ޢާންމު ޞިއްޙަތު ރައްކާތެރި ކުރުމުގެ ޤާނޫނުގެ ދަށުން މާލެ ޞަރަޙައްދުގައި އިއުލާނުކޮށްފައިވާ ފުރަބަންދު (ލޮކްޑައުން)އާ ޚިލާފުވެގެން އާދިއްތަ ދުވަހު 12 މީހަކު ހައްޔަރުކޮށް، 191 މީހުން ޖޫރިމަނާ ކޮށްފައިވާކަމަށް ފުލުހުން ބުނެފިއެވެ.

އެކަމާ ގުޅޭގޮތުން ފުލުހުން ބުނީ، މާލެ ސަރަޙައްދުގައި އިއުލާނުކޮށްފައިވާ ލޮކްޑައުންގެ ވަގުތުގައި ބޭރުގައި އުޅުމުގެ ސަބަބުން އާދިއްތަ ދުވަހު 12 މީހަކު ހައްޔަރު ކޮށްފައިވާއިރު، އޭގެ ތެރޭގައި ހިމެނެނީ މާލެއިން ހައްޔަރުކުރި 11 މީހަކާއި، ހުޅުމާލެއިން ހައްޔަރުކުރި އެކަކު ކަމަށެވެ.

އެއާއެކު، މިހާތަނަށް ހައްޔަރު ކުރެވުނު މީހުންގެ ޖުމުލަ އަދަދު 819ށް އަރާފައިވާއިރު، އޭގެ ތެރޭގައި ހިމެނެނީ މާލެއިން ހައްޔަރުކުރި 704 މީހުންނާއި، ހުޅުމާލެއިން ހައްޔަރުކުރި 82 މީހުންނާއި، ވިލިމާލެއިން ހައްޔަރުކުރި 33 މީހެކެވެ.

އޭގެ އިތުރުން، އާދިއްތަ ދުވަހު މާލެއިން 161 މީހުން ޖޫރިމަނާ ކޮށްފައިވާއިރު، ހުޅުމާލެއިން 29 މީހަކު އަދި ވިލިމާލެއިން އެކަކު ޖޫރިމަނާ ކޮށްފައިވާކަމަށް ފުލުހުން ބުނެއެވެ.

ފުލުހުން ބުނީ، ޑެލިވަރީގެ ޚިދުމަތަށް އާދިއްތަ ދުވަހު 147 ހުއްދަ ދޫކޮށްފައިވާއިރު، ލޮކްޑައުންކުރި ފަހުން މިހާތަނަށް 4500 ޑެލިވަރީ ހުއްދަ ދޫކޮށްފައިވާކަމަށެވެ.

މި މަހުގެ 15 ވަނަ ދުވަހުން ފެށިގެން މާލެ ލޮކްޑައުން ކޮށްފައިވާއިރު މަގުމަށްޗަށް ނިކުންނަ ފަރާތްތަކާއި މެދު ނަޞޭޙަތް ނުދީ 1000 ރުފިޔާއިން ޖޫރިމަނާ ކުރެވެމުންދާނެ ކަމަށް ފުލުހުން ވަނީ ބުނެފައެވެ. ލޮކްޑައުން ކޮށްފައިވާއިރު، ޒަރޫރީ ބޭނުންތަކުގައި ގެއިން ބޭރަށް ނިކުންނަ ފަރާތްތަކަށް ފުލުހުން އަންނަނީ ފާސްތަކެއް ދޫކުރަމުންނެވެ. ވިޔަފާރި ކުރުމަށާއި، އެހެނިހެން ބޭނުންތަކުގައި ގެއިން ބޭރަށް ނިކުތުމުގެ ހުއްދަ ދެނީ ކޮންމެ ގެއަކުން އެކަކަށް އެއް ގަޑިއިރުއެވެ.