ކޮވިޑް-19: ހިރިޔާ ސްކޫލް އިތުރު ވަގުތީ ހިޔަލަކަށް ބަދަލުކޮށް، ބަޔަކަށް އެހީތެރިކަން ފޯރުކޮށްދެނީ
9 ފަރާތަކަށް މިހާރުވެސް ނިދުމާއި ކެއިން ބުއިމުގެ ހިދްމަތް ދެނީ ދެމުން
ހިރިޔާ ސްކޫލްގެ ވަގުތީ ހިޔާ
ކޮވިޑް-19 ރޯގާ މާލެ ސަރަހައްދުގައި ފެތުރެން ފެށުމާއި ގުޅިގެން މާލެ ސަރަހައްދު ލޮކްޑައުން ކުރުމުން، އެކި ރަށްރަށުން ވަގުތީ ގޮތުން އެކިއެކި ބޭނުންތަކުގައި މާލެ އައިސްތިބި މީހުންގެ ތެރެއިން ހާލުގައި ޖެހިގެން ރިޕޯޓް ކުރާ ފަރާތްކަށް ވަގުތީ އިތުރު ހިޔަލެއްގެ ގޮތުގައި ހިރިޔާ ސްކޫލް ހަމަޖައްސައިފި އެވެ.
މާލެ ސިޓީ ކައުންސިލުން ބުނީ މާލެއަށް އެކި ބޭނުންތަކުގައި އައިސް، އަދި ރިސޯޓުން މާލެއައިސް، ލޮކްޑައުންި އާއިހެދި ރަށަށް ނުދެވި، އުޅޭނެ ތަނެއް ނެތި، އަދި ކާނެ ގޮތެއް ނެތިފައިތިބި، ފަރާތްތަކަށް ސިޓީ ކައުންސިލުން ނިދުމާއި ކެއުން ހިރިޔާ ސްކޫލްގައި ހަމަޖައްސައި ދޭންފަށާފައިވާ ކަމަށެވެ.
އެގޮތުން، ހޯމަ ދުވަހުގެ ރޭ 9 ފަރާތެއް ބަދަލު ކޮށްފައިވާ ކަމަށް ސިޓީ ކައުންސިލުން ބުނެއެވެ.
މާލެ ލޮކްޑައުން ކުރުމާއި ގުޅިގެން، މާލޭގައި މިވަގުތު އަމިއްލަ ރަށަށް ނުދެވި ތިބި މީހުނަށް އެހީވުމަށް ހިރިޔާ ސްކޫލް ތައްޔާރުކޮށްފައިވާއިރު، ތައްޔާރުކޮށްފައިވަނީ، އިޖުތިމާއީ ގައިދުރުކަން ހުންނަގޮތަށް، ކަމާބެހޭ ފަރާތްތަކުން ލަފާދީފައިވާ ގޮތަށް ކަމައް ސިޓީ ކައުންސިލުން ބުނެއެވެ.
ސިޓީ ކައުންސިލުން މިކަން ކުރަމުން ދަނީ އެޑިއުކޭޝަން މިނިސްޓްރީއާ ގުޅިގެންކަމަށް މާލެ ސިޓީ މޭޔަރ ޝިފާ މުހައްމަދު ވިދާޅުވެފައި ވެއެވެ.
ކޮވިޑް-19 އާގުޅިގެން ހާޅުގައި ޖެހޭ ފަރާތްތަކަށް ވަގުތީ ބޯހިޔާވަހިކަން ފޯރުކޮށްދިނުމަށްޓަކައި މާލޭގެ އިމާދުއްދީން ސްކޫލާއި ހުޅުމާލެ ޣާޒީ ސްކޫލް އަދި ރެހެންދި ސްކޫލްވެސް ބޭނުންކުރަމުން ދެއެވެ.
މީގެއިތުރުން، ހުޅުމާލެ ފުޓްބޯލް ސްކޫލްގެ 24 ކޮޓަރިވެސް ވަނީ ވަގުތީ ބޯހިޔާވަހިކަމަށް ހަމަޖައްސާފައެވެ.
