ޕޮޒިޓިވްވި މީހުންނާ ޑައިރެކްޓް ކޮންޓެކްޓްވި މީހުނާ ދިމާވި ބައެއް ވަޒީރުން އެކަހެރިކޮށްފި
27 އެޕްރީލު 2020 | ހޯމަ 11:10ކަމާބެހޭ މުއައްސަސާތައް ގުޅިގެން މިހާރުވެސް ގިނަ މަސައްކަތްތަކެއް ކުރަމުންގެންދޭ
ކޮވިޑް-19 ޓާސްކްފޯހުގެ ބައްދަލުވުމެއްގެ ތެރެއިން- ކެބިނެޓްގެ މަސައްކަތްތައްވެސް ރައީސް ގާތުން ބައްލަވަމުން ގެންދަވާ
ރާއްޖެއިން ކޮވިޑް-19 އަށް ޕޮޒިޓިވްވި ބައެއް މީހުންނާ ޑައިރެކްޓް ކޮންޓެކްޓްވި މީހުނާ ދިމާވި ބައެއް ވަޒީރުންވެސް މިވަގުތު އައިސޮލޭޝަންގައި ތިއްބެވިކަމަށް ޓޫރިޒަމް މިނިސްޓަރ އަލީ ވަޙީދު ވިދާޅުވެއްޖެއެވެ.
ހޯމަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރ ވިދާޅުވީ، ސަރުކާރުގެ ކަމާބެހޭ މުއައްސަސާތައް ގުޅިގެން މިހާރުވެސް ގިނަ މަސައްކަތްތަކެއް ކުރަމުންގެންދާއިރު، ވަޒީރުންވެސް ކެނޑިނޭޅި އެ މަސައްކަތްތަކުގައި ދެމިތިއްބެވި ކަމަށެވެ.
އެގޮތުން މިހާރުވެސް ޑިފެންސް މިނިސްޓަރ މާރީއާ އަޙުމަދު ދީދީއާއި، ހޯމް މިނިސްޓަރ ޝައިޚް އިމްރާން ޢަބްދުﷲ އާއި، ހެލްތު މިނިސްޓަރ ޢަބްދުﷲ އަމީންގެ އިތުރުން، ޕްލޭނިންގ މިނިސްޓަރ މުޙައްމަދު އަސްލަމްވެސް ނޭޝަނަލް އިމަރޖެންސީ އޮޕަރޭޝަންސް ސެންޓަރުގައި މަސައްކަތްތަކުގައި ދެމިތިއްބެވި ކަމަށެވެ.
އޭގެ އިތުރުން، ކޮވިޑް-19އަށް ރާއްޖެއިން ޕޮޒިޓިވްވި މީހުންގެ ކޮންޓެކްޓް ޓްރޭސިންގ ގެ ތެރެއިން ފާހަގަވެފައިވާ ބައެއް ވަޒީރުން މިހާރުވެސް އައިސޮލޭޝަންގައި ތިއްބެވިކަން ފާހަގަކުރައްވައި މިނިސްޓަރ ވިދާޅުވީ، މިހާރު މަސައްކަތް ކުރަމުންދާ ކޮންމެ ފަރާތަކީވެސް ކޮންމެ ވަގުތެއްގައިވެސް ކޮވިޑް-19ގެ ޑައިރެކްޓް ކޮންޓެކްޓަކަށް ވެދާނެ ފަރާތެއްކަމަށެވެ.
މިނިސްޓަރ ވިދާޅުވީ، ރައީސް ޞާލިޙު ކެބިނެޓުގެ ކަންކަން އިންތިޒާމު ކުރައްވާފައިވަނީ އެންމެ ނުރައްކާތެރި ޙާލަތުގައިވެސް މެނޭޖުކުރެވޭނެ ގޮތަށްކަމަށެވެ.
މިނިސްޓަރ އެހެން ވިދާޅުވެފައިވާއިރު، މާލޭގެ ބައެއް ޞަރަޙައްދުތައް މޮނިޓަރިންގއަށްލެވި، ޕޮޒިޓިވްވި މީހުންގެ ކޮންޓެކްޓް ޓްރޭސިންގ ހަދަމުންދިޔައިރު، ބައެއް ވަޒީރުން އަމިއްލަފުޅަށް ހޯމް އައިސޮލޭޝަނަށްވެސް ވަޑައިގެންފައިވެއެވެ.
