ފްލޯޓިންގ ހޮސްޕިޓަލް ގެންނަންޖެހޭ ޙާލަތަކަށް އަދި ރާއްޖެ ނުދޭ: ޓޫރިޒަމް މިނިސްޓަރ
27 އެޕްރީލު 2020 | ހޯމަ 10:48ރާއްޖެއަށްވެސް ފްލޯޓިންގ ހޮސްޕިޓަލެއް ހޯދިދާނެކަމަށް އިނދިކޮޅުން ބުނެފައިވޭ
ޓޫރިޒަމް މިނިސްޓަރ އަލީ ވަޙީދު
ކޮވިޑް-19 އިން ރައްކާތެރިވުމުގެ ފިޔަވަޅު އަޅަމުންދާއިރު، ބައްޔަށް ފަރުވާ ދިނުމަށްޓަކައި ފްލޯޓިންގ ހޮސްޕިޓަލް ގެންނަންޖެހޭ ޙާލަތަކަށް ރާއްޖެ އަދި ނުދާކަމަށް ޓޫރިޒަމް މިނިސްޓަރ ޢަލީ ވަޙީދު ވިދާޅުވެއްޖެއެވެ.
ހޯމަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން މިނިސްޓަރ ވިދާޅުވީ، ރާއްޖޭގެ މިވަގުތުގެ ޙާލަތަށް ބަލާއިރު، ފްލޯޓިންގ ހޮސްޕިޓަލް ގެންނަންޖެހޭ ޙާލަތަށް އަދި ކަންކަން ނުދާކަމަށެވެ.
މިނިސްޓަރ އެހެން ވިދާޅުވެފައިވާއިރު، ދުނިޔޭގެ އެހެން ޤައުމުތަކާއި އެއްގޮތަށް ރާއްޖެއަށްވެސް ފްލޯޓިންގ ހޮސްޕިޓަލެއް ހޯދިދާނެކަމަށާއި، ކުރީގެ ރައީސް ޢަބްދުﷲ ޔާމީނުގެ ދެވަނަ ދައުރުގައި ދިވެހިރާއްޖެއަށް ހޯއްދަވަން ނިންމަވާފައި އޮތް ފްލޯޓިންގ ހޮސްޕިޓަލް މިހާރު އޮތްނަމަ ކޮވިޑް-19 އަށް ތައްޔާރީ ޙާލަތު އިތުރުވެގެން ދާނެކަމަށް އިދިކޮޅު ކޯލިޝަނުގެ ބައެއް ފަރާތްތަކުން މީގެ ކުރިން ވިދާޅުވެފައިވެއެވެ.
ނަމަވެސް މިނިސްޓަރ ވިދާޅުވީ، މިހާރު މިއޮތް ޙާލަތުގައި ސަރުކާރަށް ކަންކަން މެނޭޖް ކުރެވޭނެކަމަށާއި، ބޭރުގެ އެހީއަށް އެދެން ޖެހިއްޖެ ޙާލަތެއްގައި އެކަންވެސް ކުރައްވާނެކަމަށެވެ. އެގޮތުން މިހާރުވެސް ސަރުކާރުގެ ކަމާބެހޭ މުއައްސަސާތައް ގުޅިގެން ރައީސްގެ އިރުޝާދުފުޅުގެ ދަށުން ގިނަ މަސައްކަތްތަކެއް ކުރަމުން އަންނަކަން މިނިސްޓަރ ފާހަގަކުރެއްވިއެވެ.
މިނިސްޓަރ އިތުރަށް ވިދާޅުވީ، ރާއްޖޭގައި 150 ރިސޯޓު އޮތްއިރު، ކޮވިޑް-19 ގެ އޮޕަރޭޝަންތަކުގައި އޭގެ ތެރެއިން 16ށް ވުރެ ގިނަ ރިސޯޓު މިހާރުބޭނުން ކުރަމުން އަންނަ ކަމަށެވެ.
