމަށެވެ.

ޑަބްލިއުއެޗްއޯގެ އޮޕަރޭޝަންސް އެންޑް ލޮޖިސްޓިކްސްގެ އިސްވެރިޔާ ޕޯލް މޮލިނާރޯ ވިދާޅުވީ، ޤައުމުތައް ފުރަބަންދުކޮށް، ބައިނަލްއަޤުވާމީ އުދުހުންތައް ހުއްޓާލުމުން އެޕްރީލް މަހުގެ ތެރޭގައި ވެކްސިން ޝިޕްމެންޓްތައް ފޮނުވަން ވަރަށް އުދަނގޫވިކަމަށެވެ. އަދި މިގޮތައް ދިގުދެމިގެންދާނަމަ، މި ޤަވާއިދުން ދޭންޖެހޭ ވެކްސިންތަކައް ޖެހި، އެހެން ބަލިމަޑުކަމާއި ދެކޮޅަށް ކުރަމުންދޭ ކެމްޕޭންތަކައް ހުރަސް އެޅިގެންދާނެކަމަށެވެ. ޑަބްލިއުއެޗްއޯ އިން ކޮވިޑް-19 އައުމުގެ ކުރިން ޤަވާއިދުން އެކި ޤައުމުތަކައް ބޭނުންވާ އެކި ބާވަތުގެ ވެކްސިން ފޯރުކޮށްދެއެވެ. އޭގެ ތެރޭގައި ކުޑަކުދިން ޖަހަން ލާޒިމުކުރާ ވެކްސިންތަކާއި، އެކި ބަލިތަކުން ދިފާޢުވުމަށް ބޭނުންކުރާ ވެކްސިން ހިމެނެއެވެ.

ޔުނައިޓެޑް އަރަބް އެމިރޭޓްސް އިން ތަކެތި ސަޕްލައިކުރަން ފްލައިޓް ހަމަޖައްސައިދިންކަމަށާއި، ޗައިނާއަށް ބޭނުންވާ އެހީގެ ތަކެތި ފޯރުކޮށްދިނީ ދުބާއީ މަގުންކަމަށް ޕޯލް ވިދާޅުވިއެވެ. ޕޯލް ވިދާޅުވީ، ކޮވިޑް-19 ޓެސްޓްކުރުމަށް ބޭނުންވާ ޓެސްޓް ކިޓްތަކާއި، ޞިއްޙީ ބައެއް އާލާތްތައް މަރޗް މަހުގެ ދެވަނަ ދުވަހު ދުނިޔޭގެ ޞިއްހަތު ޖަމްޢިއްޔާއިން ގެންގޮސްފައިވާކަމަށެވެ. މިއީ، އީރާނަށް ހަދިޔާކުރަން ގެންދިޔަ ތަކެތި ކަމަށާއި، ނުފޮނުވި ލަސްވަނީ ވައިގެ އުދުހުންތައް ބަންދުވެ، ކަގޯގެ ގޮތުގައި ފޮނުވަން ބަލާއިރު އެކަށީގެންވާ ޖާގަނެތުމުން ކަމަށެވެ. އެހެންނަމަވެސް މިހާރު ދުބާއީގެ އެހީތެރިކަމާއެކު މިތަކެތި ފޮނުވަން ތައްޔާރުވަމުން އަންނަކަމަށް ޕޯލް ވިދާޅުވިއެވެ.

ކޮވިޑް-19 ގެ ބަލިމަޑުކަމާއި ގުޅިގެން ދުނިޔޭގެ މައި އެއަރލައިން ތަކުން މަދަނީ އަދި ބައިނަލްއަޤުވާމީ އުދުހުންތައް މެދުކަނޑާލުމަަށްފަހު، ފްލައިޓުތައް ކުރަމުންދަނީ ވަރަށް ޒަރޫރީ ޙާލަތްތަކުގައެވެ. ބައެއް އެއަރލައިންތަކުން ކާގޯ ފްލައިޓުތައް ކުރަމުންދާއިރު، އަގު ވަނީ އަތްނުފޯރާ ވަރަށް ބޮޑުކޮށްފައެވެ. މިކަމާއި ގުޅިގެން ދުނިޔޭގެ ޞިއްޙަތު ޖަމްޢިއްޔާއަށް ވަނީ ޤައުމުތަކަށް ފޮނުވަން ވަޢުދުވެފައިވާ ވެކްސިންއާއި، ކޮވިޑް-19 ޓެސްޓް ކިޓްތަކާއި، ބައެއް ޞިއްހީ އާލާތްތަތައް ފޮނުވުމަށް ނުކުޅެދިފައެވެ.

ދުނިޔޭގެ ޞިއްޙަތު ޖަމްޢިއްޔާއިން 1.1 މިލިއަން ކޮވިޑް-19 ޑައިގްނޯސްޓިކް ކިޓް ހަދިޔާކުރަން ބޭނުންވި ނަމަވެސް މިހާތަނަށް ފޮނުވިފައިވަނީ 9 މިލިއަން ކިޓެވެ. އަދި އިތުރު 1.5 މިލިއަން ޓެސްޓް ކިޓް ޤައުމުތަކަަށް ފޮނުވަން ޑަބްލިއުއެޗްއޯއިން ބޭނުންވެއެވެ.

މުޅި ދުނިޔެއިން 3.03 މިލިއަން މީހުން ވަނީ ކޮވިޑް-19 އަށް ޕޮޒިޓިވްވެފައެވެ. އަދި 210،263 މީހުން ވަނީ މަރުވެފައެވެ. ސީދާ ގޮތުންނާއި ނުސީދާ ގޮތުން މުޖުތަމަޢުތަކަަށާއި، ޤައުމުތަކަށް މީގެ ނޭދެވޭ އަސަރުކުރަމުންދާއިރު، އެންމެ ވޭންދެނިވި ދުވަސްތަކެއް ތަޙައްމަލުކުރަމުންދަނީ މުސްލިމުންނެވެ. މިއީ އިސްލާމީ ހަޟާރަތް ފެށުނު ފަހުން މުސްލިމް އުއްމަތައް ކުރިމަތިވި އެންމެ ދަތި އުނދަގޫ ރަމަޟާންމަހުގެ ގޮތުގައި މުސްލިމް ޢަރަބި ޤައުމުތަކުގެ ވެރިންނާއިި، ދީނި އިލްމުވެރިންނާއި، މުފްތީން ދަނީ ސިފަކުރައްވަމުންނެވެ.