ކަރަންޓީނަށް ދާން ދެކޮޅުހެދި އޮސްޓްރިއާ މީހެއްގެ މައްޗަށް ސިވިލް ކޯޓުން އަމުރެއް ނެރެފި
ކަރަންޓީނަށް ދާން ދެކޮޅުހެދި ދިވެއްސެއްގެ މައްޗަށް ހޮނިހިރު ދުވަހުގެ ރޭ ވަނީ ކޯޓު އަމުރެއް ނެރެފަ
ސިވިލް ކޯޓު ހުންނަ ޖަސްޓިސް ބިލްޑިންގ
ދިވެހިރާއްޖޭގައި ކަރަންޓީން ފެސިލިޓީއަށް ދާން ދެކޮޅުހެދި އޮސްޓްރިއާ މީހަކު ކަރަންޓީން ފެސިލީޓީއެއްގައި ބަންދުކުރުމުގެ ޢަމުރެއް ސިވިލްކޯޓުން ނެރެފިއެވެ.
ސިވިލް ކޯޓުން ބުނީ، އާދިއްތަ ދުވަހުގެ ރޭގެ މެންދަމު ވަގުތެއްގައި ކަރަންޓީނަށް ދިއުމަށް ދެކޮޅުހެދި އޮސްޓްރިއާ މީހެއްގެ މައްޗަށް ކަރަންޓީނަށް ދިއުމަށް އެންގުމާއެކު، އެފަރާތް ކަރަންޓީން ފެސިލިޓީއެއްގައި ބަންދުކުރުމަށް, ކަރަންޓީން ކުރުމުގައި ޝާމިލުވާ ފަރާތްތަކަށާއި ފުލުހުންގެ މައްޗަށް ސިވިލް ކޯޓުން ޢަމުރެއް ނެރެފައިވާ ކަމަށެވެ.
ކަރަންޓީނަށް ގެންދަން ނެރޭ މިފަދަ ޢަމުރުތައް، އެމީހުންގެ ޒާތީ މައުލޫމާތު ސިއްރު ކުރުމުގެ ބޭނުމުގައި ސިވިލް ކޯޓުން އެޢަމުރުތައް ޢާންމެއްނުކުރެއެވެ.
ރާއްޖޭގައި އިޢުލާނުކޮށްފައިވާ ޞިއްޙީ ކުއްލި ނުރައްކަލުގެ ޙާލަތުގައި، ކަރަންޓީނަށް ދިއުމަށް ދެކޮޅުހެދި ދިވެއްސެއްގެ މައްޗަށް ހޮނިހިރު ދުވަހުގެ ރޭ ސިވިލް ކޯޓުން އަމުރެއް ނެރެފައިވާއިރު، ދެ މީހެއްގެ މައްޗަށް މިމަހުގެ 20 ވަނަ ދުވަހުވެސް ސިވިލް ކޯޓުން ޢަމުރެއް ނެރެފައިވެއެވެ.
ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ފެތުރެން ފެށުމާއި ގުޅިގެން، މާލެ ޞަރަޙައްދު ވަނީ ލޮކްޑައުން ކޮށްފައެވެ. އަދި އެއް ރަށުން އަނެއްރަށަށް ދިއުން މަނާކޮށްފަ އެވެ. މާލެ ޞަރަޙައްދުގެ އިތުރުން، ރާއްޖޭގެ ބައެއް ރަށްރަށުން ވެސް ކޮވިޑް-19 އަށް ޕޮޒިޓިވްވާ މީހުން ދަނީ ފެންނަމުންނެވެ.
އެހެންކަމުން ރާއްޖޭގެ ގިނަ ރަށްތަކެއް މޮނީޓަރިންގ ޙާލަތަށް ގެނެސްފައިވާއިރު، ކޮންޓެކްޓް ޓްރޭސިންގ ގެ ދަށުން ބައެއް ފަރާތްތައް ކަރަންޓީން ކުރަމުންވެސް އެބަދެއެވެ.
ކަރަންޓީނަށް ދިއުން ދެކޮޅު ހެދުމަކީ ޢާންމު ޞިއްޙަތު ރައްކާތެރި ކުރުމުގެ ޤާނޫނުގެ ދަށުން ކުށެކެވެ. އަދި ކަރަންޓީނަށް އެމީހަކު ގެންދިއުމުގެ ޢަމުރުތައް ނެރުމުގެ ބާރުވެސް ކޯޓުތަކަށް ލިބިގެންވެއެވެ. އަދި މިފަދަ ޢާންމު ޞިއްޙަތުގެ ކުއްލި ނުރައްކަލުގެ ޙާލަތުގައި ތެދު މަޢުލޫމާތު ހާމަކުރުމަކީ ހުރިހާ ފަރާތްތަކަށް ވެސް އެޤާނޫނުން ލާޒިމުކުރާ ކަމެކެވެ.
