ޔުއެފާ ޗެމްޕިއަންސް ލީގުގެ ދެވަނަ ބުރުގެ ދެވަނަ ލެގުގައި ލިވަޕޫލް ދަނޑުގައި އެތުލެޓިކޯ މެޑްރިޑާއި ދެކޮޅަށް ކުޅުނު މެޗު ކުރިއަށް ގެންގޮސްގެން ނުވާނެ ކަމަށާއި، އެ މެޗު ކުރިއަށްގެންދިޔަ ސަބަބު ތަހުގީގު ކުރަން ލިވަޕޫލްގެ މޭޔަރު ސްޓޯވް ރޮދަރަމް ގޮވާލައްވައިފި އެވެ.

އެންފީލްޑް ސްޓޭޑިއަމްގައި ލިވަޕޫލް އާއި އެތުލެޓިކޯ ބައްދަލުކުރި މެޗު ކުޅެފައިވަނީ މިދިޔަ މާޗު މަހުގެ 11 ވަނަ ދުވަހު އެވެ. މި މެޗަށްފަހު ޔުއެފާއިން ވަނީ ޗެމްޕިއަންސް ލީގުގެ މެޗުތައް ފަސްކޮށްފައެވެ. ރިޕޯޓުތައް ބުނާ ގޮތުން 3-2 އިން އެތުލެޓިކޯ މޮޅުވި މެޗު ބަލަން 52،000 ސަޕޯޓަރުން ވަންއިރު، މި މެޗު ބަލަން ސްޕެއިނުން 3،000 ސަޕޯޓަރުން ވަނީ އިންގްލެންޑުގެ ލިވަޕޫލަށް ގޮސްފައެވެ. މި މެޗު ކުޅުންތާ 10 ދުވަސް ފަހުން އިނގިރޭސިވިލާތުގެ ސަރުކާރުން ވަނީ އެ ގައުމުގައި މީހުން އެއްވެގެން ބާއްވާ އެއްވެސް ހަރަކާތެއް ކުރިއަށް ނުގެންދިޔުމަށް ނިންމާފައެވެ.

ބީބީސީ އަށް ދިން އިންޓަވިއުއެއްގައި ލިވަޕޫލްގެ މޭޔަރު ސްޓޯވް ރޮދަރަމް ވިދާޅުވީ އެ ދަނޑިވަޅުގައި މި މެޗު ކުރިއަށް ގެންދެވިގެން ނުވާނެ ކަމަށާއި، މެޗު ކުރިއަށްގެންދަން ހުއްދަ ދިން ސަބަބު ތަހުގީގު ކުރަން ޖެހޭ ކަމަށެވެ. އަދި މި މެޗުގެ ސަބަބުން އެ ސަރަހައްދުން ކޮރޯނާވައިރަސް (ކޮވިޑް-19) އަށް ޕޮޒިޓިވްވި މީހުންގެ އަދަދު އިތުރު ވެގެން ދިޔަ ކަމަށްވެސް ވިދާޅުވި އެވެ.

މީގެ ކުރިން ސްޕެއިންގެ މެޑްރިޑްގެ މޭޔަރު ހޯސޭ ލުއިޒް މާޓިނޭޒް-އަލްމެއިޑާ ވެސް ވަނީ މި މެޗު ކުޅުނީ ގޯސް ވަގުތެއްގައި ކަމަށް ވިދާޅުވެފައެވެ. އެގޮތުން މި މެޗު ކުޅުމުގެ ދެ ދުވަހެއް ކުރިން ސްޕެއިންގެ އެކި ސަރަހައްދުތަކުގައި 1،000 މީހުންނަށް ވުރެން ގިނަ މީހުން އެއްވެ އުޅުން މަނާކޮށް، ސްކޫލުތައް ވެސް ބަންދުކޮށްފައިވާ ކަމަށާއި އެ ފަދަ ހާލަތެއްގައި ސްޕެއިންގެ ބަޔަކު ވެސް އެހެން ގައުމަކަށް ގޮސް ގިނަ ބަޔަކު އެއްވެ އުޅުން ރަނގަޅު ނޫން ކަމަށް އޭނާ ވިދާޅުވި އެވެ. އަދި މި މެޗު ކުރިއަށް ގެންދަން ޔުއެފާ އިން ހުއްދަ ދިނުމުން، ލިވަޕޫލްގެ ކޯޗު ޔާގެން ކްލޮޕް ވެސް މީގެ ކުރިން ވަނީ ކަންބޮޑުވުން ފާޅުކޮށްފައެވެ.

އިނގިރޭސިވިލާތުން މިހާތަނަށް 138،000 އަށް ވުރެ ގިނަ މީހުންނަށް ކޮވިޑް-19 ޖެހިފައިވާއިރު، ސްޕެއިނުން މި ވައިރަހަށް ޕޮޒިޓިވްވި މީހުންގެ އަދަދު ވަނީ 213،000 އަށްވުރެ މައްޗަށް އަރާފައެވެ.

ކޮވިޑް-19 އާ ގުޅިގެން މުއްދަތެއް ނެތް ގޮތަށް ޗެމްޕިއަންސް ލީގުގެ ކުޅުން މެދުކަނޑާލާފައިވާއިރު، ޗެމްޕިއަންސް ލީގުގެ ފައިނަލް މެޗު އޮގަސްޓް މަހުގެ 29 އަށް ތާވަލުކުރަން ޔުއެފާއިން މިހާރު އަންނަނީ މަޝްވަރާ ކުރަމުންނެވެ. މީގެ ކުރިން ޗެމްޕިއަންސް ލީގުގެ ފައިނަލް މެޗު ކުޅުމަށް ތާވަލުކޮށްފައި އޮތީ މެއި މަހުގެ 30 ވަނަ ދުވަހު ތުރުކީގެ އިސްތަންބޫލް ގައެވެ.

ޗެމްޕިއަންސް ލީގާ ގުޅޭ ގޮތުން މަޝްވަރާ ކުރަން ޔުއެފާއިން ނިންމާފައިވާއިރު، މި މުބާރާތް އަލުން ފަށާނެ ހާލަތެއް ނުލިބި ގިނަ ދުވަސްތަކެއް ވެއްޖެނަމަ، މުބާރާތް ކެންސަލްކުރަން ޖެހިދާނެ ކަމަށްވެސް ޔުއެފާ އިން މީގެ ކުރިން ވަނީ ބުނެފައެވެ.