ޕަރސަނަލް ޕްރޮޓެކްޓިވް އިކުޔެޕްމަންޓް (ޕީޕީއީ) ސެޓަކަށް ޚަރަދުވަނީ 1952 ރުފިޔާކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެެއެެވެ.
ކޮވިޑް-19 އިން ރައްކާތެރިވުމަށް މިހާތަނަށް ރާއްޖެއިން ކޮށްފައިވާ ޚަރަދުތަކުގެ ތަފުޞީލު ދެއްވަމުން މަބްރޫކްވަނީ ޕީޕީއީ ރާއްޖޭގައި މިވަގުތު ހުރި މިންވަރާއި، އެކަމަށް ޚަރަދުކޮށްފައިވާ ފައިސާއާ ގުޅޭގޮތުން މަޢުލޫމާތު ދެއްވާފައެވެ.
އެގޮތުން ޕީޕީއީ ސެޓެއްގައި ހިމެނޭކަމަށް މަބްރޫކް ވިދާޅުވީ ގައުން، ހެޑް ކަވަރ، އެން ނައިންޓީ ފައިވް މާސްކް، އަންގި، ފޭސް މާސްކް، ބަޔޯ ހަޒަރޑް ކޮތަޅު، ސެނިޓައިޒަރ، އެންކަލް ބޫޓް، ފޭސް ޝީލްޑް އަދި ބޫޓްކަވަރެވެ.
މިތަކެއްޗަށް ޚަރަދުވާ ފައިސާ:
ގައުނަކަށް: 223 ރުފިޔާ
ހެޑް ކަވަރ އަކަށް: 193 ރުފިޔާ
އެން ނައިންޓީ ފައިވް މާސްކް އަކަށް: 50 ރުފިޔާ
އަންގި އަކަށް : 280 ރުފިޔާ
ފޭސް މާސްކަކަށް: 4 ރުފިޔާ
ބަޔޯ ހަޒަރޑް ބޭގް އަކަށް: 89 ރުފިޔާ
ސެނިޓައިޒަރ އަކަށް: 110 ރުފިޔާ
އެންކަލް ބޫޓަ ކަށް : 464 ރުފިޔާ
ފޭސް ޝީލްޑަކަށް: 535
ބޫޓް ކަވަރ އަކަށް: 3 ރުފިޔާ 60 ލާރި
މިހާތަނަށް އައިއިރު ރެޕިޑް ރެސްޕޯޑް ޓީމުތަކަށް ޕީޕީއީ 1743 ސެޓް ހަވާލު ކުރެވިފައިވާކަމަށް މަބްރޫކް ވިދާޅުވިއެވެ. އަދި ހެލްތު މިނިސްޓްރީގެ ސްޓޮކްގައި 58،000 ސެޓް އެބަހުރިކަމަށް މަބްރޫކް ވިދާޅުވިއެވެ. މީގެއިތުރުން އެސްޓީއޯގަވެސް ޕީޕީއީ ސެޓްގައި ހިމެނޭ އެކި ތަކެތި ސްޓޮކްކޮށްފައި ހުރިކަމަށް މަބްރޫކް ވިދާޅުވިއެވެ.
ކޮވިޑް-19އަކީ ހަލުވިމިނުގައި ފެތުރޭ ބައްޔަކަށްވާއިރު އެމީހުންނަށް ފަރުވާދިނުމަށް މަސައްކަތްކުރާ ޞިއްޙީ އެހީތެރިންނަށް ރައްކާތެރިކަމުގެ ގޮތުން ބޭނުންކުރަންޖެހޭ ހުރިހާ އެއްޗެއް ލިބިފައި ހުރުމަކީ މުހިންމުކަމެކެވެ.
އަދި އެފަދަ ތަކެތި ނެތުމުގެ ސަބަބުން ދުނިޔޭގެ އެކި ހިސާބުތަކުގައި ފްރޮންޓް ލައިންގައި މަސައްކަތްކުރާ ފަރާތްތަކުގެ ފުރާނަދަނީ ގެއްލެމުންނެވެ. އެކަމުގެ ކަންބޮޑުވުން ދުނިޔޭގެ ޞިއްޙަތު ޖަމްޢިއްޔާ ޑަބްލިޔުއެޗްއޯއިންވަނީ ފާޅުކޮށްފައެވެ.
