ވަޒީފާގެ ހާލަތައް ބަދަލު އައިސްފައިވާ ފަރާތްތަކުން ޖޮބް ސެންޓަރަށް ގުޅުމަށް އެދެފި
26 އެޕްރީލު 2020 | އާދީއްތަ 05:58އެހީތެރިކަން ބޭނުންފުޅުވާނަމަ ޖޮބް ސެންޓަރުގެ ކޯލް ސެންޓަރުގެ ނަންބަރު 1475އަށް ގުޅުއްވާ
މިދިއަ އަހަރުގެ ނޮވެމްބަރު 17 ވަނަ ދުވަހު، ޖޮބް ސެންޓަރ އިފްތިތާހު ކުރުމުގެ ތެރެއިން
ކޮވިޑް-19 އާއި ގުޅިގެން ވަޒީފާގެ ޙާލަތައް ބަދަލު އައިސްފައިވާ ފަރާތްތަކުން ޖޮބް ސެންޓަރަށް ގުޅުމަަށް އިކޮނޮމިކް މިނިސްޓްރީން އެދެފިއެވެ.
ކޮވިޑް-19 އާ ގުޅިގެން ރާއްޖޭ ފަތުރުވެރިކަމުގެ ދާއިރާ އެއްކޮށް މިވަނީ ހުއްޓިފަ އެވެ. އެގޮތުން ގިނަ ބައެއްގެ ވަޒީފާ ގެއްލި، ނުވަތަ ނޯޕޭލީވް، ނުވަތަ މުސާރަ ކުޑަކުރަމުންދާ ކަމުގެ ޝަކުވާތައް އަންނަމުންދާތީ، ސަރުކާރުން ވަނީ އެއްވެސް މީހަކު ވަޒީފާއިން ކަނޑައި، މުސާރަ ކުޑަ ކުރުންފަދަ ކަންކަން ނުކުރުމަށް ވަޒީފާ ދޭ ފަރާތްތަކަށް އިލްތިމާސްކޮށްފަ އެވެ.
ކޮވިޑް-19 އާ ގުޅިގެން އިޤުތިޞާދަށް އަންނަ ލޮޅުންތަކާއެކު ޕްރައިވެޓް ސެކްޓަރ ގައި މަސައްކަތްކުރާ ގިނަ ބައެއްގެ ވަޒީފާ ގެއްލި މުސާރަ ކުޑަކުރުމާއި ނޯޕޭ އަށް ފޮނުވާލުމުގެ ކަންކަން ވަނީ ހިނގާފަ އެވެ. އެއާއެކު ސަރުކާރުން ވަނީ ޖޮބް ސެންޓަރެއް ޤާއިމުކޮށް އެފަދަ ފަރާތްތަކުން ރަޖިސްޓްރީ ވުމަށް ހުޅުވާލާފައެވެ.
ކޮވިޑް-19 އާ ގުޅިގެން ސަރުކާރުން އެކުލަވާލާފައިވާ ރިލީފް ޕެކޭޖާ ގުޅިގެން ކަންކަން ގޮސްފައިވާ ހިސާބާ ގުޅޭގޮތުން މަޢުލޫމާތު ސާފުކުރެއްވުމަށް ރައްޔިތުންގެ މަޖިލީހުގެ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީން މިދިއަ ހަފުތާގައި ބޭއްވި ބައްދަލުވުމުގައި ވާހަކަ ދައްކަވަމުން މިނިސްޓަރ ވިދާޅުވީ މިސެންޓަރުގައި 1300 އެއްހާ މީހުން ރަޖިސްޓްރީ ކޮށްފައިވާ ކަމަށެވެ.
ކޮވިޑް-19 އާ ގުޅިގެން ވަޒީފާ އިން ވަކިކުރި، ނޯޕޭލީވް އަށް ފޮނުވާލި އަދި އެކަށީގެންވާ ވަރަށް ވުރެ މުސާރަ ކުޑަކުރި މީހުންނަށް ކުރިޔަށް އޮތް 3 މަސް ދުވަހު ކޮންމެ މަހަކު 5000 ރުފިޔާ ދިނުމަށް ހަމަޖެހިފައިވާ ކަމަށް އިކޮނޮމިކް މިނިސްޓަރ ފައްޔާޒު އިސްމާޢީލް ވަނީ ވިދާޅުވެފަ އެވެ.
(http://jobcenter.mv) ގައި ރިޕޯޓުކުރުމަށް އެހީތެރިކަން ބޭނުންފުޅުވާނަމަ ޖޮބް ސެންޓަރުގެ ކޯލް ސެންޓަރުގެ ނަންބަރު 1475އަށް ގުޅައިގެން އެޚިދުމަތް ލިބޭނެކަމަށް އިކޮނޮމިކް މިނިސްޓްރީން ބުނެއެވެ.
