މަލާލާ އަށް އޮސްފޯޑް ޔުނިވާސިޓީ އިން ޖާގަ ލިބިއްޖެ
18 އޯގަސްޓު 2017 | ހުކުރު 06:29ނޯބެލް ސުލްހައިގެ އިނާމު ލިބުނު އުމުރުން އެންމެ ހަނގު ފާރާތަކި މަލާލާ
މަލާލާ ޔޫސުފްޒާއީ
ޕާކިސްތާނަށް އުފަން އުމުރުން 20 އަހަރުގެ އެޑިއުކޭޝަން އެކްޓިވިސްޓް އަދި ނޯބެލް ސުލްހައިގެ އިނާމު ލިބުނު އުމުރުން އެންމެ ހަގު ފަރާތް ކަމަށްވާ މަލާލާ ޔޫސުފްޒާއީ އަށް މަތީ ތައުލީމު ހޯދުމަށް އޮކްސްފޯޑް ޔުނިވާސިޓީން ޖާގަ ލިބިއްޖެއެވެ.
އޭ ލެވްލް އިމްތިހާނުގެ ނަތީޖާ މަލާލާ އަށް ލިބި އަދި އެއަށް ފަހު އޮކްސްފޯޑް ޔުނިވާސިޓީން ޖާގަ ލިބުމާ ގުޅިގެން އޭނާ ކުރި ޓްވީޓެއްގައި ބުނީ "އޮކްސްފޯޑުން ފުރުސަތު ލިބުމުން ވަރަށް އުފާވާ ކަމަށެވެ." މަލާލާ ވަނީ އޭނާގެ ޓްވީޓުގައި އޭ ލެވެލްގެ ނަތީޖާ ލިބުނު އެހެން ދަރިވަރުންނަށް ވެސް މަރުހަބާ ކިޔާފައެވެ. އެގޮތުން އޭނާ ބުނީ "ކުރިއަށް ހުރި ދުވަސްތަކަށް ހެޔޮ އެދުންތައް ފޮނުވާ ކަމަށެވެ."
އޮކްސްފޯޑް ޔުނިވާސިޓީގައި މަލާލާ ކިޔަވާނީ ފިލޯސަފީ އާއި، ޕޮލިޓިކްސް އާއި އަދި އިކޮނޮމިކްސް އެވެ. އެ ޔުނިވާސިޓީން ވެސް ވަނީ މަލާލާ އަށް ޖާގަ ލިބިފައިވާ ކަން ކަށަވަރުކޮށްދީފައެވެ.
މަލާލާ އަށް ބައިނަލްއަގްވާމީ ދުނިޔޭގައި މަޝްހޫރުކަން ލިބިގެން ދިޔައީ ޕާކިސްތާނުގެ ސްވޮޓް ވެލީގައި އޭރު އޭނާ ކިޔަވަމުން ދިޔަ ސްކޫލް ކައިރީގައި ތާލިބާން ހަނގުރާމަވެރިން އޭނާގެ ބޮލަށް ބަޑިން ހަމަލާ ދިން ހިސާބުންނެވެ.
މަލާލާ މިހާރު ދިރިއުޅެމުން އަންނަނީ އިނގިރޭސިވިލާތުގައެވެ. އޭނާ އަށް ތާލިބާން ހަނގުރާމަވެރިން ދިން ހަަމަލާއަށް ފަރުވާ ހޯދީ ވެސް އިނގިރޭސިވިލާތުންނެވެ. ހަމަލާ އިން ސަލާމަތްވުމަށް ފަހު އަންހެން ކުދިންގެ މިނިވަންކަމާއި ތައުލީމާއި ހައްގުތަކަށް މަލާލާ އަންނަނީ ވަކާލާތުކުރަމުންނެވެ. އަދި އޭނާ މިހާރު ވެފައި ވަނީ ގިނައެއް ރޯލް މޮޑެލްއަކަށެވެ.
އިނގިރޭސިވިލާތުގެ އޮކްސްފޯޑް ޔުނިވާސިޓީއަކީ މަތީ ތައުލީމަށް މަޝްްހޫރު އަދި ޔުނިވާސިޓީ ރޭންކިންތަކުގައި އަބަދުވެސް ވަރަށް ކުރީގައި އުޅޭ ޔުނިވާސިޓީއެކެވެ.
