އައިޖީއެމްއެޗްގައި މާބަނޑު މީހުންނަށް ހާއްސަ އުސޫލު ތަކެއް
ޖުލައި މަހާ ހަމައަށް ވިހާ ހުރިހާ މާބަނޑު މީހުންގެ މައުލޫމާތު ވަނީ އެއްކޮށްފައި
އައިޖީއެމްއެޗް
ކޮވިޑް-19 އާއި ގުޅިގެން އައިޖީއެމްއެޗްގައި މާބަނޑު މީހުން ޑޮކްޓަރަށް ދެއްކުމާއި ވިއްސުމުގައި އަމަލުކުރާނެ ހާއްސަ އުސޫލުތަކެއް ހަމަޖައްސައިފިއެވެ.
ނޭޝަނަލް އިމަޖެންސީ އޮޕަރޭޝަންސް ސެންޓަރު (އެންއީއޯސީ)ގައި ހުކުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އައިޖީއެމްއެޗްގެ ސީނިއާ ކޮންސަލްޓަންޓް އޮބްސްޓެޓްރިކްސް އެންޑް ގައިނޮކޮލޮޖީ އަދި ހެޑް އޮފް ޑިޕާޓްމަންޓް ޑރ.މުހައްމަދު އަސީލް ޖަލީލު ވިދާޅުވީ މާބަނޑު މީހުންނާ މެދު އަމަލު ކުރަން ޖެހޭނެ ގޮތުގެ ކްލިނިކަލް ގައިޑްލައިނެއް ތައްޔާރު ކޮށްފައިވާ ކަމަށެވެ.
އެގޮތުން މި ކްލިނިކަލް ގައިޑްލައިނަކީ މާބަނޑު މީހާ ބެލެހެއްޓުމުގައި އެހެން ޑިސިޕްލިންތައް ވެސް ހިމެނޭތީވެ ފުއްޕާމޭގެ ޑޮކްޓަރުންނާއި ސްކޭން ޑޮކްޓަރުންނާއި އަދި އެތެރެ ހަށީގެ ޑޮކްޓަރުންނާއި ލެބޯޓަރީ އާއި ނަރުހުންނާއި މިޑްވައިފުން ހިމެނޭގޮތަށް މަޝްވަރާކުރެވިގެން ހަދާފައިވާ ގައިޑްލައިނެއް ކަމަށެވެ.
އަސީލް ވިދާޅުވީ އައިޖީއެމްއެޗްގައި އަންނަ ޖުލައި މަހާ ހަމައަށް ވިހާ ހުރިހާ މާބަނޑު މީހުންގެ މައުލޫމާތާއި، އެ މީހުން މިހާރު ދިރިއުޅޭ އުޅޭ ތަންތަނުގެ މައުލޫމާތު ވެސް އެއްކޮށްފައިވާ ކަމަށެވެ. އަދި އިމަޖެންސީގައި މާބަނޑު މީހަކު ގެންނަން ޖެހިއްޖެ ނަމަ އެމީހާކާއި ބެހޭ މައުލޫމާތު ލިބޭނެ ގޮތަށް ރެކޯޑްތައް ބަލަހައްޓަމުންދާ ކަމަށް އޭނާ ވިދާޅުވިއެވެ.
މާބަނޑު މީހުންނާ ދޭތެރޭގައި އަމަލުކުރާނެ އުސޫލަށް އަތޮޅު ތެރޭގައި ތިބި އަންހެނުންގެ ހާއްސަ ޑޮކްޓަރުންނަށް ވެސް އެ މައުލޫމާތު ވީޑިއޯ ކޮންފަރެންސް މެދުވެރިކޮށް ވަނީ ފޯރުކޮށްދީފައެވެ.
